„პრაქტიკული სწავლების ცენტრი“  საქართველოში მოქმედი საგანმანათლებლო სივრცეა, რომელიც 2019 წლიდან ფუნქციონირებს და სამართლის სფეროში პრაქტიკულ განათლებაზეა ორიენტირებული. ცენტრში მიმდინარე ტენდენციებზე, ყველაზე პოპულარულ მიმართულებებსა და სამომავლო გეგმებზე Business Insider Georgia-სთან პრაქტიკული სწავლების ცენტრის დირექტორმა, ელისაბედ შენგელიამ ისაუბრა.

როგორ შეიცვალა მოთხოვნა თქვენს პროგრამებსა და კურსებზე და რომელი მიმართულებებია ყველაზე პოპულარული სტუდენტებს შორის?

ჩვენი დაკვირვებით, შეიცვალა არა მხოლოდ მოთხოვნის მოცულობა, არამედ თავად მსმენელის მოლოდინიც. თუ წლების წინ მსმენელთა დიდი ნაწილი ძირითადად თეორიული ცოდნის მიღებაზე იყო ორიენტირებული, დღეს ისინი კონკრეტულ შედეგს ეძებენ - გამოცდების წარმატებით ჩაბარებას, კარიერულ წინსვლას ან პრაქტიკული უნარების განვითარებას.

სწორედ ამ ტენდენციამ განაპირობა ის, რომ ყველაზე დიდი ინტერესი ჩვენს ცენტრში აქვთ სტაჟიორ პროკურორისა და სტაჟიორ გამომძიებლის საკონკურსო გამოცდებისთვის, ადვოკატთა, მოსამართლის და ნოტარიუსის საკვალიფიკაციო გამოცდებისთვის მოსამზადებელ კურსებს. ეს მიმართულებები აერთიანებს ადამიანებს, რომლებსაც მკაფიო პროფესიული მიზანი აქვთ და სწავლებიდანაც კონკრეტულ შედეგს ელოდებიან.

ამავდროულად, მზარდი ინტერესით გამოირჩევა შრომის სამართლისა და სამეწარმეო სამართლის კურსები. ეს კიდევ ერთხელ ადასტურებს, რომ თანამედროვე იურისტი აღარ კმაყოფილდება მხოლოდ ზოგადი სამართლებრივი ცოდნით და ცდილობს კონკრეტულ დარგებში სპეციალიზაციას.

როგორია თქვენი მიდგომა პრაქტიკული სწავლების ხარისხის გაუმჯობესების კუთხით და რა ახალი მეთოდები ან პროგრამები დაამატეთ ბოლო პერიოდში?

„პრაქტიკული სწავლების ცენტრის“ (PLC-ის) შექმნის იდეა სწორედ ერთმა პრობლემამ განაპირობა - ხშირად ახალგაზრდა იურისტებს აქვთ ცოდნა, მაგრამ უჭირთ მისი პრაქტიკაში გამოყენება, ან აქვთ მხოლოდ ზოგადი ცოდნა, რომლის კონკრეტული მიმაღთულებით განვითაერბაც ესაჭიროებათ.

ამიტომ ჩვენი მიდგომა თავიდანვე განსხვავებული იყო. ჩვენ ვცდილობთ, მსმენელმა კურსზე მოისმინოს არა მხოლოდ ის, „რა წერია კანონში“, არამედ ისიც, როგორ მუშაობს ეს ნორმა რეალურ ცხოვრებაში, სასამართლოში, ადმინისტრაციულ ორგანოში თუ კერძო სექტორში.

სწავლების პროცესში განსაკუთრებული ადგილი უჭირავს პრაქტიკულ დავალებებს, რეალური საქმეების ანალიზს, სამართლებრივი პოზიციების ჩამოყალიბებასა და პროფესიული აზროვნების განვითარებას. ჩვენი მიზანია, მსმენელი კურსიდან გავიდეს არა მხოლოდ დამატებითი ინფორმაციით, არამედ უკეთესი პროფესიული უნარებით.

რამდენად აქტიურად თანამშრომლობთ ბიზნეს სექტორთან და როგორია სტუდენტების დასაქმების ან პრაქტიკის შესაძლებლობები?

PLC-ის ერთ-ერთი გამორჩეული მახასიათებელი ის არის, რომ ცენტრი თავად შეიქმნა პრაქტიკოსი იურისტების ინიციატივით და არა მხოლოდ აკადემიური სივრცის ფარგლებში.

ამიტომ ჩვენი კავშირი პროფესიულ გარემოსთან ყოველდღიურია. კურსების ლექტორები არიან ადამიანები, რომლებიც პარალელურად მუშაობენ სამართლის სხვადასხვა სფეროში, მონაწილეობენ სასამართლო პროცესებში, ემსახურებიან ბიზნესს და უშუალოდ აწყდებიან იმ გამოწვევებს, რომელთა შესახებაც კურსებზე საუბრობენ.

ვფიქრობთ, სწორედ ასეთი მიდგომა ქმნის ყველაზე დიდ ღირებულებას მსმენელისთვის, რადგან ის სწავლობს არა მხოლოდ თეორიას, არამედ პროფესიის რეალურ პრაქტიკას იმ ადამიანებისგან, რომლებიც ამ საქმიანობაში ყოველდღიურად არიან ჩართული.

ამ წლების განმავლობაში გვქონია არაერთი შემთხვევა, როდესაც ჩვენი ტრენერების რეკომენდაციით, წარმატებული და გამორჩეული სტუდენტები დასაქმებულან პროკურატურის და სასამართლო სისტემაში.

ჩვენთვის განსაკუთრებით საამაყოა, რომ PLC-ის პროგრამებმა პროფესიულ წრეებში მაღალი სანდოობა მოიპოვა. პრაქტიკაში არაერთხელ შეგვხვედრია შემთხვევა, როდესაც დამსაქმებლისთვის კანდიდატის რეზიუმეში PLC-ის საკვალიფიკაციო პროგრამის გავლა მისი პროფესიული მომზადების და მაღალი კომპეტენციის მნიშვნელოვან მაჩვენებლად აღიქმება. ეს ნდობა ჩვენი საქმიანობის ერთ-ერთი ყველაზე მნიშვნელოვანი შედეგია.

რა არის ცენტრის მთავარი პრიორიტეტები და განვითარების გეგმები წლის დარჩენილი პერიოდისთვის?

ჩვენი მთავარი ამოცანაა, PLC არ იქცეს მხოლოდ კურსების მომწოდებელ ორგანიზაციად და ჩამოყალიბდეს პროფესიული განვითარების პლატფორმად სამართლის სფეროში.

წლის განმავლობაში ვაგრძელებთ არსებული პროგრამების განვითარებას და ვამატებთ ახალ მიმართულებებს. ამ ეტაპზე ვმუშაობთ სამშენებლო სამართლისა და საგადასახადო სამართლის კურსების დანერგვაზე, რადგან ეს არის სფეროები, სადაც პრაქტიკული ცოდნის მოთხოვნა განსაკუთრებით მაღალია.

მნიშვნელოვანია, რომ ჩვენი განვითარების სტრატეგია არ ეფუძნება მხოლოდ კურსების რაოდენობის ზრდას. ჩვენთვის პრიორიტეტულია ისეთი საგანმანათლებლო გარემოს შექმნა, სადაც მსმენელი მიიღებს ცოდნას უშუალოდ იმ ადამიანებისგან, რომლებიც თავად ქმნიან და იყენებენ ამ ცოდნას პროფესიულ საქმიანობაში.

PLC შეიქმნა იმ იდეით, რომ პროფესიული წარმატება მხოლოდ ცოდნის დაგროვებით არ მიიღწევა. ცოდნა ღირებულებას მაშინ იძენს, როდესაც ის პრაქტიკაში მუშაობს. სწორედ ამიტომ ჩვენი მიზანია, განათლებასა და პროფესიულ რეალობას შორის არსებული დისტანცია მაქსიმალურად შევამციროთ და მსმენელებს მივცეთ არა მხოლოდ ინფორმაცია, არამედ პროფესიის პრაქტიკული ხედვაც.