საქართველოს ბიზნეს ასოციაცია პროფესიული განათლების ეროვნული ჯილდოს პარტნიორია

ბიზნესი

„ფრუტერა“ წარმოების ზრდას და ადგილობრივ ბაზარზე პოზიციების გამყარებას გეგმავს

05.06.2026.18:00

„ფრუტერა“, რომელიც 2021 წელს დაარსებული ქართული საოჯახო ბიზნესია, პროდუქციის ასორტიმენტს აფართოებს და მომხმარებელს ახალ პროდუქტებსა და განახლებულ შეფუთვებს სთავაზობს. კომპანიამ ბაზარზე მრავალჯერადი გამოყენებისთვის განკუთვნილი zip ტიპის შეფუთვები წარადგინა, ასორტიმენტს კი პომიდვრის ჩირი ზეითუნის ზეთში და პომიდვრის პესტო დაამატა. მზარდი მოთხოვნის, სუპერმარკეტებთან თანამშრომლობის გეგმებისა და წარმოების განვითარების შესახებ Business Insider Georgia-ს „ფრუტერას“ დამფუძნებელი დავით გელუტაშვილი ესაუბრა.

„გამოვუშვით ახალი zip ტიპის შეფუთვები, რომლებიც მრავალჯერადი გამოყენებისთვისაა განკუთვნილი და მომხმარებელს საშუალებას აძლევს პროდუქტი გახსნის შემდეგაც კომფორტულად შეინახოს ისე, რომ ჩირი არ გამოშრეს. ჯამში წარმოდგენილია 8 სახის შეფუთვა, მათ შორის 240 გრამიანი და 100 გრამიანი ვარიანტები.

ასორტიმენტს ასევე დაემატა პომიდვრის ჩირი ზეითუნის ზეთში, რომელიც 100 გრამიან შეფუთვაში იქნება ხელმისაწვდომი და პომიდვრის პესტო. პროდუქცია უკვე იყიდება ერთ-ერთ მცირე მაღაზიაში და საკმაოდ მოთხოვნადია, რაც განპირობებულია მაღალი ხარისხის ნედლეულითა და გემოვნური თვისებებით “, - აცხადებს დავით გელუტაშვილი.

კომპანიის პროდუქციას შორის ყველაზე მაღალი მოთხოვნა ქლიავის ჩირზე ფიქსირდება.

„ყველაზე დიდი რაოდენობით ქლიავის ჩირი იყიდება. მიუხედავად შარშანდელი რთული სეზონისა და ნედლეულის მაღალი ფასისა, ქლიავის ჩირი კვლავ რჩება ყველაზე მოთხოვნად პროდუქტად, რასაც მოსდევს ვაშლის ჩირი. ზოგადად, სხვა პროდუქტებზეც მზარდი მოთხოვნა ფიქსირდება. გასულ წელს ასორტიმენტს დაემატა ლეღვის ჩირი, ლეღვის ტყლაპი და ნატურალური წვენები. მთლიანობაში, მოთხოვნა სტაბილურად მზარდია, რაც, ჩვენი შეფასებით, განპირობებულია ბრენდის ცნობადობის ზრდითა და პროდუქციის დაგემოვნების შემდეგ მომხმარებელთა ლოიალობით “, - ამბობს კომპანიის დამფუძნებელი.

კომპანია სამომავლოდ პროდუქციის განთავსებას სხვადასხვა სუპერმარკეტების ქსელში გეგმავს.

„სამომავლოდ ვგეგმავთ პროდუქციის განთავსებას რამდენიმე სუპერმარკეტში. ამ ეტაპზე მოლაპარაკებები მიმდინარეობს. არ ვგეგმავთ ფართო ქსელში შესვლას - ჩვენთვის მნიშვნელოვანია, რომ პარტნიორი სუპერმარკეტები პრემიუმ ხარისხის პროდუქტებზე იყვნენ ორიენტირებულნი.

წარმოების ზრდის კუთხით ვგეგმავთ არსებული ასორტიმენტის განვითარებას. ქლიავის ჩირის წარმოება გაიზრდება დაახლოებით 30%-ით, ხოლო სხვა პროდუქტებზე ზრდა 5-10%-ის ფარგლებში იქნება, რაც დამოკიდებულია ნედლეულის ფასებზე. მიმდინარე პროგნოზით, ქლიავის ნედლეულის ფასი შარშანდელთან შედარებით უფრო დაბალი იქნება, რაც დაგეგმვის შესაძლებლობას გვაძლევს.
ჩვენი ფოკუსი საქართველოს ბაზარზე რჩება - ვგეგმავთ ადგილობრივ ბაზარზე პოზიციების გამყარებას, შემდეგ კი საერთაშორისო ბაზრებზე გასვლასაც განვიხილავთ“ , - აღნიშნავს დავით გელუტაშვილი.