გარკვეული რისკები არსებობს და ადამიანი და პასუხისმგებლობა ყოველთვის მოვლენების ცენტრში უნდა დარჩეს, თუმცა, ნებისმიერ შემთხვევაში, მე მგონია, რომ დღეს პროგრესის აქსელერაცია ისეთ დონეზე ხდება, როგორიც კაცობრიობას არასოდეს უნახავს, - ამის შესახებ ტელეკომპანია „მაესტროს“ ეთერში, გადაცემა Business Insider Georgia-ში სტუმრობისას კომპანია „ფლომასტერის“ დამფუძნებელმა ალექსანდრე ჯეჯელავამ იმ კითხვის საპასუხოდ განაცხადა, რომელიც AI-ის მიერ ლიდერებისა და ზოგადად მენეჯმენტის ქცევაში გამოწვეულ ცვლილებებს შეეხებოდა. ჯეჯელავას თქმით, ტექნოლოგიური პროგრესი უპრეცედენტო ტემპით მიმდინარეობს და უახლოეს წლებში AI ბიზნესსა და სამუშაო გარემოს რადიკალურად შეცვლის. ალექსანდრე ჯეჯელავა მიიჩნევს, რომ ხელოვნური ინტელექტი ადამიანებს სრულად ვერ ჩაანაცვლებს, თუმცა კონკურენტულ უპირატესობას ის თანამშრომლები მიიღებენ, რომლებიც AI-ს საკუთარ საქმიანობაში ეფექტიანად გამოიყენებენ.

„ჩვენ ჯერ კიდევ საწყის ეტაპზე ვართ. ძალიან მიყვარს იუვალ ნოა ჰარარი - ერთ-ერთი გამორჩეული სპიკერი, რომელიც ბევრს საუბრობს ამ თემაზე. როდესაც მას ჰკითხეს, თუ რა მოლოდინები ჰქონდა ხელოვნურ ინტელექტთან დაკავშირებით და დაუზუსტეს, რომ გულისხმობდნენ ChatGPT-ს, Gemini-სა და მსგავს პლატფორმებს, მან ასეთი რამ უთხრა: გააზრებული გაქვთ, რომ ეს ყველაფერი ხელოვნური ინტელექტის სამყაროში იგივეა, რაც ამება იყო ორგანულ სამყაროშიო.

ფაქტობრივად, ჩვენ დღეს ვუყურებთ პირველ ერთუჯრედიან ორგანიზმებს ხელოვნური ინტელექტის სამყაროში. წარმოიდგინეთ, რა მოხდება მომავალში, რამდენიმე წელი გავიდა და ევოლუცია საოცარი, საოცრად სწრაფი ტემპით მიმდინარეობს.

მე ვიტყოდი, რომ ხელოვნურმა ინტელექტმა პირველ რიგში დაბნეულობა შემოიტანა. ზოგმა თქვა, რომ მორჩა, თანამშრომლები აღარ დაგვჭირდება, ზოგმაც - საერთოდ შეგვცვლიანო. სულ რაღაც ერთი კვირის წინ HR ბიზნეს სამიტი მიმდინარეობდა და იქ გამოსვლისას აღვნიშნე: „AI კი არ შეგცვლით, ძვირფასო HR-ებო, არამედ თქვენი კოლეგა შეგცვლით, რომელიც AI-ს კარგად ჩართავს თავის საქმეში“.

სწორედ ეს რეალობა შემოიტანა ამ ტექნოლოგიამ. წარმოიდგინეთ კომპანია, რომელიც დღეს სოციალური ქსელებით არ სარგებლობს. ის ხომ ძალიან ჩამორჩენილ მდგომარეობაშია? ხელოვნური ინტელექტის აუთვისებლობაც ძალიან სწრაფად გადაგვიყვანს ამ კატეგორიაში.

რა თქმა უნდა, მოსაზრებები იმაზე, რომ დავიღუპებით ან AI შემოგვეომება, ბევრჯერ გვინახავს ფანტასტიკურ ფილმებში. გარკვეული რისკები არსებობს და ადამიანი თუ პასუხისმგებლობა ყოველთვის მოვლენების ცენტრში უნდა დარჩეს, თუმცა, ნებისმიერ შემთხვევაში, მე მგონია, რომ დღეს პროგრესის აქსელერაცია ისეთ დონეზე ხდება, როგორიც კაცობრიობას არასოდეს უნახავს. მენეჯერებისთვის კი ეს სერიოზული გამოწვევაა“, - აცხადებს ჯეჯელავა.

„ფლომასტერის“ დამფუძნებელი მიიჩნევს, რომ ქართული კომპანიების ნაწილი ხელოვნური ინტელექტის მნიშვნელობას სწრაფად აცნობიერებს და ამ პროცესში წამყვან როლს თავად ბიზნესების დამფუძნებლები თამაშობენ.

„მე მინდა ვთქვა, რომ თავის დროზე ძალიან მენიშნა Google-ის დამფუძნებლების შემობრუნება. ისინი ცოტა გაწეული იყვნენ პროცესებიდან, ასაკიც მოუწიათ, თავის ცხოვრებას მიხედეს, თუმცა მოუწიათ დაბრუნება და სათავეში ჩადგომა, სწორედ ხელოვნური ინტელექტის მიმართულებით.

წარმოიდგინეთ, ქართულ კომპანიებშიც ზუსტად ასეა, დამფუძნებლები - ყველაზე მოწინავე მოაზროვნეები, ადამიანები, ვინც ეს ბიზნესები შექმნეს და ქართული ბიზნესის მღელვარე ოკეანეში გამოატარეს, დღეს ისევ სათავეში არიან. ხშირ შემთხვევაში მაკვირვებს კიდეც თუ რა სწრაფად მიხვდნენ ისინი ამ ტექნოლოგიის მნიშვნელობას.

მაგრამ პროცესი კომპანიის შიგნით ერთგვაროვანი არ არის. პირველი პირი შეიძლება დღესვე მიხვდეს ყველაფერს, თუმცა უზარმაზარი ენერგია იხარჯება იმაზე, რომ ეს ხედვა მენეჯმენტამდე, მთელ გუნდამდე მივიდეს და ორგანიზაციაში დაინერგოს.

იცით, როგორი სიტუაცია იქმნება? სულ ზემოთ მყოფი ლიდერი ხშირად ხვდება, იცის და გრძნობს ამ საჭიროებას. სულ ქვემოთ გვყავს Gen Z თანამშრომლები - გუშინ მოსული ახალგაზრდები, რომლებმაც ზუსტად იციან, რა არის ხელოვნური ინტელექტი და როგორ გამოიყენონ იგი. აი, შუაში მყოფი მენეჯმენტის შრეები კი ძალიან სერიოზულ გადამზადებასა და, პირდაპირ რომ ვთქვათ, შეჯანჯღარებას ითხოვენ.

მე შემიძლია ვთქვა, რომ კომპანიები, რომლებთანაც ჩვენ ვმუშაობთ არ ელიან მოკლე დროში დიდ ცვლილებას. მაგრამ სწორი ადამიანი - ეხლა ჩვენც ამაზე ვლაპარაკობთ, ტრენერებსაც რომ ველაპარაკებით და კონსულტანტებს, რომ დარწმუნებული იყავით, რომ ეს ხალხი ვინც ოთახში ზის, მაგარი ხალხია, იმათ შექმნეს ეს კომპანია და აქამდე მოიყვანეს და ამიტომ ცოტაც სწორად თუ გაიგეს, ისინი ამისგან შექმნიან ოქროს, ოქროდ გარდაქმნიან და ეს არის ზუსტად ჩვენი გამოცდილება, რომ კომპანიები საოცარ პროგრესებს აღწევენ ძალიან მოკლე დროში. იმ „ჯენ ზის“ რომ „ჯენ ზის“ დაარქმევენ, ხელოვნურ ინტელექტს სწორად ჩასვამენ ასე ვთქვათ ამ დიდ სურათში.“, - აცხადებს ალექსანდრე ჯეჯელავა.