დავიწყეთ ახალი პროექტი - დიზაინ სტუდიო, რომელიც კედლის დეკორებს მოიცავს , - ამის შესახებ Business Insider Georgia-ს „ქართული ორნამენტის“ წარმომადგენელმა ინა სოხაძემ განუცხადა.

„დავიწყეთ ახალი პროექტი - დიზაინ სტუდიო, რომელიც კედლის დეკორებს მოიცავს. ეს არის შპალერის ალტერნატივა, თუმცა რეალურად არა შპალერი, არამედ დეკორატიული კედელი. ამ მიმართულებით ნაწილობრივ გადავინაცვლეთ ინტერიერის დიზაინშიც.

დავიწყეთ საერთაშორისო გაყიდვები ჩვენი საიტის გამოყენებით დაახლოებით ნახევარი წელია. საიტის კონცეფციას ეტაპობრივად ვცვლით - გვინდა, ის მხოლოდ გაყიდვების პლატფორმა არ იყოს და უფრო მეტად არტ პლატფორმას დაემსგავსოს.

საიტზე უკვე ქვეყნდება სხვადასხვა საინტერესო ინფორმაცია ორნამენტისა და ხელოვნების შესახებ. უახლოეს მომავალში დაემატება მცირე ონლაინ კურსები და ასევე ხელმისაწვდომი იქნება შემეცნებითი ტესტები. საერთო ჯამში, ვცდილობთ ჩვენი მუშაობა უფრო არტ-პლატფორმის მიმართულებით განვავითაროთ “, - აცხადებს ინა სოხაძე.

ბოლო პერიოდის განმავლობაში პროდუქციაზე მოთხოვნა მზარდი აღარ არის და სტაბილურ ნიშნულზეა შენარჩუნებული.

„მოთხოვნა საქართველოში ამ ეტაპზე მზარდი აღარ არის - ბოლო პერიოდში გაყიდვები და მოთხოვნა სტაბილურ ნიშნულზეა. პირველი ორი წლის განმავლობაში ზრდის ტენდენცია ფიქსირდებოდა, თუმცა ახლა უკვე იგივე დონეზეა შენარჩუნებული. ვფიქრობთ, ეს შესაძლოა განპირობებული იყოს იმით, რომ პატარა ბაზარი ვართ შესაბამისად, ჩვენი მომხმარებლის სეგმენტი უკვე კარგად არის ათვისებული.

სამომავლოდ, ასორტიმენტის გაფართოება კვლავ გეგმაში გვაქვს, განსაკუთრებით ინტერიერის მიმართულებით. გარდა ამისა, საგანმანათლებლო კუთხითაც ვმუშაობთ. ამჟამად, ვამზადებთ გამოფენას Ambavi Creators -თან ერთად, რომელიც ციფრული მიმართულებით მუშაობს. მათთან თანამშრომლობით ვქმნით გამოფენას სახელწოდებით „ორნამენტი“ “, - აღნიშნავს კომპანიის წარმომადგენელი.

ინფორმაციისთვის, პროდუქცია ადგილობრივი ნედლეულით იქმნება. „ქართული ორნამენტი“ 100%-ით ქართულია.