ქართული ყურძნის კოსმეტიკური ბრენდი „მტევანი კოსმეტიკსი“ 
ადგილობრივ და საერთაშორისო ბაზრებზე გაფართოებას აქტიურად განაგრძობს. კომპანია ახალი სავაჭრო სივრცეების დამატებასთან ერთად, ექსპორტის მიმართულებითაც მუშაობს. მიმდინარე პროექტებსა და სამომავლო გეგმებზე Business Insider Georgia-ს „მტევანი კოსმეტიკსის“ დამფუძნებელი ალექსანდრე ბოლქვაძე ესაუბრა.

„2026 წლის მაისში მონაწილეობა მივიღეთ ორ მნიშვნელოვან საერთაშორისო გამოფენაში - Beauty Istanbul 2026-სა და Central Asia Beauty Expo 2026-ში. ორივე ღონისძიებაზე ჩვენი პროდუქციის მიმართ მაღალი ინტერესი დაფიქსირდა.

განსაკუთრებული მოწონება დაიმსახურა ბრენდის კონცეფციამ. არაერთმა დამთვალიერებელმა აღნიშნა, რომ საქართველოსთან ასოცირებული პროდუქტის შემთხვევაში ღვინოსა და ყურძენზე გაკეთებული აქცენტი როგორც ბუნებრივი, ისე საინტერესო და გამორჩეული გადაწყვეტილებაა.

დაინტერესება არაერთი ქვეყნიდან მივიღეთ, თუმცა ჩვენთვის განსაკუთრებით საინტერესოა ცენტრალური აზიის რეგიონი - ყაზახეთი, უზბეკეთი, ყირგიზეთი და ასევე მეზობელი აზერბაიჯანი. ამ ბაზრებს კარგად ესმით ქართული ღვინისა და ქართული პროდუქციის ღირებულება, შესაბამისად, ჩვენი პროდუქტის კონკურენტული უპირატესობების აღქმაც გაცილებით მარტივია. ინტერესი გამოიკვეთა ასევე პოლონეთიდან, სერბეთიდან, საბერძნეთიდან და სხვა ქვეყნებიდან, თუმცა ევროკავშირის ბაზრებზე შესვლა შედარებით ხანგრძლივ და რთულ პროცესებთან არის დაკავშირებული. ამიტომ ამ ეტაპზე ჩვენი მთავარი ფოკუსი სწორედ იმ რეგიონებზეა, სადაც ქართული წარმოშობის პროდუქტის ცნობადობა მაღალია და მომხმარებლებს დამატებითი ახსნა ნაკლებად სჭირდებათ. ასეთ ბაზრებზე იგრძნობა ნდობა, დაინტერესება და თანამშრომლობის მზაობა“,- აცხადებს ალექსანდრე ბოლქვაძე.

კომპანია, ასევე აქტიურად განაგრძობს ადგილობრივ ბაზარზე გაფართოებასაც.

„აქტიურად ვმუშაობთ საცალო ქსელის გაფართოებაზე. ბოლო პერიოდში ორი ახალი სტენდი გავხსენით - East Point-სა და Tbilisi Mall-ში. მნიშვნელოვანი დრო დავუთმეთ სტენდების ეფექტიანი მუშაობის მოდელის ჩამოყალიბებასა და პროცესების დახვეწას.

ამასთან, ხელი მოვაწერეთ პირველ ფრანჩიზის ხელშეკრულებას, რომლის ფარგლებშიც ჩვენი სტენდი უკვე გაიხსნა ქუთაისში, West Point-ში. პარალელურად, მოლაპარაკებებს ვაწარმოებთ City Mall-თან და Galleria Tbilisi-სთან, სადაც ასევე ვგეგმავთ ჩვენი სტენდის განთავსებას.

სამომავლოდ, განვიხილავთ ფრანჩიზის მოდელის საერთაშორისო ბაზრებზე გატანასაც. შევისწავლეთ არაერთი წარმატებული მაგალითი და ვფიქრობთ, რომ ამ მიმართულებას განვითარების დიდი პოტენციალი აქვს“,- აღნიშნავს კომპანიის დამფუძნებელი.

„მტევანი კოსმეტიკსი“ სამომავლოდ ასორტიმენტის გამრავალფეროვნებასა და გაფართოებას გეგმავს.

ბრენდის ხელმისაწვდომობის გასაზრდელად შევედით სააფთიაქო ქსელ GPC-ში. დღეს უკვე წარმოდგენილი ვართ „ავერსის“, „პსპ“-სა და GPC-ის ფილიალებში. ამ ეტაპზე პროდუქცია ყველა ფილიალში არ არის განთავსებული, თუმცა გაყიდვების დინამიკის შესაბამისად შესაძლოა ქსელის გაფართოება.

გარდა ამისა, აქტიურად ვმუშაობთ ონლაინ მიმართულების განვითარებაზეც. ახლახან ჩვენი პროდუქცია განთავსდა extra.ge-ზე და ვაკვირდებით შედეგებს. პარალელურად, სხვადასხვა მარკეტინგულ აქტივობას ვახორციელებთ - ვატარებთ ფასდაკლების კამპანიებს, მომხმარებლებს ვურიგებთ სპეციალურ ვაუჩერებს და მუდმივად ვზრდით ბრენდის ცნობადობას. მომხმარებლების მხრიდან მიღებული უკუკავშირი ძალიან პოზიტიურია.

ამასთან, ვმუშაობთ ახალი პროდუქტების შექმნაზეც. უახლოეს პერიოდში გაყიდვაში ჩეშვება არომატული სანთლები, სასურნელე და მყარი დიფუზორები, რაც ბრენდის პროდუქციის ასორტიმენტს კიდევ უფრო გააფართოებს. პირადად ვარ ჩართული ყველა მნიშვნელოვან პროცესში, რადგან მიმაჩნია, რომ ბრენდის განვითარების თითოეული ეტაპი განსაკუთრებულ ყურადღებას საჭიროებს“,- განმარტავს ალექსანდრე ბოლქვაძე.

ინფორმაციისთვის, კომპანიის კოსმეტიკური ხაზი გაყიდვაში 2021 წლის ნოემბერში ჩაეშვა. საწარმო თბილისთან ახლოს, წავკისში მდებარეობს.