Lilat Home ქართული ბრენდია, რომელიც მომხმარებლებს უნიკალური დიზაინის მაგიდის სუფრებსა და ტექსტილის პროდუქტებს სთავაზობს. ბოლო პერიოდში კომპანიამ საქმიანობაში კორპორატიული მიმართულების წილი გაზარდა და ინდივიდუალურ შეკვეთებზე გააკეთა აქცენტი. ბრენდის განვითარების ახალი ეტაპის, სამომავლო გეგმებისა და საერთაშორისო ბაზარზე თანამშრომლობის შესახებ Business Insider Georgia-ს დამფუძნებელი მარიამ ტონია ესაუბრა.

რა სიახლეები აქვს კომპანიას ამ ეტაპზე და როგორ განვითარდა ბრენდი ბოლო ინტერვიუს შემდეგ?

ბოლო ინტერვიუს შემდეგ Lilat Home-მა განვითარების საკმაოდ მნიშვნელოვანი ეტაპი გაიარა. თუ თავდაპირველად ჩვენი ძირითადი მიმართულება საცალო გაყიდვები იყო, დღეს ბრენდის საქმიანობაში წამყვანი ადგილი კორპორატიულმა შეკვეთებმა დაიკავა.

ეს ცვლილება ჩვენთვის ერთგვარი ახალი შესაძლებლობა აღმოჩნდა, რადგან კორპორატიული მიმართულება გვაძლევს საშუალებას, ვითანამშრომლოთ სხვადასხვა კომპანიასთან, უკეთ გავიცნოთ მათი საჭიროებები და შევქმნათ ინდივიდუალური, მათ ინტერესებზე მორგებული პროდუქტები.

რა თქმა უნდა, საცალო მიმართულებასაც ვინარჩუნებთ, რადგან სწორედ ინდივიდუალური მომხმარებლების სიყვარულმა და ნდობამ ჩაუყარა საფუძველი Lilat Home-ის განვითარებას. თუმცა დღეს ჩვენი მთავარი ფოკუსი კორპორატიული მიმართულების გაძლიერებასა და ახალი პარტნიორული ურთიერთობების ჩამოყალიბებაზეა.

როგორ შეიცვალა კომპანიის ასორტიმენტი და რომელ პროდუქტებზეა მომხმარებელთა მოთხოვნა ყველაზე მაღალი? გეგმავთ თუ არა ახალი კოლექციებისა და სახლის ტექსტილის სხვა პროდუქტების დამატებას?

კორპორატიული მიმართულების განვითარებასთან ერთად ბუნებრივად შეიცვალა ჩვენი მიდგომაც ასორტიმენტის მიმართ. დღეს Lilat Home მხოლოდ მზა კოლექციების შეთავაზებით აღარ შემოიფარგლება - ჩვენ აქტიურად ვმუშაობთ ინდივიდუალურ შეკვეთებზე და თითოეულ დამკვეთს ვთავაზობთ მის სურვილებსა და ბრენდის იდენტობაზე მორგებულ დიზაინს.

ჩვენთვის განსაკუთრებით საინტერესოა შემოქმედებითი პროცესი, როდესაც იდეა უშუალოდ დამკვეთთან თანამშრომლობით იბადება და საბოლოოდ უნიკალურ პროდუქტად იქცევა.

რაც შეეხება ახალ კოლექციებს, მათი შექმნა, რა თქმა უნდა, კვლავ ჩვენი გეგმების ნაწილია. განსაკუთრებით აქტუალურია საახალწლო მიმართულება. სასიხარულოა, რომ ჩვენი ერთ-ერთი გამორჩეული დიზაინი - „შობის ანგელოზი“ დღემდე ინარჩუნებს განსაკუთრებულ პოპულარობას მომხმარებლებში.

ამასთანავე, ვფიქრობთ ახალი დიზაინების დამატებას საცალო კოლექციაშიც, რათა ჩვენს ერთგულ მომხმარებლებს კვლავ შევთავაზოთ განსხვავებული, ესთეტიკური და განსაკუთრებული პროდუქტები.

თქვენი ერთ-ერთი მთავარი უპირატესობა ქართველ არტისტებთან თანამშრომლობა და ექსკლუზიური დიზაინებია. როგორ ვითარდება ეს მიმართულება და იგეგმება თუ არა ახალ მხატვრებთან ან ილუსტრატორებთან თანამშრომლობა?

ქართველ ხელოვანებთან თანამშრომლობა Lilat Home-ის ერთ-ერთი მთავარი ღირებულება იყო და დღემდე ასეთად რჩება. ჩვენთვის მნიშვნელოვანია, რომ თითოეულ პროდუქტს მხოლოდ პრაქტიკული დანიშნულება კი არა, საკუთარი მხატვრული ხასიათი და ისტორია ჰქონდეს.

სწორედ ამიტომ, ამ მიმართულებით საკმაოდ საინტერესო სიახლეებს ვამზადებთ. იგეგმება თანამშრომლობა ცნობილ ქართველ მხატვრებთან და კალიგრაფისტებთან, რომელთა შემოქმედებაც, ვფიქრობთ, სრულიად ახალ და განსაკუთრებულ ხასიათს შესძენს ჩვენს მომავალ კოლექციებს.

ამ ეტაპზე ჯერ კიდევ მოლაპარაკებების პროცესში ვართ, ამიტომ კონკრეტული სახელებისა და გვარების დასახელებისგან თავს შევიკავებ. თუმცა შემიძლია გითხრათ, რომ ეს იქნება ძალიან საინტერესო და მნიშვნელოვანი სიახლე როგორც ჩვენი ბრენდისთვის, ისე ქართველი მომხმარებლებისთვის.

გვჯერა, რომ ხელოვნებისა და ყოველდღიური ცხოვრების ერთმანეთთან დაკავშირება სწორედ ის მიმართულებაა, რომელიც Lilat Home-ს განსაკუთრებულ იდენტობას ანიჭებს.

წინა ინტერვიუში სამომავლო გეგმებს შორის საერთაშორისო ბაზარზე გასვლაც დაასახელეთ. რა ნაბიჯები გადაიდგა ამ მიმართულებით და რა გეგმები აქვს Lilat Home-ს წლის დარჩენილი პერიოდისთვის?

სასიამოვნოა, რომ Lilat Home-ის პროდუქცია უკვე საქართველოს ფარგლებს გარეთაც არის წარმოდგენილი. ჩვენი ტექსტილი არაერთი ქართული რესტორნის ინტერიერის ნაწილია, როგორც საქართველოში, ისე საერთაშორისო ბაზარზე.

მათ შორისაა ქართული რესტორანი „ხომლი“ გერმანიაში, „ოდა ჰაუსი“ ამერიკაში და „ივერია“ ვალენსიაში. ჩვენთვის განსაკუთრებით საამაყოა, რომ ქართული დიზაინით შექმნილი პროდუქცია სხვადასხვა ქვეყანაში ქართული სტუმართმოყვარეობისა და კულტურის წარმოჩენის ნაწილიც ხდება.

ვფიქრობ, ეს მნიშვნელოვანი ნაბიჯია საერთაშორისო მიმართულებით და კიდევ ერთხელ გვარწმუნებს, რომ ქართულ დიზაინს საზღვრებს გარეთაც დიდი პოტენციალი აქვს.

რაც შეეხება წლის დარჩენილ პერიოდს, ამ ეტაპზე ჩვენი მთავარი პრიორიტეტი საახალწლო კოლექციის კორპორატიული გაყიდვებია. საახალწლო სეზონი Lilat Home-ისთვის ყოველთვის განსაკუთრებული იყო და წელსაც აქტიურად ვმუშაობთ, რომ კომპანიებს შევთავაზოთ განსხვავებული, ინდივიდუალური დიზაინით შექმნილი პროდუქტები.

პარალელურად, ვგეგმავთ საცალო მიმართულების განახლებასაც და ახალი დიზაინების დამატებას. ჩვენი მიზანია, Lilat Home განაგრძობდეს განვითარებას ისე, რომ შეინარჩუნოს ის მთავარი ღირებულებები, რომლებზეც ბრენდი შეიქმნა - ქართული ხელოვნების სიყვარული, ხარისხი და ინდივიდუალურობა.