„იონას საფუტკრე“ საქმიანობას დინამიურად აგრძელებს - კომპანიის პროდუქციაზე მოთხოვნა სტაბილურად იზრდება, ამასთან, მომხმარებლების ინტერესი მზარდია აგროტურიზმის მიმართულებითაც. კომპანია საახალწლო პერიოდისთვის ემზადება და სასაჩუქრე შეფუთვებსა და კორპორატიულ შეკვეთებზე მუშაობს.

მოთხოვნის ტენდენციებზე, წლევანდელი სეზონის შედეგებსა და სამომავლო გეგმებზე Business Insider Georgia-ს „იონას საფუტკრის“ დამფუძნებელი გიორგი იონათამიშვილი ესაუბრა.

„ამ ეტაპზე მნიშვნელოვან სიახლეები არ გვაქვს - საქმიანობას ჩვეულ რეჟიმში, დინამიკურად ვაგრძელებთ და მომხმარებლების მხრიდან მოთხოვნა სტაბილურად იზრდება. „იონას საფუტკრე“ მომხმარებლებს ფუტკრის პროდუქტების მრავალფეროვან ასორტიმენტს სთავაზობს. ჩვენი პროდუქცია, მათ შორის თაფლი, ფუტკრის რძე, ჭეო და დინდგელი, გამოიყენება როგორც სამკურნალო დანიშნულებით, ისე საკვები დანამატების სახით.

მზარდია აგროტურიზმის მიმართულებითაც დაინტერესება. წელს ჩვენი საწარმოს მონახულების მსურველი გასულ წელთან შედარებით უფრო მეტი იყო, თუმცა სასაწყობე სივრცის გაფართოებისა და სამშენებლო სამუშაოების გამო ვიზიტორების მიღება ვერ შევძელით. საწარმოს ინფრასტრუქტურის განვითარება ჩვენი საქმიანობისთვის მნიშვნელოვანი ნაბიჯია.

რაც შეეხება წლევანდელ მოსავალს, დასავლეთ საქართველოში მეფუტკრეობისთვის განსაკუთრებით რთული სეზონი იყო, აღმოსავლეთ საქართველოში კი მდგომარეობა შედარებით უკეთესი აღმოჩნდა. ზოგადად, არასტაბილურმა ამინდებმა მოსავალზე მნიშვნელოვანი გავლენა მოახდინა, რამაც თაფლის ფასის გარკვეული ზრდაც განაპირობა.

ამჟამად აქტიურად ვემზადებით საახალწლო პერიოდისთვის, რომელიც გაყიდვების თვალსაზრისით ჩვენთვის ერთ-ერთი ყველაზე დატვირთული პერიოდია. ტრადიციულად, მომხმარებლებს სასაჩუქრე შეფუთვებს ვთავაზობთ და განსაკუთრებულ ყურადღებას ვუთმობთ კორპორატიულ შეკვეთებსაც. ამ მიმართულებით უკვე გვაქვს დაინტერესება სხვადასხვა კომპანიის მხრიდან და ვმუშაობთ, რომ საახალწლოდ მომხმარებლებს ჩვენი პროდუქციის კიდევ უფრო მრავალფეროვანი არჩევანი შევთავაზოთ“, - აცხადებს გიორგი იონათამიშვილი.