სასტუმრო „პაბელონში“ ზაფხულის სეზონი აქტიურად მიმდინარეობს. აგვისტოს ბოლო სრულად დატვირთულია, ხოლო სექტემბრის ჯავშნების დაახლოებით 60% უკვე გაყიდულია. როგორც სასტუმროს გენერალურმა მენეჯერმა, თამარ ახალბედაშვილმა Business Insider Georgia-ს განუცხადა, გასულ წელთან შედარებით მოთხოვნა გაზრდილია.

როგორ აფასებთ მიმდინარე ზაფხულის სეზონს? როგორია მოთხოვნა და სასტუმროს დატვირთვა გასული წლის ანალოგიურ პერიოდთან შედარებით?

მიმდინარე ზაფხულის სეზონზე სასტუმრო „პაბელონში“ დატვირთულობა საკმაოდ მაღალია. ჯავშნებთან დაკავშირებული მოთხოვნები აქტიურად შემოდის, როგორც კორპორატიული სეგმენტიდან, ასევე ინდივიდუალური სტუმრებისგან. განსაკუთრებით აქტიურია აგვისტოს პერიოდი, როდესაც სტუმრების მხრიდან ინტერესი არა მხოლოდ სასტუმროში განთავსების, არამედ სასტუმროს დამატებითი სივრცეებისა და სერვისების მიმართაც იზრდება, რომლებიც ჩვენს სასტუმროში საკმაოდ მრავალფეროვანია.

სასტუმრო „პაბელონის“ ტერიტორიაზე განთავსებულია ქართული რესტორანი „მაკრინე“, კახური სივრცე და ბარები. ასევე გვაქვს შიდა და გარე საცურაო აუზები, ფიტნესდარბაზი, სპა და გამაჯანსაღებელი სივრცე.

გარდა ამისა, სტუმრებს ვთავაზობთ სამ საკონფერენციო და შეხვედრების დარბაზს, მათ შორის საბანკეტო დარბაზს, რომელიც 200-ზე მეტ სტუმარს იტევს. ჩვენი პატარა სტუმრებისთვის გვაქვს საბავშვო ოთახიც. ასევე ფუნქციონირებს ღვინისა და სუვენირების მაღაზია.

სპორტისა და დასვენების მოყვარულებისთვის კი გვაქვს პიკლბოლისა და კალათბურთის მოედნები, ასევე სხვადასხვა სარეკრეაციო ზონა, სადაც სტუმრებს შეუძლიათ თავისუფალი დრო სასიამოვნოდ და აქტიურად გაატარონ. სასტუმროს ტერიტორიაზე არსებული ტბის გარშემო კი შესაძლებელია ველოსიპედით გასეირნებაც.

ჩვენი მიზანია, სტუმრებს ერთ სივრცეში შევთავაზოთ დასვენების, გართობის, სპორტული აქტივობებისა და სხვადასხვა ტიპის ღონისძიებების მოწყობის მრავალფეროვანი შესაძლებლობები.

გასული წლის ანალოგიურ პერიოდთან შედარებით, მიმდინარე წლის აგვისტოში ჯავშნების დინამიკა ზრდის მკაფიო ტენდენციას აჩვენებს. მნიშვნელოვანია აღინიშნოს, რომ გასული წლის აგვისტო სასტუმროს ოპერირების საწყის ეტაპს წარმოადგენდა, რაც შედარებისას გასათვალისწინებელი ფაქტორია. მიმდინარე წლის მონაცემები კი მიუთითებს, რომ სასტუმროს მიმართ მოთხოვნა მნიშვნელოვნად გაიზარდა და სტუმრების დაინტერესება უფრო მაღალია.

აგვისტოს თვე ჯერ კიდევ აქტიურია და დამატებით ჯავშნებს ველოდებით, შესაბამისად, საბოლოო შედეგი შესაძლოა კიდევ უფრო გაუმჯობესდეს.

გასული წლის ზაფხულთან შედარებით ასევე გაიზარდა ინტერესი რესტორნისა და აუზის მომსახურების მიმართ. აღნიშნული სერვისებით სარგებლობენ როგორც სასტუმრო „პაბელონის“ სტუმრები, ასევე სხვა ვიზიტორები, რაც დამატებით აქტივობას ქმნის.

როგორ შეიცვალა წელს სტუმრების ნაკადი ქვეყნების მიხედვით? რომელი ბაზრებიდან ფიქსირდება ყველაზე დიდი მოთხოვნა და შეინიშნება თუ არა ახალი მიმართულებების გააქტიურება?

ქვეყნების მიხედვით სტუმრების განაწილებაში მნიშვნელოვანი ცვლილება ამ ეტაპზე არ შეინიშნება. სასტუმრო „პაბელონში“ ყველაზე დიდი წილი კვლავ საქართველოს ბაზარს უჭირავს. ასევე აქტიურად ვმასპინძლობთ სტუმრებს ისრაელიდან, ყაზახეთიდან, აზერბაიჯანიდან, დიდი ბრიტანეთიდან და ა.შ.

ამ ეტაპზე ქვეყნების მიხედვით ძირითადად გასული წლის მსგავსი სურათი გვაქვს და ახალი, გამოკვეთილად მზარდი ბაზარი არ ფიქსირდება. თუმცა, სხვადასხვა ქვეყნიდან სტუმრების სტაბილური ნაკადი ჩვენთვის მნიშვნელოვანია, რადგან ბაზრების დივერსიფიცირება მოთხოვნის შენარჩუნებასა და სეზონური რისკების შემცირებას უწყობს ხელს.

შესაბამისად, ვაგრძელებთ სხვადასხვა ბაზრიდან სტუმრების მოზიდვაზე მუშაობას და ონლაინ არხების საშუალებით სასტუმრო „პაბელონის“ ცნობადობის გაზრდას. ჩვენი მიზანია, არსებული ბაზრების შენარჩუნებასთან ერთად, ეტაპობრივად ახალი მიმართულებების გააქტიურების შესაძლებლობებიც გამოვიყენოთ.

როგორია მოთხოვნა ზაფხულის დარჩენილ პერიოდზე და როგორია უკვე შემოდგომის ჯავშნების დინამიკა?

ზაფხულის დარჩენილ პერიოდზე მოთხოვნა კვლავ მაღალია. განსაკუთრებით აქტიურია თვის ბოლო პერიოდი. უფრო კონკრეტულად, 28 აგვისტოდან თვის ბოლომდე სასტუმრო „პაბელონი“ სრულად არის დატვირთული, რაც აღნიშნულ პერიოდზე საკმაოდ მაღალ მოთხოვნაზე მიუთითებს.

რაც შეეხება შემოდგომის წინასწარ ჯავშნებს, ამ ეტაპზე სექტემბრის მიმართულებით საკმაოდ მაღალი აქტივობა გვაქვს, ოთახების 60% უკვე გაყიდულია. ეს საკმაოდ პოზიტიური მაჩვენებელია და გვაძლევს საფუძველს ვიფიქროთ, რომ ზაფხულის მაღალი აქტივობის შემდეგ მოთხოვნა შემოდგომის პერიოდშიც შენარჩუნდება.

განსაკუთრებით მნიშვნელოვანია ოქტომბრის ჯავშნების მოცულობა, რაც მიუთითებს, რომ სეზონურობა თანდათან უფრო ხანგრძლივი ხდება. ამ ეტაპზე ჩვენი მთავარი მიზანია, არსებული პოზიტიური დინამიკა შემოდგომის შემდეგაც შევინარჩუნოთ და იგივე ტენდენცია ზამთრის თვეებშიც გაგრძელდეს.