მიკრობანკმა ემბისიმ ბელგიური საერთაშორისო საინვესტიციო კომპანია Incofin Investment Management-თან მორიგ წარმატებული ტრანზაქცია განახორციელა და 2 მლნ აშშ დოლარის არაუზრუნველყოფილი ინვესტიცია მოიზიდა.

აღნიშნული ფინანსური რესურსი კომპანიას საშუალებას აძლევს, კიდევ უფრო მოქნილი გახადოს დაფინანსების პირობები. ეს კი ნიშნავს, რომ მომხმარებლები - განსაკუთრებით მიკრო, მცირე და საშუალო მეწარმეები - უფრო ხელმისაწვდომი, მრავალფეროვანი და მათ საჭიროებებზე მორგებული ფინანსური გადაწყვეტილებების მიღებას შეძლებენ.

ამასთან, ემბისისა და Incofin-ს მრავალწლიანი, სტაბილური პარტნიორობა აკავშირებთ. გლობალური ფინანსური ინსტიტუტის მხრიდან არაუზრუნველყოფილი სესხის გამოყოფა მიკრობანკის ფინანსური მდგრადობის, გამჭვირვალობისა და საერთაშორისო პარტნიორების მაღალი ნდობის მკაფიო დასტურია.

ზოგადად, ემბისის საერთაშორისო აქტივობა წლიდან წლამდე მკვეთრად იზრდება. 2025 წელს, კომპანიის მიერ საერთაშორისო პარტნიორებისგან მოზიდულმა სახსრებმა ჯამურად 54 მილიონი ლარი შეადგინა, რაც წინა წლის ანალოგიურ პერიოდთან შედარებით ორჯერ მეტია.

ამასთანავე, 2025 წლის განმავლობაში, „აწარმოე საქართველოში“ კაპიტალის ბაზრის მხარდაჭერის პროგრამის ფარგლებში, ემბისიმ საქართველოს საფონდო ბირჟაზე ჯამში 60 მილიონი ლარის მოცულობის ორწლიანი ობლიგაციები განათავსა. აღნიშნული ემისია კომპანიისთვის რიგით მეოთხე გახლდათ.

ამ პროცესში განსაკუთრებით ხაზგასასმელია, რომ ემისიაზე ემბისის ინვესტორი საქართველოს საპენსიო ფონდი გახდა, რაც საპენსიო ფონდის მხრიდან მიკრობანკებთან პარტნიორობის დაწყების პირველი პრეცედენტია.

რაც შეეხება უშუალოდ Incofin Investment Management-ს, იგი ბელგიური საერთაშორისო საინვესტიციო კომპანიაა, რომელიც საქმიანობას 2001 წლიდან ეწევა და ორიენტირებულია პოზიტიური გავლენის ინვესტიციებზე (Impact Investing). კომპანიის მისიას მსოფლიოს მასშტაბით მცირე, საშუალო და აგრობიზნესების განვითარების ხელშეწყობა და მათი ეკონომიკური გაძლიერება წარმოადგენს.