მარტEV ელექტრომობილების დასამუხტი სადგურების ქსელია, რომელიც მთელი საქართველოს მასშტაბით 170-ზე მეტ დამტენ სადგურს აერთიანებს. კომპანიის საქმიანობის, ბაზარზე არსებული ტენდენციებისა და სამომავლო გეგმების შესახებ Business Insider Georgia მარტEV-ის დირექტორს, გიგი ხოჯევანიშვილს, ესაუბრა.

როგორია კომპანიის საქმიანობის სპეციფიკა, როდის დაიწყეთ ბაზარზე ოპერირება და რას სთავაზობთ მომხმარებლებს?

მარტEV წარმოადგენს ელექტრომობილების დასამუხტი სადგურების ქსელს. კომპანია უკვე რამდენიმე წელია ოპერირებს ბაზარზე და ამჟამად 170-ზე მეტ დამტენ სადგურს აერთიანებს მთელი ქვეყნის მასშტაბით.

ჩვენი მთავარი მიზანია ელექტრომობილით გადაადგილება გავხადოთ უფრო მარტივი, ხელმისაწვდომი და კომფორტული. მარტEV მომხმარებლებს სთავაზობს სწრაფ და ტექნოლოგიურად გამართულ დამუხტვის სერვისს, მუდმივად განახლებად აპლიკაციას და ფართო ინფრასტრუქტურულ ქსელს როგორც თბილისში, ისე რეგიონებში.

2018–2021 წლებში მარტEV-მა თბილისის მერიასთან თანამშრომლობით დედაქალაქში უფასო ელექტრო დასამუხტი ქსელი შექმნა, რაც კომპანიის გამოცდილებასა და სანდოობას უსვამს ხაზს.

2026 წლის სექტემბრისთვის ქსელი 200-ზე მეტ დამტენ სადგურამდე გაფართოვდება, ხოლო ძირითადი ავტომაგისტრალები სწრაფი დამტენებით აღიჭურვება, რაც ელექტრომობილით შორ მანძილზე გადაადგილებას კიდევ უფრო კომფორტულს გახდის.

როგორ შეაფასებდით დღეს საქართველოში ელექტრომობილებისა და EV Charging ინფრასტრუქტურის მიმართ მოთხოვნას - რა ტენდენციებს ხედავთ ბაზარზე?

საქართველოში ელექტრომობილებზე მოთხოვნა ბოლო წლებში მნიშვნელოვნად გაიზარდა და ეს ტენდენცია ყოველდღიურად უფრო აქტიური ხდება. მომხმარებლები სულ უფრო მეტად ირჩევენ ეკოლოგიურ, ეკონომიურ და თანამედროვე ტრანსპორტს, რაც ინფრასტრუქტურის განვითარებასაც აჩქარებს.

თუ რამდენიმე წლის წინ ელექტრომობილები უფრო ნიშურ პროდუქტად მიიჩნეოდა, დღეს ისინი ყოველდღიური გადაადგილების რეალურ ალტერნატივად იქცა. განსაკუთრებით გაიზარდა მოთხოვნა სწრაფ დამტენებზე და სტაბილურ სერვისზე.

ამასთან ერთად, აქტიურად იზრდება ბიზნეს სექტორის ჩართულობაც - კომპანიები უფრო მეტად ინტერესდებიან მწვანე ტექნოლოგიებითა და მდგრადი განვითარების მიმართულებით, რაც EV ინფრასტრუქტურაზე მოთხოვნას კიდევ უფრო ზრდის.

რას მიიჩნევთ მარტEV-ის მთავარ კონკურენტულ უპირატესობად?

მარტEV-ის მთავარი უპირატესობა არის ის, რომ კომპანია ქმნის არა მხოლოდ დამტენ სადგურებს, არამედ სრულ ეკოსისტემას ელექტრომობილების მომხმარებლებისთვის.

ჩვენი ძლიერი მხარეებია ფართო ინფრასტრუქტურული ქსელი, ტექნოლოგიური სტაბილურობა, თანამედროვე სერვისი და მომხმარებელზე ორიენტირებული მიდგომა. მარტEV მუდმივად მუშაობს ახალი ტექნოლოგიების დანერგვასა და ქსელის განვითარებაზე, რათა მომხმარებელს მაქსიმალურად კომფორტული გამოცდილება შესთავაზოს.

ასევე აქტიურად ვთანამშრომლობთ სხვადასხვა სექტორთან - დეველოპერებთან, ბიზნეს ცენტრებთან, სასტუმროებთან და საცხოვრებელ კომპლექსებთან, რაც გვაძლევს შესაძლებლობას, დამუხტვის სერვისი მომხმარებლის ყოველდღიურ მარშრუტებში უფრო ხელმისაწვდომი გავხადოთ.

როგორია კომპანიის სამომავლო გეგმები და რა სიახლეებს უნდა ელოდოს მომხმარებელი უახლოეს პერიოდში?

მარტEV-ის მთავარი მიმართულება უახლოეს პერიოდში ქსელის მასშტაბური გაფართოებაა როგორც თბილისში, ისე რეგიონებში და ძირითად ავტომაგისტრალებზე. ჩვენი მიზანია, მომხმარებლებს ელექტრომობილით გადაადგილება მთელი საქართველოს მასშტაბით შეუფერხებლად შეეძლოთ.

კომპანია ასევე მუშაობს ახალი თაობის ულტრა-სწრაფი დამტენების დამატებაზე, აპლიკაციის ფუნქციონალის გაუმჯობესებასა და მომხმარებლის გამოცდილების კიდევ უფრო გამარტივებაზე.

უახლოეს პერიოდში მომხმარებლები იხილავენ ახალ პარტნიორულ პროექტებს, ახალ ლოკაციებსა და ტექნოლოგიურ სიახლეებს, რომლებიც ელექტრომობილების გამოყენებას კიდევ უფრო კომფორტულსა და ხელმისაწვდომს გახდის.