სებ-მა საჯარო ფასიანი ქაღალდების ემიტენტი - სს „საქორგგაზი“ 10 000 ლარით დააჯარიმა, აღნიშნულის შესახებ საქართველოს ეროვნული ბანკის მიერ ვებ-გვერდზე გამოქვეყნებული ინფორმაციიდან ხდება ცნობილი.

საქართველოს ეროვნულმა ბანკმა საჯარო ფასიანი ქაღალდების ემიტენტი - სს „საქორგგაზი“ (ს/ნ: 208147637) „პირების და მათი მმართველი ორგანოს წევრების მიმართ, ფასიანი ქაღალდების კანონმდებლობის, „ბუღალტრული აღრიცხვის, ანგარიშგებისა და აუდიტის შესახებ“ საქართველოს კანონის, „ნებაყოფლობითი კერძო პენსიის შესახებ“ საქართველოს კანონისა და „ფულის გათეთრებისა და ტერორიზმის დაფინანსების აღკვეთის ხელშეწყობის შესახებ“ საქართველოს კანონმდებლობის დარღვევისთვის, ფულადი ჯარიმის ოდენობის განსაზღვრის, დაკისრების და აღსრულების წესის დამტკიცების შესახებ“ საქართველოს ეროვნული ბანკის პრეზიდენტის 2012 წლის 14 თებერვლის №35/04 ბრძანებით დამტკიცებული წესის მე-3 მუხლის მე-3 პუნქტის „დ“ ქვეპუნქტის საფუძველზე, 10 000 (ათი ათასი) ლარით დააჯარიმა.

,,აღნიშნული სანქცია გამოიცა „ფასიანი ქაღალდების ბაზრის შესახებ“ საქართველოს კანონის მე-11 მუხლის პირველი და მე-5 პუნქტებით, ასევე, „ემიტენტის შესახებ ინფორმაციის გამჭვირვალობისა და ემიტენტისათვის ფასიანი ქაღალდების რეგისტრატორის დანიშვნის წესის დამტკიცების თაობაზე“ საქართველოს ეროვნული ბანკის პრეზიდენტის 2020 წლის 7 ოქტომბრის №181/04 ბრძანებით დამტკიცებული წესის მე-3 მუხლის პირველი და მე-6 პუნქტებით და მე-10 მუხლის მე-2 პუნქტით გათვალისწინებული მოთხოვნების დარღვევისთვის", - აღნიშნულია საქართველოს ეროვნული ბანკის მიერ გამოქვეყნებულ ინფორმაციაში.

ცნობისთვის, აზერბაიჯანის რესპუბლიკის სახელმწიფო ნავთობკომპანია (SOCAR), საქართველოს ნავთობისა და ბუნებრივი გაზის სექტორში 2006 წლიდან საქმიანობს.

საქართველოში, კომპანია „SOCAR"-ის აფილირებული კომპანიები გაზის სექტორში შპს „სოკარ ჯორჯია გაზი", სს „სოკარ ჯორჯია გაზ დისტრიბუშენი" და სს „საქორგგაზი" არიან, შემდგომში ერთობლივად წოდებული - „სოკარ გაზი”-ს ჯგუფი. სს "საქორგგაზი" ეწევა გაზის მიწოდებისა და განაწილების საქმიანობას.

სს „საქორგგაზი" მომხმარებლებზე ბუნებრივი გაზის განაწილებას უზრუნველყოფს. ასევე კომპანია ახორციელებს ბუნებრივი გაზის გამანაწილებელი ქსელის მშენებლობას, რეაბილიტაციასა და ექსპლუატაციას, მათ შორის კაპიტალურ და საექსპლუატაციო სამუშაოებს, აღრიცხვის კვანძების მოწესრიგებასა და ახალი უბნების გაზიფიცირებას.

კომპანია  სააქციო საზოგადოებად სს „საქორგგაზი" რეგისტრირებულ იქნა 1996 წელს. კომპანიის ძირითად საქმიანობას საქართველოს ქალაქებისა და  სოფლების გაზიფიცირება წარმოადგენდა. განვლილი პერიოდის განმავლობაში, კომპანიამ ასობით დასახლებული პუნქტის გაზიფიცირება განახორციელა და გაზის მილსადენის სისტემებზე, პირველად საქართველოში, გაზის გამანაწილებელი ავტომატური სადგურები დაამონტაჟა.

2013 წლის დეკემბერში განხორციელდა სს „საქორგგაზი"-ს რეორგანიზაცია, რომლის საფუძველზეც კომპანიას შეერწყა 10 განაწილების ლიცენზიის მქონე (გაზის  სადისტრიბუციო) კომპანია. ამჟამად სს „საქორგგაზი" ერთ-ერთი მსხვილი ბუნებრივი გაზის განაწილების ლიცენზიანტია საქართველოში. დღეისათვის, კომპანია, მთელი საქართველოს მასშტაბით, 295 000-ზე მეტ აბონენტს ემსახურება.

სს „საქორგგაზი" 2014 წლიდან ფლობს ხარისხის სერტიფიკატს ISO 9001:2008, 2017 წელს კი კომპანიამ გაიარა რესერტიფიკაცია ახალი სტანდარტით და მიიღო ხარისხის მართვის სერტიფიკატი ISO 9001:2015.