Porsche-მ Macan-ისთვის ახალი, გაუმჯობესებული პაკეტი წარადგინა, რაც გულისხმობს, რომ კომპანია სტანდარტულ აღჭურვილობას აფართოებს. სპორტული ავტომობილების მწარმოებელმა სრულად ელექტრო SUV-ისთვის განსაკუთრებით მოთხოვნადი დამატებითი აღჭურვილობის კომპონენტები ახალ პაკეტში გააერთიანა.

Porsche-მ ელექტრო Macan-ისთვის ყველაზე პოპულარული დამატებითი ოფციების შერჩეული კომპლექტი ახალ Advanced Package-ში გააერთიანა. პაკეტი ხელმისაწვდომია Macan, Macan 4 და Macan 4S მოდელებისთვის და მოიცავს პანორამულ სახურავს, Matrix LED ფარებს, ავტომატურად დაბურვად შიდა და გარე სარკეებსა და ავტომობილის ექსტერიერის ფერს „Shades“ ან „Contrasts“ ფერთა პალიტრიდან.

ინტერიერისთვის Advanced Package მოიცავს ელექტრონულად რეგულირებად 14-პოზიციან Comfort სავარძლებს, შავი ფერის Leather Package-სა და Bose® Surround Sound აუდიოსისტემას. ძრავისა და სავალი ნაწილის მიმართულებით პაკეტში შედის Power Steering Plus, ასევე ადაპტური პნევმატური საკიდარი დონის ავტომატური რეგულირებისა და სიმაღლის ცვლილების ფუნქციით, Porsche Active Suspension Management-ის (PASM) ჩათვლით.

ახალი მოდელური წლის დაწყებიდან სრულად ელექტრო SUV-ის სტანდარტულ კომპლექტაციაში უკვე შედის კომფორტისა და მძღოლის დახმარების დამატებითი ფუნქციები.

ადაპტური კრუიზ-კონტროლის გარდა, სტანდარტულ აღჭურვილობაში შედის Automated Parking 2D Surround View-ით, რომელიც ავტომატურად ამოიცნობს ავტომობილის წინ და მის გვერდით არსებულ საპარკინგე ადგილებს. სისტემა ასევე ავტომატურად რთავს მოხვევის მაჩვენებელს და თავად ასრულებს პარკირების მანევრს როგორც პარალელური, ისე პერპენდიკულარული პარკირებისას, ასევე პარალელური პარკირების ადგილიდან გამოსვლისას.

პარკირების სხვა ფუნქციები, მათ შორის Remote Park Assist, რომელიც, სხვა შესაძლებლობებთან ერთად, სმარტფონის საშუალებით პარკირების მანევრის მართვის საშუალებას იძლევა, დამატებითი ოფციის სახით არის ხელმისაწვდომი.

ამასთან, Macan-ში სმარტფონის დამუხტვა ახლა გაცილებით სწრაფად არის შესაძლებელი. ცენტრალურ კონსოლში განთავსებული სპეციალური სათავსო, რომელიც უსადენო დამტენით არის აღჭურვილი, 25 ვატამდე დამუხტვის სიმძლავრეს უზრუნველყოფს, მაშინ როცა აქამდე მისი სიმძლავრე 15 ვატი იყო.