„იონას საფუტკრე“, შვიდი წელია ბაზარზე ოპერირებს
და მომხმარებლებს მრავალფეროვან ასორტიმენტს სთავაზობს. კომპანიის მიმდინარე საქმიანობასა და სამომავლო გეგმებზე Business Insider Georgia „იონას საფუტკრეს“ დამფუძნებელს, გიორგი იონათამიშვილს ესაუბრა.

„ხანგრძლივი და ინტენსიური წვიმების გამო სეზონი საგრძნობლად დაგვიანდა და ფაქტობრივად ახლა დაიწყო. შესაბამისად, ამ ეტაპზე მნიშვნელოვანი სიახლეები ჯერ არ გვაქვს, გაზაფხულის თაფლიც არ აგვიღია და ახალი პროდუქტებიც არ დაგვიმატებია. მომხმარებელს ამ ეტაპზე კვლავ იმავე ასორტიმენტს ვთავაზობთ“,- აცხადებს გიორგი იონათამიშვილი.

მომხმარებლების მხრიდან მაღალი მოთხოვნა ფუტკრის პროდუქტებზე ფიქსირდება.

„აღსანიშნავია, რომ ბოლო პერიოდში განსაკუთრებით გაიზარდა მოთხოვნა ფუტკრის პროდუქტებზე. მიუხედავად იმისა, რომ თაფლი ტრადიციულად ერთ-ერთ ყველაზე პოპულარულ პროდუქტად რჩება, მომხმარებლების მხრიდან განსაკუთრებული ინტერესი ფუტკრის რძეზე, ჭეოსა და დინდგელზე ფიქსირდება. აღნიშნულ პროდუქტებს ხშირად სამკურნალო და გამაჯანსაღებელი დანიშნულებით იყენებენ“,- ამბობს კომპანიის დამფუძნებელი.

კომპანია აგროტურიზმის მიმართულებით განვითარებას აქტიურად გეგმავს.
„აგროტურიზმის მიმართულებით დაინტერესება საკმაოდ მაღალია, თუმცა ამჟამად ეზოსა და მიმდებარე ტერიტორიის რეაბილიტაციას ვახორციელებთ, რის გამოც ინფრასტრუქტურა ჯერ სრულად მოწესრიგებული არ არის. სწორედ ამიტომ, ვიზიტორების მიღებაზე ამ ეტაპზე უარის თქმა გვიწევს. სამომავლოდ კი აქტიურად ვგეგმავთ სხვადასხვა საგანმანათლებლო და პრაქტიკულ მასტერკლასს.

რაც შეეხება მოსავალს, მიმდინარე წლის გაზაფხულის თაფლის სეზონი რთულად დაიწყო. ხშირი და ხანგრძლივი ნალექების გამო ველოდებით, რომ მაისის თაფლის მოსავალი გასულ წლებთან შედარებით ნაკლები იქნება“,- განმარტავს გიორგი იონათამიშვილი.

„იონას საფუტკრე“ სამომავლოდ ახალი ფიზიკური მაღაზიის გახსნას გეგმავს.

„სამომავლო გეგმებს შორის ერთ-ერთი მთავარი საკუთარი ახალი მაღაზიის გახსნაა. ასევე, გავაგრძელებთ ჩირებისა და ტყლაპების წარმოებას. პროდუქციის მოცულობა და ასორტიმენტი, ტრადიციულად, ხილის სეზონურობაზე იქნება დამოკიდებული“,- აღნიშნავს კომპანიის დამფუძნებელი.