„კა გრუპის“ დამფუძნებლის ირაკლი ჭიღლაძის განცხადებით, სასტუმრო სექტორი 2026 წლის პროგნოზებს სხვადასხვა სცენარის მიხედვით განიხილავს, თუმცა არსებული მონაცემებით მარტსა და აპრილში გაუქმებების ზრდა დაფიქსირდა, განსაკუთრებით აზიის ბაზრებიდან. როგორც მან ტელეკომპანია „მაესტროს“ ეთერში გადაცემა Business Insider Georgia-ში სტუმრობისას განაცხადა,  მაისიდან ვითარება შედარებით დასტაბილურდა და თუ დამატებითი გართულებები არ იქნება, მაჩვენებლები წინა წლის ანალოგიურ პერიოდს გაუტოლდება, ხოლო წლის სხვა თვეებზე პოზიტიური მოლოდინები შენარჩუნებულია.

„აპრილის ჯავშნების ნაწილი გაუქმდა, თანაც ისეთი ქვეყნებიდან, როგორიცაა, მაგალითად, ჩინეთი და კორეა. გაუქმების ძირითადი მიზეზი უსაფრთხოებასთან დაკავშირებული გარკვეული საფრთხის განცდა და შიში იყო. ამ პერიოდში კერძო ბიზნესმა არაერთი ვიდეო მოვამზადეთ, რომელთა მთავარი ლაიტმოტივი იყო ის, რომ ჩვენი სივრცე არ არის საშიში და კვლავ ველოდებით სტუმრებს.

მაისიდან გაუქმებები კვლავ ფიქსირდება, თუმცა არა იმავე მოცულობით. ვფიქრობ, თუ ვითარება კიდევ უფრო არ გამწვავდა, მაისის თვე ისეთივე იქნება, როგორიც შარშანდელი იყო. მომდევნო თვეების ჯავშნები კი ჯერჯერობით საკმაოდ კარგად ნარჩუნდება.

შარშან გვქონდა მსგავსი გამოცდილება - 15 ივნისიდან ისრაელსა და ირანს შორის კონფლიქტი დაიწყო, რომელიც ორი კვირა გაგრძელდა. იმ პერიოდში ჯავშნები სრულად გაგვიუქმდა, თუმცა ომის დასრულებისთანავე აღდგენა ძალიან სწრაფად დაიწყო. პროცესი იმდენად ოპერატიულად წარიმართა, რომ ოქტომბერსა და ნოემბერში ძალიან მაღალი მაჩვენებლები მივიღეთ. ეს იყო ერთგვარი პასუხი და კომპენსაცია ივნისის იმ ორკვირიანი ჩავარდნისა.

შესაბამისად, თუ მსგავსი ვითარება დადგება, აღდგენის შესაძლებლობა კვლავ არსებობს. ეს განსაკუთრებით ისრაელს ეხება, რადგან მათ ქცევასა და ფსიქოლოგიაში ეს მომენტი უკვე გამჯდარია. ისინი მსგავს სიტუაციებს მიჩვეულები არიან, სწრაფად ადაპტირდებიან და კონფლიქტის დასრულებისთანავე დაუყოვნებლივ იწყებენ მოგზაურობას.

ამას ვერ ვიტყვით, მაგალითად, სპარსეთის ყურის ქვეყნებზე (GCC), რომელთაც, მათი ფსიქოტიპიდან გამომდინარე, ადაპტაციისთვის გაცილებით მეტი დრო დასჭირდებათ“, - აღნიშნა ირაკლი ჭიღლაძემ.