Agritouch აგროტექნოლოგიური კომპანიაა, რომელიც ფერმერებს თანამედროვე აგრონომიულ მომსახურებასა და ინოვაციურ ტექნოლოგიურ გადაწყვეტილებებს სთავაზობს. მიმდინარე აგროსეზონის შედეგებზე, ექსპორტის ტენდენციებსა და კომპანიის სამომავლო გეგმებზე Business Insider Georgia-ს Agritouch-ის დამფუძნებელი, ეკა ვეფხვაძე ესაუბრა.

როგორ აფასებთ წლევანდელ აგროსეზონს, როგორია მოსავლიანობა?

წლევანდელი სეზონი ხარისხის თვალსაზრისით საკმაოდ წარმატებულია, თუმცა კომერციული თვალსაზრისით გარკვეული გამოწვევები გამოიკვეთა. დასავლეთ საქართველოში ამინდის არასტაბილურობამ გარკვეულ რეგიონებში გავლენა მოახდინა მოსავლიანობაზე, თუმცა იმ მეურნეობებში, სადაც თანამედროვე აგროტექნოლოგიები და სწორი აგრონომიული მართვა გამოიყენებოდა, მოსავალი და ხარისხი საკმაოდ კარგია.

მთავარი გამოწვევა წელს მოსავალი კი არა, რეალიზაცია და ბაზრის არასტაბილურობა გახდა. ბოლო დღეებში ბევრი საუბარი იყო ფასების ვარდნასა და ფერმერების პრობლემებზე, თუმცა ეს ერთჯერადი მოვლენა არ არის, მსგავსი სიტუაცია თითქმის ყოველ სეზონზე მეორდება.

როგორია დღეს ქართული აგროპროდუქციის მიმართ მოთხოვნა როგორც ადგილობრივ, ისე საერთაშორისო ბაზრებზე?

ქართული აგროპროდუქციის, განსაკუთრებით კი ქართული მოცვის მიმართ, საერთაშორისო მოთხოვნა კვლავ მაღალია. საქართველო უკვე ჩამოყალიბდა, როგორც მაღალი ხარისხის მოცვის მწარმოებელი ქვეყანა და ჩვენი პროდუქცია წარმატებით უწევს კონკურენციას მსოფლიოს მრავალ ბაზარზე არსებულ პროდუქციას.

თუმცა, პრობლემა მოთხოვნის ნაკლებობა არ არის. პრობლემა ის არის, რომ ჩვენი ექსპორტის დიდი ნაწილი კვლავ ერთ ბაზარზეა დამოკიდებული. როდესაც ექსპორტის დაახლოებით 80% ერთ მიმართულებაზე მოდის, ნებისმიერი ცვლილება ამ ბაზარზე ავტომატურად აისახება ქართველ ფერმერებზე.

როგორ აფასებთ ექსპორტის მიმდინარე მდგომარეობას? რომელ ბაზრებზეა ყველაზე მაღალი მოთხოვნა ქართულ აგროპროდუქციაზე?

ექსპორტის მიმართულებით საქართველოს დიდი პოტენციალი აქვს, თუმცა დღესაც მნიშვნელოვნად ვართ დამოკიდებული რუსეთის ბაზარზე და ხშირ შემთხვევაში არა უშუალოდ რუსულ ქსელებზე, არამედ შუამავლებზე, რომლებიც საქართველოში ყიდულობენ პროდუქტს.

ყოველ წელს ერთი და იგივე სურათი მეორდება - სეზონის დასაწყისში შესყიდვები მიმდინარეობს მაღალი, ხშირად სპეკულაციური ფასებით, ხოლო როდესაც მოსავლის პიკი იწყება, შესყიდვები მნიშვნელოვნად მცირდება. სწორედ ამ დროს იწყება ფასების მკვეთრი ვარდნა.

წლევანდელ სეზონზე ამას რამდენიმე დამატებითი ფაქტორიც დაემატა: რუსეთში შემცირდა სეზონური მოხმარება, მათ შორის საკურორტო რეგიონებში; უსაფრთხოების მდგომარეობამ გავლენა მოახდინა მომხმარებელთა აქტივობაზე; კონკურენცია გაიზარდა სერბული მოცვის დიდი მოცულობით შესვლის გამო; ხოლო იმპორტთან დაკავშირებული სხვადასხვა არაპირდაპირი ხარჯებიც საბოლოო ფასზე ახდენს გავლენას.

ამავე დროს, საქართველოს აქვს რეალური შესაძლებლობა მნიშვნელოვნად გაზარდოს ექსპორტი ევროკავშირის ქვეყნებში, ახლო აღმოსავლეთში მათ შორის არაბთა გაერთიანებულ საამიროებში, საუდის არაბეთში, ყატარში, ომანსა და ისრაელში, სადაც ქართული მაღალი ხარისხის პროდუქციის მიმართ ინტერესი ყოველწლიურად იზრდება.

როგორია კომპანიის სამომავლო გეგმები? გეგმავთ თუ არა ახალი ტექნოლოგიების დანერგვას, სერვისების გაფართოებას ან საერთაშორისო პარტნიორობების განვითარებას?

AgriTouch-ის მთავარი მიზანია ქართული სოფლის მეურნეობის კონკურენტუნარიანობის გაზრდა საერთაშორისო ბაზარზე.

აქტიურად ვმუშაობთ ხელოვნურ ინტელექტზე დაფუძნებული ტექნოლოგიების დანერგვაზე, ციფრულ მონიტორინგზე, ზუსტი სოფლის მეურნეობის განვითარებასა და თანამედროვე აგრონომიული გადაწყვეტილებების გამოყენებაზე, რაც ფერმერებს ეხმარება ხარისხისა და ეფექტიანობის გაზრდაში.

პარალელურად ვაფართოებთ საერთაშორისო პარტნიორობებს ევროპაში, ახლო აღმოსავლეთსა და აზიაში, რადგან მიგვაჩნია, რომ ქართული სოფლის მეურნეობის მომავალი პირდაპირ უკავშირდება საექსპორტო ბაზრების დივერსიფიკაციას. ჩვენი მიზანია, ქართველ ფერმერებს ჰქონდეთ მეტი ბაზარი, მეტი სტაბილურობა და ნაკლები დამოკიდებულება ერთ კონკრეტულ ქვეყანაზე. სწორედ ეს შექმნის გრძელვადიან და მდგრად განვითარებას როგორც ფერმერებისთვის, ისე მთლიანად ქართული აგროსექტორისთვის.