სააგენტოს „აწარმოე საქართველოში“ ხელშეწყობით, სათამაშოების მწარმოებელმა ქართულმა კომპანიებმა ისეთ მასშტაბურ საერთაშორისო გამოფენაში მიიღეს მონაწილეობა როგორიცაა, Spielwarenmesse 2026. წარმოდგენილ ბრენდებს შორის იყო „ხე.კადუ“. გამოფენის შედეგებთან და სამომავლო გეგმებთან დაკავშირებით, Business Insider Georgia ბრენდის დამფუძნებელს ელენე კუჭუხიძეს ესაუბრა.

- როგორ შეაფასებდით Spielwarenmesse 2026 - ის გამოფენას?

სათამაშოების გამოფენა „Spielwarenmesse 2026“ წარმოადგენს მსოფლიოში ყველაზე მასშტაბურ და პრესტიჟულ ღონისძიებას სათამაშოების ინდუსტრიაში. გამოფენა ყოველ წელს იმართება გერმანიის ქალაქ ნიურნბერგში და მასში მონაწილეობას იღებს მთელი მსოფლიოდან სათამაშოების მწარმოებელი კომპანიები. გამოფენა 5 დღე გრძელდებოდა 12 უზარმაზარ პავილიონში გადანაწილებულ სათამაშოების მწარმოებელ კომპანიებს შორის, საქართველო სპეციალურად მოწყობილ ორ სივრცეში იყო წარმოდგენილი. პროექტ „აწარმოე საქართველოში“ მხარდაჭერით საქართველოს 10 მწარმოებელი კომპანია ძალიან ეფექტურად იყო წარმოდგენილი. ყველა მონაწილეს ჰქონდა თავისი სივრცე, პირობა, რომ თვალნათლად ეჩვენებინა თავისი პროდუქცია, მყუდრო გარემოში შეხვედროდა ვიზიტორებს და ეწარმოებინა საქმიანი მოლაპარაკებები.

სათამაშოების გამოფენა „Spielwarenmesse 2026“-ზე მონაწილეობის მიღება ჩემი დიდი ხნის ოცნება იყო. ბედნიერი და კმაყოფილი ვარ, რომ მოვხვდი ამ გრანდიოზულ ღონისძიებაზე. გამოფენაზე ძალიან საინტერესოდ მიმდინარეობდა. სპეციალურად მოწყობილ სივრცეში მოისმენდით სათამაშოების ინდუსტრიაში მოღვაწე სპეციალისტების, მეცნიერების გამოსვლებს, დისკუსიებს. სათამაშოების ფსიქოლოგიის, გაყიდვების შესახებ. ხდებოდა გამოცდილების გაზიარება, სასურველი კონტაქტების დამყარება.

გამოფენაზე გავიცანი არაერთი საინტერესო წარმომადგენელი, მივიღე დაუვიწყარი შთაბეჭდილებები და ინფორმაცია.

ჩემთვის ასევე მნიშვნელოვანი იყო საქართველოს წარმომადგენლების გაცნობა და მათთან დაახლოება.

არ შემიძლია არ გამოხატო მადლიერება პროექტ „აწარმოე საქართველოში“ თანამშრომლების მიერ გაწეული შრომის და დახმარების გამო.

- აწარმოებთ თუ არა ამ ეტაპზე მოლაპარაკებას ექსპორტის კუთხით რომელიმე ქვეყანასთან?

ბრენდი „ხე კადუ“ ქმნის ეკოლოგიურად სუფთა, კრეატიულ, შემეცნებით სათამაშოებს, რომლის მიზანია პატარებში განავითაროს დადებითი უნარ-ჩვევები. გამოფენაზე ძირითადად დაინტერესების გამოხატვა და კონტაქტების გაცვლა ხდებოდა. იყო დაინტერესება: გერმანიის, საფრანგეთის, ჩეხეთის, პოლონეთის, ჩინეთის, თურქეთის წარმომადგენლების მხრიდან.მოლაპარაკებებს ექსპორტის შესახებ სწორედ ამ ეტაპზე ვიწყებთ. ასევე მივიღე არაერთი საინტერესო შემოთავაზება სხვადასხვა გამოფენებზე მონაწილეობის და ურთიერთთანამშრომლობის კუთხით.

- როგორია კომპანიის სამომავლო გეგმები?

გამოფენამ ბევრი რამ დამანახა და მასწავლა. მიღებულ გამოცდილებას აუცილებლად გამოვიყენებ პროდუქციის დახვეწაში.

მოლაპარაკებებს ვაწარმოებთ სხვადასხვა დაინტერესებულ კომპანიასთან თანამშრომლობის შესახებ.

პარალელურად, ვმუშაობთ „ხე კადუს“ ახალ სათამაშოზე, რომლის პრინციპი უცვლელი რჩება - პატარა სათამაშოს დახმარებით იშრომებს, თავისი გემოვნებით გააფორმებს და შექმნის ნივთს, ხოლო თამაშის შემდეგ, პრაქტიკული დანიშნულებით გამოიყენებს მას.