საქართველოს სასტუმრო სექტორში ფასები წლიდან წლამდე იზრდება და ხშირ შემთხვევაში საერთაშორისო ბაზრების მაჩვენებლებსაც უტოლდება, - ამის შესახებ კომპანია HSC Group Hospitality-ის დირექტორმა, გიორგი დოლიძე განაცხადა. მისი თქმით, ოთხ და ხუთვარსკვლავიანი სასტუმროების ფასები ზოგჯერ სხვა ქვეყნების ანალოგიური კლასის სასტუმროების ტარიფებსაც აჭარბებს, რაც მზარდ მოთხოვნას უკავშირდება. ამასთან, დოლიძე აღნიშნავს, რომ ქვეყნისთვის ერთ-ერთ მთავარ გამოწვევად კვლავ სერვისის განვითარება რჩება, რადგან ტურისტის გამოცდილება საბოლოოდ როგორც სასტუმროს, ისე ქვეყნის იმიჯზე აისახება.

„4 და 5 ვარსკვლავიანი სასტუმროების ფასები რომ შეგვედარებინა და ახლაც, აი, წელსაც შეგვიძლია ვცადოთ, როდესაც ივნისიდან სეზონი აქტიურ ფაზაში შევა და სატესტოდ შევადარებთ სხვადასხვა ქვეყნის დედაქალაქებისა თუ სხვა ქალაქების მაჩვენებლებს ვნახავთ, რომ ჩვენთან ფასები ხანდახან იგივეა, ხან კი აჭარბებს კიდეც მათ. იშვიათად ხდება ხოლმე, რომ იგივე კლასის ბრენდული სასტუმრო რომელიმე უცხოურ ქალაქთან შედარებით ჩვენთან ბევრად იაფი იყოს. ეს ასე არ არის  ჩვენთან ფასები ნამდვილად მზარდია წლიდან წლამდე.

ასევეა სერვისიც. ზოგადად ვიცით, რომ სერვისი განსავითარებელი გვაქვს ქვეყანაში და ამაზე კერძო სექტორის მხრიდან დიდი აქცენტი კეთდება, იმიტომ რომ ამა თუ იმ სასტუმროში მოსული სტუმარი რა შთაბეჭდილებითაც წავა, ეს ჯერ შენს სასტუმროზე, შენს ქალაქზე და, საბოლოოდ, ისევ შენს ქვეყანაზე აისახება. აქედან გამომდინარე, ყოველთვის ვცდილობთ, რომ როდესაც აქ გვყავს თანამშრომლები ან ახალ ობიექტს ვხსნით, ან უშუალოდ ჩვენს უკვე გახსნილ ობიექტში  მაქსიმალურად მეტი მოტივაცია ჰქონდეთ მათ. ვცდილობთ, დავანახოთ ჰოსპიტალითის სექტორში მუშაობის პრესტიჟულობა და მაქსიმალურად მეტი პოპულარიზაცია გავუკეთოთ ამ სფეროს, იმიტომ რომ ეს არის დარგი, სადაც ადამიანს უნდა გაუწიო ისეთი სერვისი, როგორსაც შენს სახლში მიღებულ სტუმარს გაუწევდი.

შესაბამისად, სასტუმროში მომუშავე ადამიანებმა უნდა გაითავისონ, რომ ეს მათი მეორე ოჯახია, სადაც მასპინძლობენ საერთაშორისო ბაზრიდან ჩამოსულ არაერთი ეროვნების სტუმარს. ყველა ენა მეტ-ნაკლებად უნდა გესმოდეს. ასევე, თვითონ სასტუმროს ხელმძღვანელობამ და მენეჯმენტმაც ამაზე უნდა გააკეთონ სწორება, ამის საშუალებაც უნდა ჰქონდეთ, რომ მაქსიმალურად მეტი ტრენინგი, მაქსიმალურად მეტი მოტივაცია და, ბრჭყალებში რომ ვთქვათ, ინვესტიცია ჩადონ იმ ადამიანთა გუნდში, რომლებსაც განსაკუთრებით პირდაპირი შეხება აქვთ ჩამოსულ სტუმართან“,  - აცხადებს გიორგი დოლიძე.