მიმდინარე ტურისტული სეზონი Vinotel-ისთვის პოზიტიური დინამიკით მიმდინარეობს. სასტუმრო სტაბილურად მაღალ დატვირთვას ინარჩუნებს და სტუმრების გეოგრაფიაც მრავალფეროვანია.

როგორ იცვლება სტუმრების მოთხოვნები, რომელი ბაზრებიდან იზრდება ინტერესი და რა გეგმები აქვს Vinotel-ს წლის დარჩენილ პერიოდში - ამ საკითხებზე Business Insider Georgia-ს სასტუმროს საზოგადოებასთან ურთიერთობების და მარკეტინგის მენეჯერი, მარი ჭყოიძე ესაუბრა.

როგორ მიმდინარეობს Vinotel-ისთვის მიმდინარე ტურისტული სეზონი და როგორია დატვირთვა წინა წელთან შედარებით?

მიმდინარე ტურისტული სეზონი Vinotel-ისთვის პოზიტიური დინამიკით მიმდინარეობს, რაც წლის საბოლოო შედეგებთან დაკავშირებით ოპტიმისტური მოლოდინის საფუძველს გვაძლევს. წინა წელთან შედარებით შევინარჩუნეთ სტაბილურად მაღალი დატვირთვა, ხოლო გარკვეულ პერიოდებში ჯავშნების ზრდაც შეინიშნება. თუმცა, ვფიქრობთ, დღევანდელ რეალობაში წარმატებას მხოლოდ დატვირთვის მაჩვენებლებით აღარ უნდა ვაფასებდეთ.

ტურიზმი მნიშვნელოვნად შეიცვალა. თუ რამდენიმე წლის წინ მთავარი აქცენტი ვიზიტორების რაოდენობაზე კეთდებოდა, დღეს სულ უფრო მნიშვნელოვანი ხდება მათი ინტერესები, მოგზაურობის მიზანი და იმ გამოცდილების ხარისხი, რომელსაც ქვეყანა და კონკრეტული სასტუმრო სთავაზობს. სწორედ ამიტომ, Vinotel-ისთვის პრიორიტეტი არა მხოლოდ მაღალი დატვირთვა, არამედ სტუმრისთვის ღირებული, დასამახსოვრებელი გამოცდილების შექმნაა.

რომელი ქვეყნებიდან მასპინძლობთ ყველაზე მეტ სტუმარს და როგორ შეიცვალა ვიზიტორების გეოგრაფია ბოლო პერიოდში?

ჩვენი სტუმრების გეოგრაფია საკმაოდ მრავალფეროვანია - მათი ძირითადი ნაწილი ევროპიდან, ჩრდილოეთ ამერიკიდან და ისრაელიდან ჩამოდის. ამასთან, ბოლო პერიოდში განსაკუთრებულ ინტერესს ვამჩნევთ მეზობელი და ცენტრალური აზიის ქვეყნების მხრიდანაც. გასულ თვეს Vinotel-ის სტუმრებს შორის იყვნენ უზბეკეთისა და თურქმენეთის პრეზიდენტები, რაც კიდევ ერთხელ უსვამს ხაზს საქართველოს, როგორც მნიშვნელოვანი რეგიონული დანიშნულების ადგილის, მიმართ მზარდ ინტერესს. ვფიქრობთ, ეს მიმართულება მომავალშიც კიდევ უფრო გაძლიერდება და სტუმრების ნაკადის ზრდას ამ რეგიონიდანაც ველოდებით.

რაც განსაკუთრებით საინტერესოა, ბოლო წლებში შეიცვალა თავად მოგზაურის მოტივაცია. საქართველო აღარ არის მხოლოდ ახალი და საინტერესო მიმართულება - ის უფრო და უფრო ხშირად ხდება გაცნობიერებული არჩევანი იმ ადამიანებისთვის, რომლებიც ეძებენ ღვინის კულტურას, ავთენტურ გასტრონომიას, ისტორიას და ადგილობრივ ტრადიციებს. ეს ცვლილება განსაკუთრებით იგრძნობა ისეთ ბუტიკურ სასტუმროებში, როგორიც Vinotel-ია, სადაც სტუმარი იღებს არა მხოლოდ მომსახურებას, არამედ ნამდვილ ქართულ გამოცდილებას.

დღეს სტუმრები სასტუმროს შერჩევისას რა კრიტერიუმებს ანიჭებენ ყველაზე დიდ მნიშვნელობას და როგორ პასუხობს Vinotel ამ მოთხოვნებს?

დღევანდელი მოგზაური ბევრად უფრო მომთხოვნია. მისთვის მნიშვნელოვანია არა მხოლოდ კომფორტი, არამედ ავთენტურობა, ინდივიდუალური მიდგომა, ისტორია და ემოციური კავშირი იმ ადგილთან, რომელსაც სტუმრობს.

Vinotel სწორედ ამ პრინციპზეა აგებული. ჩვენ ვართ პრემიუმ სეგმენტის ბუტიკური სასტუმრო, სადაც ისტორიული გარემო, ქართული ღვინის კულტურა, გასტრონომია და პერსონალიზებული მომსახურება ერთიან გამოცდილებას ქმნის. განსაკუთრებულ მნიშვნელობას ვანიჭებთ იმას, რომ თითოეულმა სტუმარმა საქართველო არა მხოლოდ ნახოს, არამედ იგრძნოს და გაიცნოს.

რას გეგმავთ წლის დარჩენილ პერიოდში და რა სიახლეებს შესთავაზებთ სტუმრებს?

ახალ სეზონს განახლებული მენიუთი შევხვდით - ეს იყო ერთ-ერთი მთავარი სიახლე, რომელზეც ბოლო პერიოდში განსაკუთრებული ყურადღება გავამახვილეთ. მენიუს განახლებისას შევინარჩუნეთ Vinotel-ის კულინარიული ხასიათი და ქართული ტრადიციებისადმი ერთგულება, თუმცა ამავდროულად შევიტანეთ ახალი კერძები და თანამედროვე მიდგომები, რათა ჩვენი სტუმრებისთვის კიდევ უფრო მრავალფეროვანი და დახვეწილი გასტრონომიული გამოცდილება შეგვეთავაზებინა.

წლის დარჩენილ პერიოდში ჩვენი მთავარი მიმართულება სტუმრებისთვის უკვე არსებული სერვისების კიდევ უფრო განვითარება და ახალი, პერსონალიზებული გამოცდილებების შეთავაზება იქნება. განსაკუთრებულ ყურადღებას დავუთმობთ ღვინის ტურიზმს, კერძო და სადღესასწაულო ღონისძიებებს და იმ შეთავაზებებს, რომლებიც Vinotel-ის უნიკალურ გარემოსა და ქართულ სტუმარმასპინძლობას კიდევ უფრო გამოკვეთს.