„ქალაქობანა" მულტიფუნქციური საბავშვო სივრცეა, რომელმაც ბაზარზე ოპერირება ახლახან დაიწყო. მეტი ინფორმაციისთვის Business Insider Georgia კომპანიის დამფუძნებლებს - მარიამ და ნინო მაისურაძეებს ესაუბრა.

როგორია კომპანიის საქმიანობის სპეციფიკა, როდიდან ოპერირებთ ბაზარზე და
რას სთავაზობთ მომხმარებლებს?

„ქალაქობანა" არის მულტიფუნქციური საბავშვო სივრცე, რომელიც სულ ცოტა ხნის წინ შევქმენით. ჩვენი მთავარი მიზანია შევქმნათ გარემო, სადაც ბავშვები თამაშით სწავლობენ, იკვლევენ და საკუთარ სამყაროს ქმნიან.

„ქალაქობანა“ არ არის უბრალოდ გასართობი სივრცე - ეს არის ადგილი, სადაც თითოეული აქტივობა განვითარებაზეა ორიენტირებული. მომხმარებლებს ვთავაზობთ ისეთ გამოცდილებას, რომელიც ერთდროულად არის სასიამოვნოც და ღირებულიც, როგორც ბავშვებისთვის, ისე მშობლებისთვის.

როგორია „ქალაქობანა"-ში არსებული აქტივობები და რა გამოცდილებას
სთავაზობთ ბავშვებს?

„ქალაქობანა“ აერთიანებს რამდენიმე განსხვავებულ, მაგრამ ერთმანეთთან დაკავშირებულ გამოცდილებას.

ერთ-ერთი მთავარი მიმართულებაა როლური თამაშების სივრცე - ადგილი, სადაც ბავშვები ირგებენ „დიდების როლს", ქმნიან საკუთარ სცენარებს და თამაშის პროცესში სწავლობენ.

მეორე მიმართულებაა შემოქმედებითი ვორქშოპები - აქ ბავშვები საკუთარი ხელით ქმნიან სხვადასხვა ნივთებს, ავითარებენ მოტორულ და კრეატიულ უნარებს და სწავლობენ ექსპერიმენტირებას.

ასევე ვთავაზობთ დაბადების დღეების განსხვავებულ ფორმატს - უფრო გამოცდილებაზე ორიენტირებულს, სადაც ბავშვები არა მხოლოდ ერთობიან, არამედ ჩართულები არიან აქტივობებში.

ახლახან დავიწყეთ DIY ნაკრებების შექმნაც, რომელიც ქალაქობანას სამყაროს სახლშიც „აგრძელებს" - ბავშვი თავად ქმნის პერსონაჟებს და თამაშს დამოუკიდებლად აგრძელებს.

ჩვენ გვინდოდა შეგვექმნა სივრცე, სადაც ბავშვი არ ისმენს ინსტრუქციებს „როგორ უნდა ითამაშოს", არამედ თავად ქმნის თამაშს.

რას მიიჩნევთ კომპანიის კონკურენტულ უპირატესობად?

ჩვენი მთავარი განსხვავება არის ის, რომ „ქალაქობანა“ არ არის სტანდარტული გასართობი სივრცე.

აქ ყველაფერი იწყება იდეით რომ თამაში არის განვითარების მთავარი ინსტრუმენტი.
ჩვენი სივრცე მთლიანად ჩვენი ხელით არის შექმნილი - დეტალიდან დეტალამდე და თითოეული ელემენტი გააზრებულია ბავშვის საჭიროებებიდან გამომდინარე.

ვქმნით არა მხოლოდ აქტივობებს, არამედ გამოცდილებას, სადაც:

ბავშვი თავისუფალია, მისი ფანტაზია - მთავარი, და პროცესი - შედეგზე უფრო მნიშვნელოვანი.

ასევე მნიშვნელოვანი უპირატესობაა ის, რომ მუდმივად ვვითარდებით - ვამატებთ ახალ აქტივობებს, ვქმნით პროდუქტებს და ვცდილობთ, „ქალაქობანა“ იყოს ცოცხალი, მზარდი სივრცე.

როგორია კომპანიის სამომავლო გეგმები და განვითარების ხედვა?

ჩვენი უახლოესი მიზანია არსებული სივრცის კიდევ უფრო განვითარება და გამრავალფეროვნება - მეტი მასტერკლასი, მეტი თემატური აქტივობა და მეტი შესაძლებლობა ბავშვებისთვის.

აქტიურად ვმუშაობთ DIY ნაკრებების მიმართულების განვითარებაზეც, რათა ქალაქობანას გამოცდილება სივრცის გარეთაც გაგრძელდეს.

ასევე ვგეგმავთ B2B მიმართულების გაძლიერებას - სხვადასხვა კომპანიასთან თანამშრომლობას, ერთობლივ აქტივობებს და პროდუქტებს.

გრძელვადიანად კი ჩვენი მიზანია უფრო მასშტაბური სივრცის შექმნა და მეორე ფილიალის გახსნა, რათა ქალაქობანა კიდევ უფრო მეტ ბავშვსა და ოჯახს მისწვდეს.

ინფორმაციისთვის, „ქალაქობანა“ მდებარეობს ბესარიონ ჟღენტის N7ა-ში.