GTC სამშენებლო სექტორში მრავალმიმართულებიანი საქმიანობით გამოირჩევა და მომხმარებელს კომპლექსურ სამშენებლო გადაწყვეტილებებს სთავაზობს. კომპანია აერთიანებს როგორც სამშენებლო სისტემებისა და ტექნიკის მიმართულებას, ისე საინჟინრო, საწარმოო და დეველოპერულ საქმიანობას. Business Insider Georgia კომპანიის საქმიანობის სპეციფიკასა და სამომავლო გეგმებზე GTC ჰოლდინგის გენერალურ დირექტორსა და თანადამფუძნებელს კახა მარღიაშვილს ესაუბრა.

როგორია GTC ჰოლდინგის საქმიანობის სპეციფიკა და რა სერვისებს სთავაზობს კომპანია მომხმარებლებს?

GTC ჰოლდინგი სამშენებლო სექტორში მრავალმიმართულებიან მოდელს აერთიანებს. ჩვენი საქმიანობის სპეციფიკა მხოლოდ პროდუქტის მიწოდება არ არის - ჩვენ მომხმარებელს ვთავაზობთ სრულ სერვისს, რომელიც მოიცავს საყალიბე და უსაფრთხოების სისტემებს, სამშენებლო ინვენტარის იჯარას, საინჟინრო დაგეგმვას, ტექნიკურ მხარდაჭერას, კოშკურა და მობილური ამწეების იჯარა და რეალიზაცია, ადგილობრივ წარმოებასა და დეველოპერულ მიმართულებას.

ჩვენთვის მნიშვნელოვანია, რომ დამკვეთმა ერთ სივრცეში მიიღოს არა მხოლოდ მასალა, არამედ კომპლექსური გადაწყვეტა სწორად შერჩეული პროდუქტი, პროექტზე მორგებული ინჟინერია, დროული მიწოდება და პროცესის ტექნიკური მხარდაჭერა. სწორედ ეს ინტეგრირებული მიდგომა გვაძლევს შესაძლებლობას, სამშენებლო პროცესები გავხადოთ უფრო ეფექტიანი, უსაფრთხო და პროგნოზირებადი.

რა არის თქვენი მთავარი კონკურენტული უპირატესობა სამშენებლო ბაზარზე და რა განასხვავებს GTC ჰოლდინგს სხვა მოთამაშეებისგან?

ჩვენი მთავარი კონკურენტული უპირატესობა სისტემური და კომპლექსური მიდგომაა. სამშენებლო ბაზარზე კომპანიები ხშირად ერთი კონკრეტული მიმართულებით მუშაობენ, მაშინ როცა GTC ჰოლდინგი მომხმარებელს სრულ ჯაჭვს სთავაზობს - პროდუქტის შერჩევიდან და საინჟინრო დაგეგმვიდან დაწყებული, იჯარით, ლოჯისტიკით, ტექნიკური მხარდაჭერითა და სერვისით დასრულებული.

ამასთან, ჩვენი უპირატესობაა საერთაშორისო ბრენდებთან პარტნიორობა, განსაკუთრებით Doka-სთან თანამშრომლობა, საკუთარი წარმოების განვითარება Formax-ის სახით და ის გამოცდილება, რომელიც წლების განმავლობაში სხვადასხვა მასშტაბის პროექტებზე დაგვიგროვდა.

ჩვენთვის კონკურენტული უპირატესობა მხოლოდ ფასი არ არის. ეს არის ხარისხი, სანდოობა, მოქნილობა, სწრაფი რეაგირება და გრძელვადიან პარტნიორობაზე ორიენტირებული მიდგომა. სწორედ ამან შეგვიქმნა ბაზარზე ნდობა და მოგვცა შესაძლებლობა, ჩამოვყალიბებულიყავით ძლიერ, მრავალმიმართულებიან ჰოლდინგად.

რა გამოწვევებს აწყდება დღეს სამშენებლო სექტორი საქართველოში და როგორ პასუხობს მათ თქვენი კომპანია?

დღეს საქართველოს სამშენებლო სექტორი რამდენიმე მნიშვნელოვანი გამოწვევის წინაშე დგას. მათ შორისაა ხარჯების ეფექტური მართვა, მასალებისა და ლოჯისტიკის ფასები, მაღალი კონკურენცია და მომხმარებლის გაზრდილი მოთხოვნები ხარისხის, უსაფრთხოებისა და თანამედროვე სტანდარტების მიმართ.

ჩვენ ამ გამოწვევებს სწორედ იმ მოდელით ვპასუხობთ, რომელზეც GTC ჰოლდინგია აგებული - ინტეგრირებული სერვისით, საერთაშორისო სტანდარტების დანერგვით, საინჟინრო მხარდაჭერითა და საკუთარი წარმოების განვითარებით. როდესაც კომპანიას აქვს შესაძლებლობა, მომხმარებელს ერთ სივრცეში შესთავაზოს პროდუქტი, ტექნოლოგია, ინჟინერია და სერვისი, ეს ამცირებს რისკებს, ზოგავს დროს და ზრდის მშენებლობის ეფექტიანობას.

ჩვენთვის მნიშვნელოვანია, რომ ბაზრის გამოწვევებს არა მოკლევადიანი გადაწყვეტილებებით, არამედ სისტემური განვითარებით ვუპასუხოთ. სწორედ ამიტომ დიდ ყურადღებას ვუთმობთ პროცესების გაუმჯობესებას, გუნდის გაძლიერებას, ტექნოლოგიების დანერგვას და ხარისხის მუდმივ კონტროლს.

რა არის კომპანიის სამომავლო გეგმები გაფართოების, ახალი სერვისების ან მიმართულებების კუთხით?

GTC ჰოლდინგის შემდეგი ეტაპი უფრო მასშტაბურ და სისტემურ ზრდას უკავშირდება. ერთ-ერთი მნიშვნელოვანი მიმართულებაა რეგიონული გაფართოება. დღეს უკვე წარმოდგენილები ვართ აზერბაიჯანისა და სომხეთის ბაზრებზე Doka-ს პარტნიორობით, რაც ჩვენი განვითარებისთვის მნიშვნელოვანი ნაბიჯია.

პარალელურად, ვმუშაობთ საკუთარი წარმოების გაძლიერებაზე, ახალი ტექნოლოგიური გადაწყვეტილებების დანერგვასა და პროცესების დიჯიტალიზაციაზე. ჩვენი მიზანია, კიდევ უფრო გავზარდოთ ოპერაციული ეფექტიანობა და მომხმარებელს შევთავაზოთ თანამედროვე, სწრაფი და ხარისხზე ორიენტირებული სერვისი.
გრძელვადიან პერსპექტივაში GTC ჰოლდინგის მიზანია, იყოს არა მხოლოდ ძლიერი ადგილობრივი მოთამაშე, არამედ რეგიონში ერთ-ერთი წამყვანი კომპანია, რომელიც სამშენებლო სექტორში ქმნის ხარისხს, სანდოობას და პროფესიული მომსახურების სტანდარტს.

ინფორმაციისთვის, GTC-ის მონაწილეობით აშენდა მრავალი სტრატეგიულად მნიშვნელოვანი ინფრასტრუქტურული პროექტი, მასშტაბური საცხოვრებელი და კომერციული დანიშნულების კომპლექსები. კომპანიას აკავშირებს პარტნიორული ურთიერთობა საქართველოში წარმოდგენილ ყველა მსხვილ და ავტორიტეტულ სამშენებლო კომპანიასთან.