Mimo მომხმარებლებს მრავალფეროვან საბავშვო პროდუქციას სთავაზობს, რომელიც უსაფრთხო და ეკოლოგიურად სუფთა მასალისგან მზადდება. ბრენდი ქართულ ბაზარზე 2021 წლიდან ოპერირებს. მიმდინარე სიახლეებისა და სამომავლო გეგმების შესახებ Business Insider Georgia-ს კომპანიის თანადამფუძნებელი ანი ნიკოლაიშვილი ესაუბრა.

წინა ინტერვიუს შემდეგ რა სიახლეები აქვს Mimo-ს და რა მიმართულებებზე მუშაობთ ამ ეტაპზე?

Mimo მუდმივად განვითარების პროცესშია. გვჯერა, რომ ბრენდი, რომელიც პატარებისთვის იქმნება, ყოველთვის უნდა იზრდებოდეს და ვითარდებოდეს მათთან ერთად. სწორედ ამიტომ, ბოლო პერიოდში ჩვენი მთავარი ყურადღება რებრენდინგზეა გადატანილი. აქტიურად ვმუშაობთ განახლებულ კონცეფციაზე და დარწმუნებული ვართ, რომ მომავალ წელს მომხმარებელი სრულიად ახალ Mimo-ს იხილავს – განახლებული ვიზუალით, ახალი პროდუქტებითა და ბევრი სასიამოვნო სიახლით. გვინდა, რომ Mimo კიდევ უფრო თანამედროვე, გამორჩეული და შთამაგონებელი ბრენდი გახდეს ახალგაზრდა მშობლებისთვის.

როგორია 2026 წლის სეზონი კომპანიისთვის? რომელი პროდუქცია სარგებლობს მომხმარებელში ყველაზე დიდი მოთხოვნით?

2026 წელი ჩვენთვის წარმატებული და ძალიან საინტერესო აღმოჩნდა. განსაკუთრებით გვახარებს ის ფაქტი, რომ მომხმარებლის ერთ-ერთ ყველაზე საყვარელ პროდუქტად კვლავ Mimo-ს სპილო ბალიში რჩება. ეს არის ჩვენი ბრენდის საავტორო პროდუქტი, რომელიც წლების განმავლობაში უამრავი ოჯახის ყოველდღიურობის ნაწილად იქცა. მშობლები აფასებენ მის ხარისხს, კომფორტსა და უსაფრთხოებას, პატარები კი მის რბილ და მეგობრულ დიზაინს. სწორედ ასეთი სიყვარული გვაძლევს მოტივაციას, ყოველდღიურად შევქმნათ კიდევ უფრო უკეთესი პროდუქცია.

რა ეტაპზეა საერთაშორისო ბაზრების განვითარების მიმართულება? თუ არის ამ კუთხით კონკრეტული სიახლეები ან ახალი პარტნიორობები?

საერთაშორისო ბაზარზე გასვლა ჩვენი სამომავლო განვითარების ერთ-ერთი მნიშვნელოვანი მიზანია, თუმცა ამ ეტაპზე ამ მიმართულებით კონკრეტული სიახლე ჯერ არ გვაქვს. გვინდა, თითოეული ნაბიჯი გააზრებულად გადავდგათ და მაშინ გავიდეთ ახალ ბაზრებზე, როდესაც დარწმუნებულები ვიქნებით, რომ Mimo იმ ხარისხითა და სტანდარტით იქნება წარმოდგენილი, რომელსაც ჩვენი მომხმარებელი ჩვენგან ელოდება.

გეგმავთ თუ არა კომპანიის ფიზიკურ გაფართოებას, ფილიალების ან შოურუმების გახსნას?

ამ კითხვაზე ჯერ ყველა დეტალს ვერ გავამხელთ, თუმცა შეგვიძლია ვთქვათ, რომ ძალიან საინტერესო იდეაზე ვმუშაობთ. ამჟამად, აქტიური მოლაპარაკებების ეტაპზე ვართ და დიდი იმედი გვაქვს, ყველაფერი წარმატებით დასრულდება. თუ ჩვენი ჩანაფიქრი განხორციელდება, Mimo მომხმარებლის წინაშე სრულიად ახალი კონცეფციით წარდგება. გვინდა, ეს იყოს სასიამოვნო სიურპრიზი ყველასთვის, ვისაც ჩვენი ბრენდი უყვარს.

როგორია თქვენი სამომავლო გეგმები და განვითარების ხედვა?

ჩვენი მიზანი ყოველთვის იყო და იქნება ისეთი პროდუქციის შექმნა, რომელიც მშობლებს ყოველდღიურობას უმარტივებს, პატარებს კი უსაფრთხო და კომფორტულ გარემოს უქმნის. გვინდა, Mimo მხოლოდ საბავშვო აქსესუარების ბრენდი არ იყოს, არამედ ის იყოს ემოცია, ნდობა და ხარისხი, რომელიც ოჯახებს პირველივე დღიდან ახლავს. წინ ბევრი სიახლე, ახალი იდეა და დიდი გეგმები გველოდება. დარწმუნებული ვართ, რომ Mimo-ს ყველაზე საინტერესო ეტაპი ჯერ კიდევ წინ არის და ძალიან მალე ჩვენი მომხმარებლები თავად გახდებიან ამ ისტორიის ნაწილი.