„ოჯახური“ საერთაშორისო გაფართოებას აგრძელებს. კომპანიის პროდუქცია უკვე ხელმისაწვდომია ფილადელფიაში, უახლოეს პერიოდში კი ნიუ-იორკშიც იქნება წარმოდგენილი.

რა მნიშვნელობა აქვს „ოჯახურისთვის“ აშშ-ის ბაზარზე შესვლას, რომელი პროდუქტებია უკვე ხელმისაწვდომი ამერიკელი მომხმარებლებისთვის და რა გეგმები აქვს კომპანიას საერთაშორისო გაფართოების მიმართულებით, ამის შესახებ Business Insider Georgia-ს „ოჯახურის“ მარკეტინგის მენეჯერი ქეთი ბარნაბიშვილი ესაუბრა.

ბოლო პერიოდში „ოჯახურმა“ მნიშვნელოვანი სიახლე გააზიარა და ამერიკის შეერთებული შტატების ბაზარზეც შევიდა. რას ნიშნავს ეს ნაბიჯი კომპანიისთვის და რამდენად რთული იყო ამ ბაზარზე შესვლა?

ამერიკის შეერთებული შტატების ბაზარზე შესვლა „ოჯახურისთვის“ მნიშვნელოვანი ეტაპია. ეს არის კიდევ ერთი დასტური იმისა, რომ ქართული პროდუქციის მიმართ ინტერესი საერთაშორისო ბაზრებზე მზარდია და ადგილობრივ ბრენდებსაც აქვთ შესაძლებლობა, ღირსეულად წარდგნენ გლობალურ ბაზარზე.

ამ ეტაპზე ჩვენი პროდუქცია უკვე ხელმისაწვდომია ფილადელფიაში, ხოლო უახლოეს მომავალში ნიუ-იორკშიც იქნება წარმოდგენილი. ეს განსაკუთრებით მნიშვნელოვანია ქართველი ემიგრანტებისთვის, რომლებსაც საშუალება ექნებათ მარტივად შეიძინონ მათთვის საყვარელი ქართული სანელებლები და ტრადიციული პროდუქტები. 

რა თქმა უნდა, ამერიკის ბაზარზე შესვლა მოითხოვს მაღალ სტანდარტებთან შესაბამისობას, პარტნიორების სწორად შერჩევასა და მომხმარებლის საჭიროებების სიღრმისეულ შესწავლას. თუმცა, სწორედ ეს პროცესი გვაძლევს შესაძლებლობას, კიდევ უფრო განვავითაროთ ბრენდი და გავაძლიეროთ „ოჯახურის“ საერთაშორისო პოზიციები.

რომელი პროდუქტებია უკვე ხელმისაწვდომი ამერიკის ბაზარზე და როგორ შეარჩიეთ ის ასორტიმენტი, რომელიც უცხოელ მომხმარებელს შესთავაზეთ?

ამერიკის ბაზარზე წარმოდგენილია ის პროდუქტები, რომლებიც ყველაზე მეტად ასოცირდება ქართულ კულინარიულ ტრადიციებთან და სტაბილურად მაღალი მოთხოვნით სარგებლობს როგორც ადგილობრივ, ისე უცხოელ მომხმარებლებში.

ასორტიმენტი მოიცავს სხვადასხვა სახეობის სანელებლებს, მზა საკმაზებსა და ტრადიციულ ქართულ პროდუქტებს. განსაკუთრებული ყურადღება დაეთმო ისეთ პროდუქციას, რომლებიც მომხმარებელს ყოველდღიურ მომზადებას უმარტივებს და ავთენტურ ქართულ გემოს ინარჩუნებს.

ასორტიმენტის შერჩევისას გავითვალისწინეთ როგორც ქართველი ემიგრანტების მოთხოვნები, ისე უცხოელი მომხმარებლების მზარდი ინტერესი ქართული სამზარეულოს მიმართ. ჩვენი მიზანია, საერთაშორისო ბაზრებს შევთავაზოთ პროდუქცია, რომელიც ხარისხით, ბუნებრივი შემადგენლობითა და ავთენტური გემოთი გამოირჩევა.

როგორ აფასებთ მოთხოვნას როგორც ადგილობრივ, ისე საერთაშორისო ბაზრებზე? რომელ პროდუქტებზე ფიქსირდება ყველაზე მაღალი ინტერესი?

ბოლო წლებში მოთხოვნა როგორც ადგილობრივ, ისე საერთაშორისო ბაზრებზე სტაბილურად იზრდება. მომხმარებლები სულ უფრო მეტად ანიჭებენ უპირატესობას ხარისხიან, ბუნებრივი ინგრედიენტებით დამზადებულ პროდუქტებს და იმ გადაწყვეტებს, რომლებიც სამზარეულოში დროს ზოგავს.

განსაკუთრებული პოპულარობით სარგებლობს მზა საკმაზების ხაზი, რომელიც სხვადასხვა კერძისთვის სპეციალურად დაბალანსებულ სანელებლებს აერთიანებს. ასევე, მაღალი მოთხოვნაა ტრადიციულ ქართულ სანელებლებზე, როგორიცაა სვანური მარილი, ხმელი სუნელი, უცხო სუნელი, აჯიკა და სხვადასხვა სახეობის სანელებლები. 

საერთაშორისო ბაზრებზე განსაკუთრებით საინტერესოა ის პროდუქტები, რომლებიც ქართულ კულინარიულ იდენტობას წარმოაჩენს და მომხმარებელს ავთენტური გემოს გამოცდილებას სთავაზობს.

სამომავლოდ, გეგმავთ თუ არა ექსპორტის კიდევ უფრო გაფართოებას და ახალი საერთაშორისო ბაზრების ათვისებას? 

ექსპორტის განვითარება „ოჯახურის“ ერთ-ერთი მთავარი სტრატეგიული მიმართულებაა. ჩვენი მიზანია, ეტაპობრივად გავაძლიეროთ პოზიციები უკვე არსებულ ლოკაციებზე და პარალელურად შევიდეთ ახალ საერთაშორისო ბაზრებზეც.

ამერიკის ბაზარზე შესვლა მხოლოდ დასაწყისია. აქტიურად ვმუშაობთ ახალი პარტნიორების მოძიებაზე და სხვადასხვა ქვეყნის დისტრიბუტორებთან თანამშრომლობის გაფართოებაზე. განსაკუთრებულ ყურადღებას ვუთმობთ ევროპისა და ჩრდილოეთ ამერიკის ბაზრებს, სადაც ქართული პროდუქციის მიმართ ინტერესი ყოველწლიურად იზრდება.

ჩვენი ხედვაა, რომ „ოჯახური“ გახდეს საერთაშორისო მასშტაბით აღიარებული ქართული ბრენდი, რომელიც მსოფლიოს სხვადასხვა ქვეყანაში მომხმარებლებს ხარისხიან, ავთენტურ და თანამედროვე მოთხოვნებზე მორგებულ ქართულ პროდუქტებს შესთავაზებს.

და ბოლოს, დავამატებ ჩვენთვის ექსპორტი მხოლოდ პროდუქციის გატანას არ ნიშნავს, ეს არის ქართული გემოს, კულინარიული კულტურისა და ადგილობრივი წარმოების საერთაშორისო ბაზრებზე ღირსეული წარმოჩენა.