„ქოჩორას ვენახები“ ქართული ღვინის ბაზარზე ახალი ბრენდია, რომელიც მრავალწლიანი ოჯახური ტრადიციის გაგრძელებასა და ქართული ღვინის პოპულარიზაციას ისახავს მიზნად. მეტი ინფორმაციისთის, Business Insider Georgia კომპანიის დამფუძნებელსა და 100%-იანი წილის მფლობელს როინ ქოჩორაშვილს ესაუბრა.

როგორ შეიქმნა ღვინის ბრენდი და რა გახდა თქვენი ოჯახის ტრადიციის ბიზნესად ქცევის მთავარი მოტივაცია?

ღვინის წარმოება ჩვენი ოჯახის ტრადიციაა მრავალი წელია. მამაჩემი მეცნიერებათა დოქტორი და პროფესორი იყო მევენახეობა-მეღვინეობის მიმართულებით. გვაქვს რამდენიმე ჰექტარზე გაშენებული საკუთარი ვენახები და ყოველთვის ვაწარმოებდით საუკეთესო ღვინოს ჩვენი ოჯახისთვის, თუმცა აქამდე არ გვქონდა გადაწყვეტილი, რომ ეს საქმიანობა ბიზნესად გვექცია. საბოლოოდ, გადავწყვიტეთ, ჩვენი ოჯახის ტრადიცია გაგვეგრძელებინა და ქართული ნამდვილი ღვინის პოპულარიზაციაში ჩვენი წვლილი შეგვეტანა.

როგორია კომპანიის მიმდინარე ასორტიმენტი?

დიდი რაოდენობით ღვინო ჯერ არ ჩამოგვისხამს - სულ დაახლოებით 3 000 ბოთლი გვაქვს. ამჟამად სამი სახეობის ღვინოს ვაწარმოებთ: ჩვენი ღვინოები ახოებისა და წარაფის მიკროზონებიდანაა, ასევე დავამატეთ ქისი.

პრემიუმ სეგმენტში შევდივართ, რადგან ჩვენი ღვინოები ქვევრშია დაყენებული და გამოირჩევა განსაკუთრებული ხარისხითა და შესაბამისი შეფუთვით. ბაზარზე დაახლოებით ორი თვის წინ შევედით და ჯერ პირველ ნაბიჯებს ვდგამთ.

როგორია მომხმარებლის ინტერესი და მოთხოვნა ამ ეტაპზე?

ინტერესი არის და გარკვეული რაოდენობა უკვე გაიყიდა. საქართველოს ბაზარი ღვინით საკმაოდ გაჯერებულია, ამიტომ ვფიქრობთ, მომხმარებელს გარკვეული დრო დასჭირდება, რომ ჩვენი ღვინო დააგემოვნოს და თავად ნახოს განსხვავება ჩვენსა და სხვა ღვინოებს შორის.

რა მიმართულებით გეგმავთ ბრენდის განვითარებას და გაქვთ თუ არა საექსპორტო ბაზრებზე გასვლის გეგმები?

სამომავლოდ ვფიქრობთ, რომ ჩვენი ღვინო ევროპულ ბაზარზეც გავიტანოთ. რამდენიმე ქვეყანა უკვე შერჩეული გვაქვს და, სავარაუდოდ, ეტაპობრივად დავიწყებთ იქ ჩვენი ღვინის პოპულარიზაციასა და რეალიზაციას. გვინდა, როგორც საქართველოში, ისე ევროპის ბაზარზეც გავაგრძელოთ განვითარება.

გეგმავთ თუ არა სამომავლოდ წარმოების ზრდას და რა შესაძლებლობებს ხედავთ ამ მიმართულებით?

ამ ეტაპზე ხელშეკრულება გვაქვს გაფორმებული და გვემსახურება „კარდენახის ღვინის ქარხანა ალაზანი“, რომელიც თანამედროვე, უახლესი აღჭურვილობითაა უზრუნველყოფილი და წარმოების პროცესში ყველანაირად გვიწყობს ხელს. ამ ეტაპზე გვირჩევნია, სწორედ ამ ქარხანასთან გავაგრძელოთ თანამშრომლობა. ქარხანას აქვს იმის პოტენციალი, რომ ბაზარზე მოთხოვნის ზრდის შემთხვევაში შესაბამისი რაოდენობის ღვინო ჩამოასხას.

ამ ეტაპზე ჩვენი ძირითადი აქცენტი პრემიუმ სეგმენტში წარმოდგენილ ქვევრის ღვინოებთან ერთად შედარებით დაბალფასიანი პროდუქტის დამატებაზეა. ვხედავთ, რომ საქართველოს ბაზარზე მომხმარებელს პრემიუმ კლასის ღვინოში მაღალი თანხის გადახდა გარკვეულწილად უჭირს, ამიტომ გვინდა, უფრო ხელმისაწვდომი ალტერნატივაც შევთავაზოთ.

ამასთან, შესაბამისი იქნება შეფუთვაც, რადგან არსებული შეფუთვა საკმაოდ ძვირი ჯდება. ქვევრის ღვინის წარმოება კი, მოგეხსენებათ, საკმაოდ შრომატევადი პროცესია. წელს რამდენიმე ახალ სახეობას დავწურავთ, ხოლო მომავალი წლიდან ვგეგმავთ მათ შედარებით დაბალფასიან ბოთლსა და შეფუთვაში წარმოდგენას.