სააგენტოს „აწარმოე საქართველოში“ ხელშეწყობით, სათამაშოების მწარმოებელმა ქართულმა კომპანიებმა ისეთ მასშტაბურ საერთაშორისო გამოფენაში მიიღეს მონაწილეობა როგორიცაა, Spielwarenmesse 2026. წარმოდგენილ ბრენდებს შორის იყო  „ავეჯია“. გამოფენის შედეგებთან და სამომავლო გეგმებთან დაკავშირებით, Business Insider Georgia კომპანიის დამფუძნებელს ნინო სამხარაძეს ესაუბრა.

- როგორ შეაფასებდით Spielwarenmesse 2026 - ის გამოფენას?

Spielwarenmesse 2026 იყო პირველი საერთაშორისო გამოფენა „ავეჯიასთვის“, რომელზეც წარვადგინეთ ჩვენი პროდუქცია მრავალრიცხოვანი აუდიტორიის წინაშე. ეს არის გლობალური B2B პლატფორმა, სადაც სათამაშოების ინდრუსტრიის მსოფლიოში წამყვანი კომპანიები მონაწილეობენ. გამოფენა აერთიანებს ბიზნესის სრულ სპექტრს - მწარმოებლებს, მსხვილ შემსყიდველებს, დისტრიბუტორებს, სხვადასხვა სერვისის მომწოდებლებს. ეს არის საუკეთესო ადგილი სადაც, ერთის მხრივ, პირდაპირ შეგიძლია დაამყარო კავშირი შენს სამიზნე ბიზნეს აუდიტორიასთან, და მეორეს მხრივ, გაიზიარო უდიდესი მსოფლიო გამოცდილება. ასეთი მასშტაბის ღონისძიებაში მონაწილეობა ერთმნიშვნელოვნად შეიძლება შეფასდეს როგორც უაღრესად სასარგებლო და ნაყოფიერი.

„ავეჯიასთვის“ გამოფენა დიდი გამოწვევა იყო, მათ შორის იმ კუთხითაც, თუ როგორ მიიღებდნენ ჩვენ პროდუქციას სფეროს უშუალო წარმომადგენლები, პროფესიონალი შემფასებლები. ამ თვალსაზრისით, შეიძლება ითქვას, რომ „ავეჯიამ“ ნამდვილად შეძლო წარმატების მოპოვება როგორც ორიგინალური დიზაინის, ასევე შესრულების ხარისხის კუთხით, რაც ძალზე გვახარებს. მივიღეთ თანამშრომლობის შემოთავაზებები ევროპის ქვეყნებიდან, შედგა ბევრი მნიშვნელოვანი კომუნიკაცია, გვაქვს კონკრეტული დაინტერესებები, რომლებზეც უკვე დავიწყეთ მუშაობა და იმედი გვაქვს რომ შედეგიანად დასრულდება.

- აწარმოებთ თუ არა ამ ეტაპზე მოლაპარაკებას ექსპორტის კუთხით რომელიმე ქვეყანასთან?

როგორც აღვნიშნე, ჩვენ საკმაოდ ბევრი დაინტერესება მივიღეთ ევროპული კომპანიებისგან პროდუქციის წარმოებასთან და მიწოდებასთან დაკავშირებით. მათ შორის არიან როგორც საბავშვო ავეჯის უმსხვილესი ბრენდები და ე.წ. ბრენდ ოუნერები, ასევე მიმწოდებელები საბავშვო ბაღებისა თუ საჯარო სივრცეებისთვის ევროპის სხვადასხვა ქვეყანაში - ნიდერლანები, ესპანეთი, ჩეხეთი, საბერძნეთი, იტალია, ბალტიის ქვეყნები. ჩვენ დავიწყეთ მუშაობა კონკრეტული დაინტერესებების მიმართულებით და უკვე ვაწარმოებთ ამ მხარეებთან მოლაპარაკებებს. ექსპორტი თავისთავად მრავალშრიანი პროცედურაა და ამ კუთხით საკმაოდ მოცულობითი სამუშაოს ჩატარება მოგვიწევს, რაც ასევე გამოწვევაა ჩვენთვის. იმედი გვაქვს მალე შევძლებთ კონკრეტული შედეგების მიღწევას, რაც წარმატების მომტანი იქნება როგორც ჩვენი ბიზნესისთვის, ასევე ჩვენი ქვეყნისთვის.

- როგორია კომპანიის სამომავლო გეგმები?

სამომავლო გეგმებს შორის არის დაინტერესებების კვალდაკვალ, რომელზეც ზემოთ ვისაუბრე, ახალი პარტნიორული კავშირების დამყარება უცხოურ კომპანიებთან ექსპორტის მიმართულებით, რაც საშუალებას მოგვცემს გავზარდოთ ჩვენი წარმოება და შესაბამისად განვავითაროთ ბიზნესი. პარალელურად ვაპირებთ გავაგრძელოთ მუშაობა ქართულ ბაზარზე, სადაც გარკვეულწილად „ავეჯიამ“ უკვე მოახერხა თავის დამკვიდრება როგორც ეკო-მეგობრულმა და ხარისხიანმა ბრენდმა. ვმუშაობთ ახალ პროდუქტებზე, რომელსაც მალე წარვადგენთ ბაზარზე და იმედი გვაქვს მომხმარებლის მოწონებას დაიმსახურებს.