საქართველოს წყალმომარაგების სექტორში არსებული გამოწვევების ეფექტიანი გადაჭრა საჭიროებს როგორც სწორი „დიაგნოზის“ დასმას, ასევე ადგილობრივ სისტემებში საერთაშორისო საუკეთესო პრაქტიკის ინტეგრაციას, - ამის შესახებ თბილისში გამართული წყლის მომავლის პირველ საერთაშორისო ფორუმზე საუბრისას კომპანია GWP-ის ტექნიკურმა დირექტორმა გიგა ნადირაძემ განაცხადა. 

როგორც ტელეკომპანია „მაესტროს“ ეთერში გადაცემა Business Insider Georgia-ში სტუმრობისას გიგა ნადირაძემ აღნიშნა, დარგის განვითარება უნდა ეფუძნებოდეს მკაფიო საკანონმდებლო ჩარჩოს, სახელმწიფო სტრატეგიასა და მარეგულირებლის მიერ შემუშავებულ წესებს, რის საფუძველზეც შესაძლებელია კომპანიებში არსებული პრობლემების იდენტიფიცირება და შესაბამისი სამოქმედო გეგმის განსაზღვრა. 

„ჩვენ როდესაც ვსაუბრობთ გამოწვევებზე და ვსაუბრობთ სიტუაციაზე, რომელიც გვინდა რომ გავაუმჯობესოთ, აუცილებელია, რომ უპირველეს ყოვლისა მოხდეს მთლიანი არსის გააზრება რა გარემოში გვიწევს მართვა კომპანიის, ოპერირება, ინვესტიციების განხორციელება. ვგულისხმობ საკანონმდებლო ჩარჩოს, სტრატეგიას, იმ დოკუმენტებს, რომელიც სახელმწიფოს მიერაა შემუშავებული, რეგულაციებს, რომელიც მარეგულირებელმა შეიმუშავა. ამის შემდგომ ხდება გააზრება იმ გამოწვევების, რომელი გამოწვევებიც არის კომპანიაში და კომპანიებში საქართველოს წყალმომარაგების დარგში. დიაგნოზი, რომ დაისვას სწორად, და სწორ დიაგნოზს აუცილებლად სჭირდება ის სამოქმედო გეგმა, რომელმაც ეს გამოწვევები სწრაფად და ეფექტიანად უნდა გადაგვალახინოს. ამ შემთხვევაში აუცილებელია გარდა იმისა, რომ არსებული გამოცდილების გამოყენებით მოხდეს ამ პრობლემების გადაჭრის გზების მოძიება, მოვისმინოთ ჩვენი საერთაშორისო პარტნიორების საუკეთესო გამოცდილება და მოსაზრებები, რათა ჩვენ მოვახდინოთ იმ სწორი გადაჭრის გზების და გადაწყვეტების იმპლემენტაცია ჩვენთან და ჩვენს სისტემებში, რომელიც ვიცით რომ აკრედიტებულია, აპრობირებულია და გამართლებული საშუალებაა.

ამავდროულად ნებისმიერი ტიპის ცვლილებაზე, ან გაუმჯობესებაზე ჩვენ როდესაც ვსაუბრობთ, აუცილებელია, რომ გვქონდეს მყარი ურთიერთობა, მჭიდრო კავშირი ყველა მონაწილე მხარესთან, რომელიც ჩართული არის დარგის გაუმჯობესებაში, განვითარებაში, ან ამ ყოველივეს ხელშეწყობაში.  ვფიქრობ, რომ ფორუმმა თავისი მიზნით გამოიწვია ამ ყოველივეს სინთეზი, ეს ყველაფერი ერთობლიობაში მოაქცია. გარდა ადგილობრივი წარმომადგენლებისა, იყო საერთაშორისო ორგანიზაციები და წამყვანი წყალმომარაგების კომპანიების წარმომადგენლები ჩართული ამ პროცესში და იქ მოხდა ერთგვარი გაზიარება ჩვენ რა გვაქვს საქართველოში, როგორ ვაწესრიგებთ, ვარეგულირებთ საკანონმდებლო ჩარჩოთი სხვადასხვა საკითხებს, რა გამოწვევები გვაქვს, როგორ რეგულირდება მსგავსი ტიპის საკითხები საერთაშორისო დონეზე სხვადასხვა ქვეყანაში და რა არის ის საუკეთესო პრაქტიკა, რომლის გადმოღებაც შესაძლებელია იმისთვის, რომ გაუმჯობესდეს სისტემების მდგომარეობა და საბოლოო ჯამში მომხმარებელმა მიიღოს რაც შეიძლება მოკლე დროში უფრო მეტად გაუმჯობესებული სერვისი“, - აღნიშნა გიგა ნადირაძემ.