2026 წლის პირველი ნახევარი „რე-ფრეშისთვის“ საკუთარი საწარმოო შესაძლებლობების გაძლიერების, პროდუქციის ხაზის გაფართოებისა და ახალი მიმართულებების განვითარების ეტაპი აღმოჩნდა.

როგორ აფასებს „რე-ფრეში“ 2026 წლის პირველ ნახევარს, რა ცვლილებებია კომპანიის წარმოებისა და გაყიდვების მიმართულებით და რა გეგმები აქვს მეორე ნახევრისთვის - ამ საკითხებზე Business Insider Georgia-ს „რე-ფრეშის“ თანადამფუძნებელი სალომე ინაძე ესაუბრა.

როგორ შეაფასებდით „რე-ფრეშისთვის" 2026 წლის პირველ 6 თვეს - რა იყო ამ პერიოდის მთავარი შედეგები და მიღწევები?

იმის გათვალისწინებით, რომ აუთსორს წარმოებიდან საკუთარ საწარმოში გადასვლამ გარკვეული სირთულეები შექმნა და ზრდის ტემპიც თავდაპირველ გეგმას სრულად ვერ დაემთხვა, 2026 წლის პირველ ნახევარს მაინც პოზიტიურად ვაფასებთ.

ამ პერიოდში შევძელით საკუთარი პროდუქტების ხაზის გაფართოება - ახალი პროდუქტები უკვე მზადების საბოლოო ეტაპზეა და მალე გამოჩნდება თაროებზე. ამასთან ერთად, მნიშვნელოვანი პროგრესი გვქონდა სერვისების მიმართულებითაც და დღეს უკვე სხვა კომპანიებს შეგვიძლია შევთავაზოთ არა მხოლოდ წარმოება, არამედ პროდუქტის შექმნის სრული ციკლი.

ჩვენთვის ეს პერიოდი უფრო მეტად საფუძვლის გამყარების და შემდეგი ზრდისთვის მომზადების ეტაპი იყო.

როგორ შეიცვალა კომპანიის წარმოებისა და გაყიდვების მაჩვენებლები გასული წლის ანალოგიურ პერიოდთან შედარებით? რა დინამიკა იყო მოთხოვნის
მიმართულებით?

2025 წლის ანალოგიურ პერიოდთან შედარებით, 2026 წლის პირველ ექვს თვეში გაყიდვების დაახლოებით 35%-იანი ზრდა გვაქვს. ეს ზრდა დაკავშირებულია როგორც არსებული პარტნიორების მხრიდან მოთხოვნის მატებასთან, ისე ახალი გაყიდვის წერტილების დამატებასთან.

თუმცა წლის დასაწყისში ჩვენი მოლოდინი უფრო მაღალი იყო და ვფიქრობდით, რომ ზრდის ტემპი კიდევ უფრო სწრაფი იქნებოდა. 35%-იანი ზრდა ჩვენთვის პოზიტიური შედეგია, მაგრამ ამავე დროს გვაჩვენებს, რომ გაყიდვების არხების გაფართოების მიმართულებით ჯერ კიდევ მნიშვნელოვანი სამუშაო გვაქვს.

როგორია თქვენი სტრატეგია საექსპორტო ბაზრების დივერსიფიკაციის მიმართულებით და რომელ ბაზრებზე გაქვთ ამ ეტაპზე მთავარი აქცენტი?

ამ ეტაპზე პრიორიტეტად მზადყოფნის შექმნას ვხედავთ და არა უბრალოდ რაც შეიძლება ბევრ ბაზარზე გასვლას. ჩვენთვის მნიშვნელოვანია, რომ ახალ ბაზარზე შესვლამდე პროდუქტი, წარმოების მოცულობები, ხარისხის კონტროლი, შეფუთვა, ლოგისტიკა და ფასის სტრუქტურა იმ დონეზე იყოს გამართული, რომ ზრდას რეალურად გავუმკლავდეთ. ამ ეტაპზე უფრო მეტად ვმუშაობთ იმ საფუძვლის შექმნაზე, რომელიც მომავალში საშუალებას მოგვცემს ექსპორტზე არა ერთჯერადი მიწოდებებით, არამედ გრძელვადიანი და მდგრადი მოდელით გავიდეთ.

ჩვენთვის მნიშვნელოვანია, რომ საერთაშორისო ბაზარზე გასვლა კომპანიის განვითარების ბუნებრივი გაგრძელება იყოს და არა ნაადრევი ნაბიჯი.

რა გეგმები აქვს კომპანიას 2026 წლის მეორე ნახევრისთვის - რა იქნება მთავარი პრიორიტეტები წარმოების, გაყიდვებისა და ახალი პროდუქტების
მიმართულებით?

2026 წლის მეორე ნახევარში რამდენიმე მიმართულებაზე ვკონცენტრირდებით.

პირველი ისევ გაყიდვების არხების გაფართოებაა. HoReCa ჩვენთვის მნიშვნელოვანან არხად რჩება, თუმცა ჩვენი მიზანია საცალო გაყიდვებში შესვლა. წარმოების თვალსაზრისით, ჩვენი მზაობის მიუხედავად, განსაკუთრებით რთული აღმოჩნდა საცალო ქსელების "თაროზე მოხვედრა" - ვეძებთ იმ პარტნიორებსა და ფორმატებს, სადაც თანამშრომლობა ორივე მხარისთვის მდგრადი იქნება.

მეორე მიმართულება ახალი პროდუქტებია. ვაგრძელებთ ახალი გემოების და სასმელების კატეგორიების განვითარებას.

და მესამე, ძალიან მნიშვნელოვანი მიმართულებაა საწარმოო და პროდუქტის განვითარების სერვისები სხვა კომპანიებისთვის.

გვინდა „რე-ფრეში“ ეტაპობრივად გახდეს ადგილი, სადაც კომპანიას შეუძლია მოვიდეს იდეით და საბოლოოდ მიიღოს ბაზარზე გასატანად სრულად მომზადებული პროდუქტი.

ეს მოიცავს:

რეცეპტურის შექმნას ან/და დახვეწას, ინგრედიენტებისა და ტექნოლოგიის შერჩევას, სატესტო წარმოებას, წარმოების პროცესის დაგეგმვას, შეფუთვის შესაბამისობის შეფასებას და საბოლოოდ პროდუქტის წარმოებას.

ამიტომ, ზრდას მხოლოდ საკუთარი ბრენდის გაყიდვების ზრდად აღარ ვუყურებთ - გვინდა უფრო ეფექტიანად გამოვიყენოთ ის ცოდნა, გამოცდილება და ინფრასტრუქტურა, რომელიც ამ წლების განმავლობაში დავაგროვეთ.