TaoFood საერთაშორისო ბაზრებზე პოზიციების გაძლიერებას და საექსპორტო მიმართულების განვითარებას განაგრძობს. AgroWorld Kazakhstan 2026-ში მონაწილეობამ კომპანიას ახალი ბიზნესკავშირების დამყარებისა და ყაზახეთის ბაზარზე თანამშრომლობის პერსპექტივების განხილვის შესაძლებლობა მისცა. კომპანიის გეგმებისა და გამოფენის შედეგების შესახებ Business Insider Georgia-ს TaoFood-ის სტრატეგიული განვითარების მენეჯერი ინგა ნაფეტვარიძე ესაუბრა.

როგორ შეაფასებთ AgroWorld Kazakhstan 2026-ში მონაწილეობას და რა შედეგები მოუტანა გამოფენამ TaoFood -ს?

AgroWorld Kazakhstan 2026-ში მონაწილეობას ძალიან დადებითად ვაფასებთ. გამოფენა მართლაც გამორჩეული იყო როგორც მონაწილე კომპანიების მრავალფეროვნებითა და მასშტაბით, ისე ვიზიტორების მაღალი ინტერესითა და ბიზნესპოტენციალით.

TaoFood-ისთვის ეს იყო შესანიშნავი შესაძლებლობა, საერთაშორისო აუდიტორიისთვის გაგვეცნო საქართველოში წარმოებული შინაური ცხოველებისა და თევზის საკვები, წარმოგვეჩინა ჩვენი საწარმოო შესაძლებლობები და დაგვემყარებინა ახალი ბიზნესკავშირები.

განსაკუთრებით სასიხარულოა, რომ გამოფენაზე მიღებული კონტაქტები მხოლოდ გაცნობითი შეხვედრებით არ შემოიფარგლა. უკვე ვაწარმოებთ მოლაპარაკებებს პოტენციურ პარტნიორებთან და გვაქვს საფუძვლიანი მოლოდინი, რომ ეს შეხვედრები კონკრეტულ ბიზნესთანამშრომლობაში გადაიზრდება.

ასევე, ჩვენთვის მნიშვნელოვანი იყო ყაზახეთში საქართველოს ელჩთან შეხვედრა, რომლის ფარგლებშიც ძალიან საინტერესო და პროდუქტიული საუბარი გვქონდა ყაზახეთის ბაზრის შესაძლებლობებსა და ქართული პროდუქციის ექსპორტის პერსპექტივებზე.

გამოფენაზე შინაური ცხოველებისა და თევზის საკვების მიმართულებებით იყავით წარმოდგენილი. რომელი პროდუქციით დაინტერესდნენ ყველაზე მეტად საერთაშორისო ვიზიტორები?

სასიამოვნოა, რომ საერთაშორისო ვიზიტორების მხრიდან ინტერესი გამოიკვეთა ჩვენი წარმოების ორივე ძირითადი მიმართულების მიმართ როგორც შინაური ცხოველების, ისე თევზის საკვების შემთხვევაში.

განსაკუთრებული ყურადღება მიიქცია ძაღლისა და კატის საკვების ასორტიმენტმა, რომელიც სხვადასხვა სეგმენტს მოიცავს - ეკონომიდან პრემიუმ და სუპერპრემიუმ ხაზებამდე. პოტენციური პარტნიორებისთვის საინტერესო იყო პროდუქციის მრავალფეროვნება, ხარისხისა და ფასის თანაფარდობა და ის ფაქტი, რომ საქართველოში გვაქვს თანამედროვე ტექნოლოგიებით აღჭურვილი საწარმო, რომელიც ISO 22000 საერთაშორისო სტანდარტით არის სერტიფიცირებული.

ასევე მნიშვნელოვანი ინტერესი გამოიწვია თევზის საკვების მიმართულებამ, განსაკუთრებით იმ ვიზიტორების მხრიდან, რომლებიც აკვაკულტურის სექტორში საქმიანობენ.

ჩვენთვის განსაკუთრებით მნიშვნელოვანია, რომ საერთაშორისო ბაზარზე ქართული წარმოების პროდუქცია კონკურენტუნარიან ალტერნატივად აღიქმება. ეს კიდევ ერთხელ გვარწმუნებს, რომ საქართველოში წარმოებულ ხარისხიან პროდუქტს ექსპორტის მნიშვნელოვანი პოტენციალი აქვს.

გამოფენის ფარგლებში სხვადასხვა ქვეყნის ბიზნეს წარმომადგენლებთან შეხვედრები გამართეთ. რომელ ბაზრებზე გამოიკვეთა თანამშრომლობის შესაძლებლობები და რამდენად რეალურია ახალი პარტნიორობების ჩამოყალიბება?

გამოფენის ფარგლებში შესაძლებლობა გვქონდა, შევხვედროდით სხვადასხვა ქვეყნის ბიზნესწარმომადგენლებს, მათ შორის ყაზახეთიდან, ნიდერლანდებიდან, თურქეთიდან, სომხეთიდან, აზერბაიჯანიდან და დანიიდან.

ბუნებრივია, ჩვენი განსაკუთრებული ყურადღება ყაზახეთის ბაზრისკენ იყო მიმართული. ეს არის დიდი და საინტერესო ბაზარი, რომელსაც შინაური ცხოველების საკვებისა და აკვაკულტურის მიმართულებით განვითარების მნიშვნელოვანი პოტენციალი აქვს.

მოხარულები ვართ, რომ უკვე გვაქვს კომუნიკაცია რეალურ პოტენციურ პარტნიორებთან და აქტიურად განვიხილავთ თანამშრომლობის კონკრეტულ შესაძლებლობებს. ჩვენი მიზანია, მოლაპარაკებები პრაქტიკულ შედეგებამდე მივიყვანოთ და იმედი გვაქვს, რომ უკვე 2027 წელს TAOFOOD-ის პროდუქციას ყაზახეთის ბაზარზეც ვიხილავთ.

ამასთან, გამოფენამ კიდევ ერთხელ დაგვანახა, რამდენად მნიშვნელოვანია მსგავსი საერთაშორისო ღონისძიებები ქართული კომპანიებისთვის. ეს არ არის მხოლოდ საკუთარი პროდუქციის წარდგენის შესაძლებლობა - ეს არის პირდაპირი გზა ახალი ბაზრებისკენ, საერთაშორისო პარტნიორობისა და ბიზნესის გრძელვადიანი განვითარებისკენ.

რა გეგმები აქვს TaoFood-ს 2026 წლის დარჩენილი პერიოდისთვის? იგეგმება ახალი ბაზრების ათვისება, პროდუქციის ასორტიმენტის გაფართოება ან წარმოების ზრდა?

2026 წლის დარჩენილი პერიოდისთვის ჩვენი ერთ-ერთი მთავარი პრიორიტეტი სწორედ გამოფენაზე დაწყებული მოლაპარაკებების გაგრძელება და მიღწეული კონტაქტების რეალურ პარტნიორობებად გარდაქმნაა.

აქტიურად ვმუშაობთ საექსპორტო მიმართულების განვითარებაზე, განსაკუთრებით ყაზახეთისა და აზერბაიჯანის ბაზრებთან დაკავშირებით. პარალელურად, ჩვენი მიზანია არსებული პროდუქციის კიდევ უფრო განვითარება, ასორტიმენტის ეტაპობრივი გაფართოება და საწარმოო შესაძლებლობების ზრდა, როგორც ადგილობრივი, ისე საერთაშორისო მოთხოვნის შესაბამისად.

TaoFood-ისთვის მნიშვნელოვანია არა მხოლოდ ახალი ბაზრების ათვისება, არამედ გრძელვადიანი და სტაბილური პარტნიორობების ჩამოყალიბება. გვინდა, რომ ქართული წარმოების პროდუქცია სულ უფრო მეტ ქვეყანაში გახდეს ხელმისაწვდომი და ხარისხთან, სანდოობასა და კონკურენტუნარიანობასთან ასოცირდებოდეს.

აქვე მინდა აღვნიშნო, რომ გამოფენაზე განსაკუთრებით სასიხარულო იყო ამდენი ქართული კომპანიისა და მწარმოებლის ხილვა. ვფიქრობ, ეს ძალიან კარგი მაჩვენებელია იმისა, რომ საქართველოში საწარმოო კულტურა ვითარდება, ქართული ბიზნესი ძლიერდება და სულ უფრო მეტი კომპანია ცდილობს საერთაშორისო ბაზარზე საკუთარი ადგილის დამკვიდრებას.

დასასრულს, განსაკუთრებული მადლობა მინდა გადავუხადო Invest in Georgia-ს, რომლის მხარდაჭერითაც მოგვეცა ამ მნიშვნელოვან საერთაშორისო გამოფენაში მონაწილეობის შესაძლებლობა. მსგავსი მხარდაჭერა განსაკუთრებით ღირებულია ქართული მწარმოებლებისთვის, რადგან გვაძლევს საშუალებას, გავცდეთ ადგილობრივ ბაზარს, გავაცნოთ ჩვენი პროდუქცია საერთაშორისო პარტნიორებს და შევქმნათ ახალი შესაძლებლობები ქართული წარმოების განვითარებისთვის.