წელს მზის ელექტროსადგურებზე მოთხოვნამ ფაქტობრივად რეკორდულ ნიშნულს მიაღწია, რაც პირდაპირ აისახა ჩვენი მიმდინარე პროექტების პორტფელზეც,- ამის შესახებ, Business Insider Georgia-ს Shine Energy-ს დამფუძნებელმა ნინა გადელიამ განუცხადა.

რა არის Shine Energy-ის მიმდინარე სიახლეები და რომელი პროექტები გამოარჩევდით ბოლო პერიოდის საქმიანობაში?

ბოლო პერიოდი „შაინ ენერჯისთვის“ განსაკუთრებით აქტიური და ზრდაზე ორიენტირებულია. წელს მზის ელექტროსადგურებზე მოთხოვნამ ფაქტობრივად რეკორდულ ნიშნულს მიაღწია, რაც პირდაპირ აისახა ჩვენი მიმდინარე პროექტების პორტფელზეც.

ამ ეტაპზე ვმუშაობთ როგორც მსხვილი მასშტაბის მზის ელექტროსადგურების მშენებლობაზე, ისე სხვადასხვა კომერციულ ობიექტზე.

როგორ შეაფასებთ საქართველოში მზის ენერგიის ბაზრის განვითარების დინამიკას და რა ძირითადი ტენდენციები იკვეთება?

საქართველოში მზის ენერგიის ბაზარი დაჩქარებული ზრდის ფაზაშია. მთავარი ტენდენცია არის მოთხოვნის მკვეთრი ზრდა, რაც განპირობებულია ორი ძირითადი ფაქტორით: ცნობიერების ამაღლება და ელექტროენერგიის ტარიფების ზრდა.

ბიზნესები და კერძო სექტორი სულ უფრო აქტიურად ეძებენ ენერგოდამოუკიდებლობის გზებს, რაც მზის ენერგიას ერთ-ერთ ყველაზე სტაბილურ და პროგნოზირებად ალტერნატივად აქცევს. ასევე იკვეთება ტენდენცია, რომ ბაზარი გადადის მხოლოდ „მშენებლობის“ მოდელიდან სრულ სერვისულ ეკოსისტემაზე.

რა ფაქტორები განაპირობებს დღეს ბიზნესებისა და კერძო მომხმარებლების მხრიდან მზის ენერგიაზე გაზრდილ მოთხოვნას?

მოთხოვნის ზრდას რამდენიმე ფაქტორი განაპირობებს:

• ელექტროენერგიის ტარიფების ზრდა და ფასების მერყეობა;
• ენერგოდამოუკიდებლობის სურვილი ბიზნესებში;
• გარემოსდაცვითი პასუხისმგებლობის ზრდა და ESG მიდგომების გაძლიერება;
• ტექნოლოგიების გაიაფება და ხელმისაწვდომობის ზრდა;
• გრძელვადიანი ეკონომიკური სარგებელი და ხარჯების ოპტიმიზაცია.

როგორ ხედავთ ბაზრის განვითარებას უახლოეს წლებში და რა მიმართულებით გეგმავს Shine Energy საქმიანობის გაფართოებას?

უახლოეს წლებში მზის ენერგიის ბაზრის ზრდის ტენდენცია კიდევ უფრო გაძლიერდება. მოთხოვნა არა მხოლოდ მაღალი დარჩება, არამედ უფრო კომპლექსური და მრავალმხრივი გახდება - გაიზრდება საჭიროება როგორც გენერაციის, ისე მართვის, მომსახურებისა და ოპერირების სრული ციკლის მიმართ.
ამ ფონზე, „შაინ ენერჯი“ უკვე გადავიდა გაფართოების ეტაპზე და მიზნად ისახავს ენერგეტიკაში სრული ეკოსისტემის შექმნას.

ჩვენი საქმიანობა ოთხ ძირითად მიმართულებად არის ჩამოყალიბებული:

• Shine Energy (მთავარი მიმართულება): მზის ელექტროსადგურების საინჟინრო და სამშენებლო პროექტები;
• Shine Energy Sustainability: არაკომერციული მიმართულება, რომელიც ფოკუსირებულია სოციალურ პროექტებზე და ენერგეტიკული ცნობიერების ამაღლებაზე;
• Shine Energy Solutions: ელექტროენერგიის საცალო ბაზარზე ენერგეტიკული სერვისები, ელექტროენერგიის განაწილება მზის სადგურებიდან, ასევე O&M, ტექნიკური და სამართლებრივი მხარდაჭერა;
• Shine Energy Tech: სერვისები, როგორიცაა მზის პანელების წმენდა, სამშენებლო ტექნიკის გაქირავება და თერმოდრონით ინსპექცია - მათ შორის მესამე მხარის ობიექტებისთვისაც.

კომპანია აქტიურად ფართოვდება და მომავალშიც გააგრძელებს ახალი სერვისების დამატებას, რათა ენერგეტიკის სფეროში შევქმნათ სრულყოფილი, ერთიანი მომსახურების მოდელი.