რკინიგზის მენეჯმენტი მუშაობს იმაზე, რომ შეიძინონ დამატებით ძალიან კრიტიკულად მნიშვნელოვანი ლოკომოტივები, უნდა განახლდეს სავაგონო პარკი, - ამის შესახებ „თბილისის მშრალი პორტის“ სამეთვალყურეო საბჭოს თავმჯდომარემ, ჯემალ ინაიშვილმა ტელეკომპანია „მაესტროს“ ეთერში გადაცემა Business Insider Georgia-ში სტუმრობისას განაცხადა.

„ჩვენ აღმოვჩნდით, სამწუხაროდ, მოუმზადებელი ამ მდგომარეობისთვის. იმიტომ, რომ ჩვენ უკვე უნდა გვქონოდა ანაკლიის ნავსადგური ან ფოთის ახალი ნავსადგური. ახალი ფოთის ნავსადგური უნდა აშენებულიყო. დღეს არცერთი არ არის და, რა თქმა უნდა, უნდა მომხდარიყო რკინიგზის სერიოზული მოდერნიზაციაც. არც ერთი და არც მეორე, სამწუხაროდ, დღემდე სრულად არ განხორციელებულა.

რკინიგზის ახალი ხელმძღვანელობა კარგი გეგმებით მოვიდა და ისინი უკვე მუშაობენ იმაზე, რომ დამატებით შეიძინონ ძალიან კრიტიკულად მნიშვნელოვანი ლოკომოტივები. უნდა განახლდეს სავაგონო პარკიც, მაგრამ მე აქვე დავამატებდი, რომ აუცილებლად უნდა მოხდეს კერძო სექტორის მონაწილეობა ამ ყველაფერში. იმიტომ, რომ ყაზახეთის რკინიგზაზე უკვე დიდი ხანია დასაშვებია როგორც ლოკომოტივების, ისე სავაგონო პარკის კერძო მფლობელობა.

ამიტომ, ამის გარეშე ვერ განვითარდება ვერც ჩვენი რკინიგზა და უნდა მიეცეს საშუალება კერძო ოპერატორებს. ამ შემთხვევაში ჩვენ ვართ დაინტერესებული, რომ ჩვენ დავიწყოთ ჩვენი ძალებით, იმიტომ, რომ ჩვენ შეგვიძლია უფრო სწრაფად შევიძინოთ პლატფორმები. ჩვენ არ გვჭირდება ეს ბიუროკრატიული პროცესები და ეს ჩვენი ტვირთებისთვის გვჭირდება. ჩვენ არ ვუწევთ რკინიგზას კონკურენციას, რომ დავიწყოთ ვიღაცის ტვირთის გადაზიდვა. ჩვენ იმდენი ტვირთი გაგვაჩნია, რომ, სამწუხაროდ, ამის ტრანსპორტირება რკინიგზის მეშვეობით დღეს უკვე ძალიან გაჭირდა.

ვინაიდან, როგორც გითხარით, ძალიან დიდი ზეწოლა არის შუა დერეფანზე და ეს ყველაფერი, რა თქმა უნდა, ნავსადგურებსა და რკინიგზაზე მოდის, პირველ რიგში. თვითონ ეს დარგი და ინდუსტრია ქვეყნის ეკონომიკისთვის ძალიან მნიშვნელოვანია და ახლა ხმამაღლა ამაზე არავინ ლაპარაკობს, მაგრამ დარგი ძალიან დიდი გამოწვევის წინაშეა", - აცხადებს ჯემალ ინაიშვილი.