Petite Ellie საქართველოში ბუნებრივი და ეკომეგობრული საბავშვო ტანსაცმლისა და აქსესუარების ევროპულ ბრენდებს აერთიანებს. კომპანიის საქმიანობასა და სამომავლო გეგმებზე Business Insider Georgia-ს Petite Ellie-ის დამფუძნებელი და აღმასრულებელი დირექტორი, სალომე კერესელიძე ესაუბრა.

თქვენი კომპანია მომხმარებელს დიდი ბრიტანეთისა და ევროპის ბუნებრივი და ეკომეგობრული საბავშვო ტანსაცმლისა და აქსესუარების ფართო არჩევანს სთავაზობს. როგორ შეარჩიეთ სწორედ ეს მიმართულება და რა გამოარჩევს თქვენს ასორტიმენტს?

Petite Ellie 2022 წელს დავაფუძნე ერთი მიზნის გამო - საქართველოში მშობლებისთვის შემეთავაზებინა პრემიუმ ხარისხის, დახვეწილი დიზაინისა და უსაფრთხო მასალების მქონე საბავშვო პროდუქცია. ჩვენთვის მნიშვნელოვანია არამხოლოდ ვიზუალი, არამედ თითოეული ნივთის ხარისხი, კომფორტი და გამძლეობა. სწორედ ამიტომ ვთანამშრომლობთ ევროპულ ბრენდებთან, რომლებიც ამ ღირებულებებს იზიარებენ. ჩვენი ასორტიმენტი გამოირჩევა კლასიკური სტილით, ხარისხიანი ქსოვილებითა და იმ ბრენდებით, რომლებიც საქართველოში ექსკლუზიურად ან ძალიან შეზღუდულად არის წარმოდგენილი.

რა კრიტერიუმებით არჩევთ ბრენდებს, რომლებთანაც თანამშრომლობთ და რამდენად მნიშვნელოვანია თქვენთვის პროდუქციის ეკოლოგიურობა და ბუნებრივი მასალები?

ბრენდის შერჩევისას პირველ რიგში ვაფასებთ ხარისხს, მასალებს, დიზაინს და ბრენდის რეპუტაციას. ჩვენთვის მნიშვნელოვანია, რომ პროდუქტი იყოს უსაფრთხო ბავშვის კანისთვის, კომფორტული ყოველდღიური გამოყენებისთვის და შექმნილი მაღალი სტანდარტებით. ასევე, დიდ ყურადღებას ვაქცევთ იმ ბრენდებს, რომლებიც პასუხისმგებლიან წარმოებასა და ბუნებრივი მასალების გამოყენებას ანიჭებენ უპირატესობას.

რამდენად იზრდება საქართველოში მოთხოვნა ბუნებრივი და ეკომეგობრული საბავშვო პროდუქციის მიმართ? როგორ შეიცვალა მომხმარებლის არჩევანი ბოლო წლებში?

ბოლო წლებში მომხმარებელი ბევრად უფრო ინფორმირებული გახდა. თუ ადრე არჩევანი ხშირად მხოლოდ დიზაინზე კეთდებოდა, დღეს მშობლები ინტერესდებიან ქსოვილის შემადგენლობით, წარმოების ხარისხითა და ბრენდის ისტორიით. იზრდება მოთხოვნა ხარისხიან, გამძლე და უსაფრთხო პროდუქციაზე, რაც გვაძლევს იმის რწმენას, რომ პრემიუმ საბავშვო სეგმენტი საქართველოში სტაბილურად ვითარდება.

რომელი კატეგორიის პროდუქციაა დღეს ყველაზე მოთხოვნადი და რა ტენდენციებს აკვირდებით საბავშვო ტანსაცმლის ბაზარზე?

ყველაზე დიდი მოთხოვნა კლასიკურ სამოსს, ახალშობილთა კოლექციებსა და ხარისხიან აქსესუარებზეა. ასევე ვხედავთ, რომ მშობლები სულ უფრო მეტად აფასებენ უნივერსალურ ფერებს, ბუნებრივ მასალებსა და ისეთ ნივთებს, რომლებიც რამდენიმე სეზონის განმავლობაში ინარჩუნებს ხარისხსა და იერს.

რა გეგმები გაქვთ კომპანიის შემდგომი განვითარებისთვის – აპირებთ თუ არა ახალი ბრენდების დამატებას, ასორტიმენტის გაფართოებას ან ახალი სერვისების დანერგვას?

ერთ-ერთი მნიშვნელოვანი ნაბიჯი Petite Ellie-ს განვითარებაში ჩვენი ონლაინ მაღაზიის ამოქმედება იყო. ვებგვერდის საშუალებით მომხმარებლებს შოპინგი ბევრად უფრო მარტივად და კომფორტულად შეუძლიათ. ჩვენ მუდმივად ვმუშაობთ ახალი პრემიუმ ევროპული ბრენდების მოძიებასა და საქართველოში წარმოდგენაზე. ჩვენი მიზანია Petite Ellie გახდეს ადგილი, სადაც მშობლები ერთ სივრცეში იპოვიან ხარისხიან, დახვეწილ და სანდო საბავშვო პროდუქციას. პარალელურად, მუდმივად ვმუშაობთ ასორტიმენტის განახლებაზე, ევროპიდან ახალი პრემიუმ ბრენდებისა და უნიკალური პროდუქციის შერჩევასა და დამატებაზე, რათა ჩვენს მომხმარებლებს ყოველთვის საუკეთესო არჩევანი შევთავაზოთ.

ინფორმაციისთვის, Petite Ellie-ის შოურუმი თბილისში, ირაკლი აბაშიძის N24-ში მდებარეობს.