სახელმწიფოს გაცხადებული მიზანია მაღალი ხარისხის ინფრასტრუქტურა, - ამის შესახებ ინფრასტრუქტურის მშენებელთა ასოციაციის აღმასრულებელმა დირექტორმა, ირაკლი გიორგობიანმა ტელეკომპანია „მაესტროს“ ეთერში გადაცემა Business Insider Georgia-ში სტუმრობისას განაცხადა.

„მოგეხსენებათ, რომ წლევანდელი წელი მნიშვნელოვანი ცვლილებების წელია ამ სექტორისთვის. დავიწყოთ იმით, რომ მიმდინარე წელს მოხდა ორი მნიშვნელოვანი პირობის ცვლილება. მიღებულია დადგენილება, რომელიც, ერთი მხრივ, უზრუნველყოფს ფასწარმოქმნას, ზედნადები ხარჯებისა და მოგების განაკვეთის დარიცხვას, ხოლო, მეორე მხრივ, მოხდა საკანონმდებლო ცვლილება ინდექსაციის კუთხით, რომლის შესაბამისადაც სახელშეკრულებო ღირებულების ცვლილება შესაძლებელი იქნება ინდექსაციის შედეგად.

ამის გარდა, მოგეხსენებათ, რომ უკვე მიმდინარე წელს სამხარაულის ეროვნული ბიურო აქვეყნებს ფასებს როგორც შრომის დანახარჯებზე, ასევე მასალებსა და მექანიზაციაზე, რასაც ყოველკვარტალურად ახორციელებს.

გასულ კვირას, ბატონი ინფრასტრუქტურის მინისტრის ინიციატივით, შეხვედრა იყო ხარჯთაღრიცხველებთან. მოგეხსენებათ, რომ ნებისმიერი რეფორმის წარმატება დამოკიდებულია იმაზე, თუ რამდენად ეფექტურად და წარმატებით მოხდება მისი იმპლემენტაცია. ამ შეხვედრის მიზანიც სწორედ ის იყო, რომ ხარჯთაღრიცხველებს, რომლებიც კრიტიკულ როლს თამაშობენ ზოგადად ამ სექტორში, მათ შორის პროექტებთან მიმართებით, განემარტათ აღნიშნული საკითხები.

სახელმწიფოს გაცხადებული მიზანია მაღალი ხარისხის ინფრასტრუქტურა, რომელიც, შესაბამისად, ადეკვატური ფასწარმოქმნით მიიღწევა. სწორედ იმ პრობლემებზე საპასუხოდ, რომლებიც ფასწარმოქმნის ეტაპზე, ამ შემთხვევაში კი წინა სატენდერო ხარჯთაღრიცხვების ფორმირების ნაწილში, იქმნება, გაიმართა ეს გაფართოებული შეხვედრა.

ზოგადად, მოგეხსენებათ, რომ დღევანდელი მთავრობა, მათ შორის ინფრასტრუქტურის სამინისტრო, გამოირჩევა ღიაობით და კერძო სექტორთან ხშირი ურთიერთობითა და კონტაქტით. მათ შორის, ჩვენც ჩამოგვიყალიბდა საკმაოდ პროფესიული და ეფექტური თანამშრომლობის პრაქტიკა, რაც გვაძლევს იმის რწმენას, რომ ხვალინდელი დღე კიდევ უკეთესი იქნება.

ერთობლივად ვმუშაობთ იმ იდენტიფიცირებულ პრობლემებზე, რომლებიც ამ რეფორმებისა და გაცხადებული პოლიტიკის იმპლემენტაციისთვის არის მნიშვნელოვანი“, - განაცხადა ირაკლი გიორგობიანმა.