ქართული ფაგების საერთაშორისო ბაზრებზე გასატანად ათამდე პოტენციურ პარტნიორთან ვაგრძელებთ კომუნიკაციას - ამის შესახებ, „ბიოქიმფარმის“ გენერალურმა მენეჯერმა, რატი ღოლიჯაშვილმა ტელეკომპანია „მაესტროს“ ეთერში გადაცემა Business Insider Georgia-ში სტუმრობისას განაცხადა.

„ერთ-ერთი მნიშვნელოვანი მე ვახსენე წინასწარი შეხვედრები მსგავს ღონისძიებებზე და კიდევ ერთხელ ხაზს გავუსვამ, რომ მსგავსი ინსტრუმენტები, გამოფენები, რომლებიც ასევე სხვადასხვა ინსტრუმენტებით მხარდაჭერილია, იგივე „აწარმოე საქართველოს“ ნაწილში, Trade with Georgia-ს ნაწილში, არის ძალიან მნიშვნელოვანი და ჩვენ კარგად გავაანალიზეთ, რამდენად მნიშვნელოვანი ინსტრუმენტია კომპანიის ინტერნაციონალიზაციის და საექსპორტო არეალის ზრდის თვალსაზრისით და აუცილებლად ჩვენ მომავალშიც მივიღებთ ამ ყველაფერში მონაწილეობას.

თუმცა ბევრი მოსამზადებელი სამუშაო არის ამ ყველაფრისთვის. იმისთვის, რომ შედეგი მიგვეღო, ამ ყველაფრისთვის მნიშვნელოვანი იყო წინასწარი მომზადება და კონტექსტი. კონტექსტში ვგულისხმობ, მაგალითად, საერთაშორისო სტანდარტებს. ჩვენი ინტერესი, ერთის მხრივ, ფაგები ძალიან საინტერესო არის და უნიკალური ტექნოლოგიაა და ალტერნატივა ანტიბიოტიკების, თუმცა, თუ ის არ იქნება, მაგალითად, საერთაშორისო სტანდარტით, GMP სტანდარტით ნაწარმოები, ისეთი ინტერესი შეიძლება იყოს, მაგრამ შესაძლებლობა, რომ ამ ქვეყნებში გავყიდოთ, არ გვექნებოდა.

შესაბამისად, ჩვენ მომზადებულები შევხვდით და ამ შემთხვევაში შედეგის მაქსიმალიზაცია მოვახერხეთ. მეტი ინტერესი გამოხატეს ჩვენმა პოტენციურმა პარტნიორებმა და შესაძლებლობა, რომ ჩვენ ქართული უნიკალური ფაგები დავარეგისტრიროთ, მოვიპოვოთ ავტორიზაცია პოტენციურ საექსპორტო ქვეყნებში, არის ძალიან მაღალი. ამის შესაძლებლობა და, შესაბამისად, უკვე ვაგრძელებთ რამდენიმე, არამხოლოდ რამდენიმე, ათამდე პოტენციურ პარტნიორთან კომუნიკაციას ამ საკითხთან მიმართებაში“, - აცხადებს რატი ღოლიჯაშვილი.