„სექტორი ნამდვილად იზრდება“ - ამის შესახებ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას კომპანია HSC Group Hospitality-ის დირექტორმა, გიორგი დოლიძე განაცხადა. მისი განმარტებით, საქართველოში საერთაშორისო ბრენდული სასტუმროების რაოდენობის ზრდა მომსახურების ხარისხის გაუმჯობესებას უწყობს ხელს და ქვეყნის ტურისტულ პოტენციალს აძლიერებს.

„ეტაპობრივად, ყველა ჩართული რგოლისა და სექტორის ძალისხმევის წყალობით, წლიდან წლამდე ვცდილობთ სერვისის ხარისხის გაუმჯობესებას. ასევე, ვცდილობთ ღირსეულად დავაფასოთ ჩვენთან დასაქმებული ადამიანები და შევუქმნათ მათ შესაბამისი მოტივაცია. ეს სწორედ ის ამომავალი წერტილია, რათა ჩვენს ქვეყანაში ჩამოსულმა თითოეულმა ვიზიტორმა საქართველო ბედნიერმა და კმაყოფილმა დატოვოს.

ჩემი აზრით, ნებისმიერ რეკლამასა და მარკეტინგზე მნიშვნელოვანი ფაქტორია, როდესაც ადამიანი საკუთარ მეგობრებს, ნათესავებსა თუ ახლობლებს, თუნდაც Facebook პოსტებითა და Instagram Story-ებით, ურჩევს, რომ ეწვიონ საქართველოს და აქ დაისვენონ“, - აღნიშნა გიორგი დოლიძემ.

მისივე თქმით, ეს ძალიან გავრცელებული მეთოდია, რომელსაც, როგორც წესი, კარგი, დადებითი და სწრაფი ეფექტი აქვს.

„სექტორი ნამდვილად იზრდება. სერვისის ხარისხის გაუმჯობესებას განაპირობებს და ხელს უწყობს საერთაშორისო ბრენდული სასტუმროების რაოდენობის ყოველწლიური ზრდა. ვფიქრობ, დღეს ყველა წამყვანი საერთაშორისო ბრენდია საქართველოში წარმოდგენილი უშუალოდ თუ შვილობილი ქვებრენდების მეშვეობით. ეს ქვეყნის იმიჯს მეტ დამაჯერებლობას მატებს და სხვა წამყვან თუ მდიდრულ სასტუმრო ბრენდებსაც კი აფიქრებინებს, რომ სწორედ ახლაა ის პერიოდი, როდესაც შეუძლიათ ჩვენს ინვესტორებთან ერთად თამამი ნაბიჯი გადადგან.

საქართველოში მაღალი კატეგორიის ბრენდების შემოსვლა უმნიშვნელოვანესია, რადგან სწორედ ეს განსაზღვრავს მაღალმხარჯველუნარიანი ტურისტების მოზიდვას. შესაბამისად, ჩვენ კიდევ უფრო მეტი მაღალი კლასის ობიექტი გვჭირდება როგორც დედაქალაქში, ისე ბათუმსა თუ სხვადასხვა რეგიონში. ვფიქრობ, ჩვენი ქვეყანა ამას ნამდვილად იმსახურებს. საქართველომ უკვე აჩვენა ბრენდინგის ის შედეგები, რაზეც წეღან ვისაუბრეთ საერთაშორისო მასშტაბით გამოავლინა დიდი დაინტერესება, უსაფრთხოება, საინვესტიციო საიმედოობა და ეკონომიკური სტაბილურობა.

სწორედ ამიტომ, ქვეყანაში განსახორციელებელი მთავარი ამოცანა მსგავსი სახის აქტივობების მხარდაჭერაა. როგორც მაღალ, ისე დაბალ სეზონზე მეტი ტურისტის მოზიდვა და შემოსავლების წილის დაბალანსება ჩვენთვის არანაკლებ მნიშვნელოვანია. ასე რომ, უახლოეს მომავალს საკმაოდ ოპტიმისტურად ვუყურებ. აქამდეც არ გვაკლდა და განებივრებულები ვიყავით საერთაშორისო ბრენდების შემოსვლით, ბოლო წლებში კი ეს მაჩვენებელი ერთი-ორად გაიზარდა“, - განაცხადა დოლიძემ.

HSC Group Hospitality-ის დირექტორმა გიორგი დოლიძემ აღნიშნა, რომ სასტუმროების რაოდენობის ზრდა საქართველოში ტურისტებისთვის განთავსების უფრო მრავალფეროვან არჩევანს ქმნის და მომსახურების ხარისხის გაუმჯობესებას უწყობს ხელს. მისი თქმით, საერთაშორისო ბრენდების შემოსვლა სექტორში ახალ სტანდარტებს ამკვიდრებს და პერსონალის კვალიფიკაციის ამაღლებას უწყობს ხელს.

„თავისთავად, ეს გარკვეულ კონკურენციასაც ქმნის, თუმცა მოთხოვნა-მიწოდების პრინციპები ყოველთვის 100 პროცენტით დაბალანსებული ვერ იქნება. სწორედ ამიტომ, შესაძლოა ერთ ან ორ წელიწადში რამდენიმე მშენებლობა ერთდროულად დასრულდეს და ბევრი ობიექტი ერთბაშად გაიხსნას, შემდეგ კი ახალ მშენებლობებს დაველოდოთ. საბოლოო ჯამში, ეს საშუალებას გვაძლევს, ჩამოსულ ტურისტებსა და დამსვენებლებს კიდევ უფრო მრავალფეროვანი განთავსების ობიექტები შევთავაზოთ.

რა თქმა უნდა, ამ პროცესს მხოლოდ ინფრასტრუქტურული მნიშვნელობა არ აქვს ის ქვეყანაში სერვისის დონესაც ზრდის. გარდა ადგილობრივი, შიდა რესურსით ჩატარებული ტრენინგებისა, ბრენდული სასტუმროს გახსნისას პროცესში უშუალოდ ბრენდის წარმომადგენლები ერთვებიან. ისინი თავად უზრუნველყოფენ პერსონალის მომზადებას, სტანდარტების დანერგვასა და შემდგომ მონიტორინგს, რაც, ვფიქრობ, ძალიან მისასალმებელია“, - განაცხადა დოლიძემ.