Georgia Capital-მა 2026 წლის მესამე კვარტლისა და პირველი ცხრა თვის ფინანსური შედეგები გამოაქვეყნა. კომპანიის მიერ წარმოდგენილი ანგარიშის თანახმად, საანგარიშო პერიოდში დადებითი დინამიკა დაფიქსირდა როგორც საინვესტიციო პორტფელის ღირებულების ზრდის, ისე პორტფელში შემავალი კომპანიების საოპერაციო საქმიანობის მიმართულებით. ფინანსური შედეგების პარალელურად, კომპანიამ ასევე წარმოადგინა ინფორმაცია კაპიტალის მართვის, მიმდინარე საინვესტიციო გეგმებისა და სამომავლო განვითარების პრიორიტეტების შესახებ.

,,ჩვენი სტრატეგიული პრიორიტეტების თანმიმდევრული განხორციელება კვლავ განაპირობებს ძლიერ კვარტალურ ფინანსურ შედეგებს, საოპერაციო ეფექტიანობასა და აქციონერებისთვის ღირებულების მდგრად ზრდას. 2026 წლის მესამე კვარტალში ერთ აქციაზე წმინდა აქტივების ღირებულებამ (NAV per share) ახალ რეკორდულ მაჩვენებელს 198.91 ლარს (57.69 გირვანქა სტერლინგს) მიაღწია, რაც წინა კვარტალთან შედარებით 13.6%-იან, ხოლო წლის დასაწყისიდან 28.6%-იან ზრდას წარმოადგენს.

აღნიშნული შედეგი ასახავს კომპანიის ყველა ძირითადი ბიზნესის გამორჩეულ საოპერაციო საქმიანობას და კიდევ ერთხელ ადასტურებს GCAP-ის გრძელვადიან პოტენციალს აქციონერებისთვის ღირებულების შექმნისა და ზრდის მიმართულებით. 2026 წლის მესამე კვარტალში კერძო საინვესტიციო პორტფელში შემავალმა მსხვილმა კომპანიებმა კიდევ ერთხელ დაადასტურეს თავიანთ სექტორებში წამყვანი პოზიციები და ძლიერი საოპერაციო შედეგები აჩვენეს”, - აღნიშნავს ირაკლი გილაური, GCAP-ის დირექტორთა საბჭოს თავმჯდომარე და გენერალური დირექტორი.

მისი ინფორმაციით, 2026 წლის მესამე კვარტალში სააფთიაქო ბიზნესმა გამორჩეულად ძლიერი საოპერაციო შედეგები აჩვენა.

საცალო გაყიდვებიდან მიღებული შემოსავლები წლიურ ჭრილში 15.7%-ით გაიზარდა, რაც წარმატებული გაყიდვების ინიციატივებით იყო განპირობებული. შედეგებზე დადებითი გავლენა მოახდინა ახლად გახსნილი აფთიაქების საქმიანობის გაფართოებამაც. კერძოდ, 2026 წლის მესამე კვარტალში დამატებით 12 ახალი აფთიაქი გაიხსნა.

2026 წლის მესამე კვარტალში სომხეთში მიღებული მთლიანი შემოსავლები წლიურ ჭრილში 42.1%-ით გაიზარდა.

აღნიშნულ ზრდას ხელი შეუწყო სააფთიაქო ქსელის გაფართოებამ და საცალო ბრენდის პოზიციების გაძლიერებამ, ასევე საბითუმო მიმართულებით პროდუქციის ასორტიმენტის ზრდამ და სახელმწიფო ტენდერებიდან მიღებული შემოსავლების მატებამ.

,,2026 წლის მესამე კვარტალში ჯანდაცვის მომსახურების ბიზნესის მთლიანი შემოსავლები წლიურ ჭრილში 15.9%-ით გაიზარდა, რაც ყველა სეგმენტში დაფიქსირებულ ძლიერ შედეგებს ასახავს. 2026 წლის მესამე კვარტალში სადაზღვევო ბიზნესმა გამორჩეულად ძლიერი შედეგები აჩვენა, რასაც ხელი შეუწყო დადებითმა დინამიკამ როგორც ქონებისა და პასუხისმგებლობის დაზღვევის (P&C), ისე სამედიცინო დაზღვევის მიმართულებით.

ქონებისა და პასუხისმგებლობის დაზღვევიდან მიღებული შემოსავლები წლიურ ჭრილში 11.9%-ით გაიზარდა. ზრდა ძირითადად ავტოდაზღვევის, ქონების დაზღვევისა და საკრედიტო სიცოცხლის დაზღვევის მიმართულებებმა განაპირობა.

ამავდროულად, სამედიცინო დაზღვევიდან მიღებული შემოსავლები წლიურ ჭრილში 48.1%-ით გაიზარდა, რაც ახალი ტენდერების მოგებამ, კორპორაციული და საცალო პორტფელების ორგანულმა ზრდამ და სადაზღვევო პოლისების ფასების ორნიშნა პროცენტულმა მატებამ განაპირობა”, - აცხადებს ირაკლი გილაური.

მისივე ინფორმაციით, ჯანდაცვის მომსახურების ბიზნესი საქმიანობის გაფართოებასა და გრძელვადიანი ზრდისთვის საბაზრო პოზიციების გაძლიერებას გეგმავს. მომდევნო ორი-სამი წლის განმავლობაში ჯანდაცვის მომსახურების ბიზნესი დაახლოებით 53 მილიონი ლარის მოცულობის კაპიტალური ინვესტიციების განხორციელებას გეგმავს. ინვესტიციების მიზანია ბიზნესის გაფართოება და შემდგომი ზრდის ხელშეწყობა მაღალი მოთხოვნის მქონე, პაციენტების მიერ უშუალოდ დაფინანსებული სპეციალიზებული სამედიცინო მომსახურების, ამბულატორიული სერვისებისა და სამედიცინო ვიზუალიზაციის დიაგნოსტიკური შესაძლებლობების განვითარების მიმართულებით.

,,GCAP-ის საინვესტიციო პორტფელის გამორჩეული შედეგები, ძლიერი ფინანსური მდგომარეობა, მნიშვნელოვნად შემცირებული რისკების მქონე ბალანსი და კაპიტალის განაწილების დისციპლინირებული მიდგომა ადასტურებს ჩვენს შესაძლებლობას, სტრატეგიული პრიორიტეტების განხორციელება აქციონერებისთვის გრძელვადიანი და მდგრადი ღირებულების შექმნაში ავსახოთ.

მომავლის გათვალისწინებით, დარწმუნებული ვარ, რომ საქართველოს ეკონომიკური ზრდის ხელსაყრელი პერსპექტივების მხარდაჭერით, GCAP-ს აქვს მყარი საფუძველი, საშუალო და გრძელვადიან პერიოდში შეინარჩუნოს ერთ აქციაზე წმინდა აქტივების ღირებულების (NAV) ზრდა.

ჩვენი 1 მილიარდი ლარის მოცულობის კაპიტალის განაწილების პროგრამა კიდევ უფრო აძლიერებს ამ მიზნისადმი ჩვენს ერთგულებას. პროგრამა ითვალისწინებს ბალანსის დაცვას საქართველოსა და სომხეთში მიმზიდველი საინვესტიციო შესაძლებლობების გამოყენებასა და აქციონერებისთვის უკუგების უზრუნველყოფას შორის, ჩვენი გრძელვადიანი სტრატეგიული პრიორიტეტების თანმიმდევრული განხორციელების პარალელურად”, - აცხადებს ირაკლი გილაური.