La fée 2017 წელს დაფუძნებული ქართული კოსმეტიკური ბრენდია, რომელიც სხეულისა და თმის სურნელოვანი მოვლის პროდუქტებს ქმნის და განსხვავებული ვიზუალური იდენტობით გამოირჩევა.

ბრენდის საქმიანობის, განვითარების ხედვისა და სამომავლო გეგმების შესახებ Business Insider Georgia-ს La Fée-ს დამფუძნებელი ნინი ლომაძე ესაუბრა.

როგორია კომპანიის საქმიანობის სპეციფიკა და როდიდან ოპერირებთ ბაზარზე?

La Fée ( ლაფე) ქართული კოსმეტიკური ბრენდია, რომელიც სხეულისა და თმის სურნელოვან მოვლის პროდუქტებს ქმნის. ჩვენი მიზანია, ყოველდღიური თავის მოვლა სასიამოვნო და გემრიელ გამოცდილებად ვაქციოთ.

ბრენდის სახელწოდება ფრანგული სიტყვიდან - La Fée მოდის და ქართულად „ფერიას"ნიშნავს, რაც ჩვენს მთავარ იდეას გამოხატავს: ყოველდღიურობას მცირე ჯადოსნურობა შევმატოთ. ლაფე ქართულ ბაზარზე 2017 წლიდან ოპერირებს.

რა სახის პროდუქციას სთავაზობთ ამჟამად მომხმარებლებს?

ამჟამად, ჩვენს მომხმარებლებს ვთავაზობთ სხეულისა და თმის სურნელოვან მისტებს (სუნამოს), ბრჭყვიალა შიმერებს, რუჯის აქტივატორებს და სხეულის მოვლის პროდუქტებს. ჩვენი პროდუქცია გამოირჩევა გურმანული, დესერტებით შთაგონებული არომატებით, მათ შორის ვანილის, კარამელის, კრუასანის, ფისტისა და ხილის ნოტებით. ჩვენი სურნელები მარტივად ამოსაცნობია და ისეთი სიტყვები, როგორიცაა ტკბილი, გემრიელი, ნაზი და დასამახსოვრებელი, მომხმარებლისთვის უკვე ჩვენს ბრენდთან ასოცირდება.

რას მიიჩნევთ კომპანიის მთავარ კონკურენტულ უპირატესობად?

ჩვენი მთავარი კონკურენტული უპირატესობა არის სხეულის მოვლის, გამორჩეული გურმანული სურნელებისა და მარტივად ამოსაცნობი ვიზუალური სტილის ერთიანობა. ვქმნით არა მხოლოდ პროდუქტებს, არამედ სრულ სურნელოვან გამოცდილებას, სადაც მომხმარებელს შეუძლია სხვადასხვა პროდუქტი ერთმანეთს შეუხამოს და საკუთარი მოვლის რიტუალი შექმნას. სწორედ ეს გამორჩეული ხელწერა და ბრენდთან დაკავშირებული განსაკუთრებული განწყობა გვაძლევს ბაზარზე განსხვავებულ პოზიციას. 

ბრენდის გამორჩეულობას განსაზღვრავს:

• დესერტებითა და მოგონებებით შთაგონებული გურმანული არომატები;
• მოვლისა და სურნელის ერთ პროდუქტში გაერთიანება;
• თანამედროვე, ადვილად ამოსაცნობი ვიზუალური იდენტობა;
• სეზონური კოლექციები და შეზღუდული გამოშვებები;
• საინტერესო კოლაბორაციები სხვა ბრენდებთან;
• მომხმარებელთან მუდმივი და უშუალო კომუნიკაცია.

როგორია კომპანიის სამომავლო გეგმები და განვითარების ხედვა?

La Fée-ს განვითარების ხედვაა, ჩამოყალიბდეს საერთაშორისო მასშტაბის სურნელოვანი სხეულის მოვლის ბრენდად, რომელსაც საკუთარი, მკაფიოდ ამოსაცნობი ხასიათი, ვიზუალური სამყარო და პროდუქტის ხელწერა ექნება.

სამომავლოდ ვგეგმავთ ასორტიმენტის გაფართოებას და სხეულის მოვლის სრულყოფილი სურნელოვანი ხაზების შექმნას. ასევე ვგეგმავთ ახალი სურნელების, სეზონური და შეზღუდული კოლექციების გამოშვებას, სხვადასხვა სფეროს ბრენდებთან კოლაბორაციებს, გაყიდვების არხების გაფართოებასა და ევროპულ ბაზარზე შესვლას. ჩვენთვის განსაკუთრებით სიმბოლურია, რომ La Fée-ს პირველი საექსპორტო მიმართულება საფრანგეთი იყოს. ბრენდის სახელწოდება სწორედ ფრანგული სიტყვიდან - "La Fée" მოდის და ქართულად „ფერიას" ნიშნავს. შესაბამისად, საფრანგეთის ბაზარზე შესვლა ჩვენთვის მხოლოდ ბიზნესგაფართოება არ იქნება - ეს იქნება ბრენდის ისტორიის, იდენტობისა და თავდაპირველი შთაგონების ბუნებრივი გაგრძელება. გრძელვადიან პერსპექტივაში გვინდა, La Fée გახდეს საერთაშორისო ცნობადობის მქონე ქართული ბრენდი, რომელიც მომხმარებელს სხეულის მოვლასთან ერთად გამორჩეულ სურნელს, ემოციასა და თავდაჯერებულობის შეგრძნებას სთავაზობს. ჩვენი მიზანია, La Fée-ს პროდუქტების გამოყენება ადამიანებისთვის ყოველდღიურ, საყვარელ რიტუალად იქცეს საქართველოში, საფრანგეთსა და მსოფლიოს სხვა ქვეყნებში.