საქართველოში სადაზღვევო ბაზარზე 19 კომპანია ოპერირებს და მაღალი კონკურენციის მიუხედავად, სექტორი ჯერ კიდევ მცირე ზომისაა,  - ამის შესახებ „არდის" გენერალურმა დირექტორმა მიხეილ ჯაფარიძე  ტელეკომპანია „მაესტროს" ეთერში, გადაცემა Business Insider Georgia-ში სტუმრობისას განაცხადა.

მისი თქმით, სადაზღვევო კომპანიების მოგების სტრუქტურაში მნიშვნელოვანი წილი საინვესტიციო შემოსავლებზე მოდის, ხოლო წმინდა სადაზღვევო მარჟები შედარებით მოკრძალებულია, რაც ბაზრის განვითარების სპეციფიკას ასახავს.

„საქართველოში 19 სადაზღვევო კომპანიაა რეგისტრირებული. იმ ფონზე, როდესაც ბაზარი ჯერ კიდევ პატარაა და სავალდებულო დაზღვევის სახეობები არ გვაქვს, კონკურენცია ძალიან მაღალია.
იმ ფონზე, როდესაც 19 სადაზღვევო კომპანიაა რეგისტრირებული, ცხადია, ეს არ არის მცირე მაჩვენებელი. ჩვენ თითქმის იმდენივე სადაზღვევო კომპანია გვყავს, რამდენიც ბანკია, თუმცა საბანკო სისტემა ბევრად უფრო განვითარებულია, ვიდრე სადაზღვევო სექტორი.

ამის დასტურია თავად სადაზღვევო მარჟაც (ე.წ. კომბინირებული ზარალიანობა), რომელიც საკმაოდ მოკრძალებულია. სადაზღვევო კომპანიების მოგებაში ძალიან დიდი წილი უჭირავს ე.წ. საინვესტიციო შემოსავალს - მარტივად რომ ვთქვათ, ეს არის დეპოზიტებიდან მიღებული სარგებელი. ეს სახსრები აუცილებელია კაპიტალის ადეკვატურობისა და საზედამხედველო მოთხოვნების დასაკმაყოფილებლად. მოგებაში სწორედ ამ აქტივების გენერირებული თანხების კონტრიბუციაა გადამწყვეტი. თუ ამ შემოსავალს გამოვყოფთ, დავინახავთ, რომ უშუალოდ სადაზღვევო საქმიანობიდან მიღებული მარჟა საკმაოდ მცირეა", - აცხადებს მიხეილ ჯაფარიძე.