ჩვენი მთავარი სიახლე არის ის, რომ ბორანი განვაახლეთ და შევცვალეთ დიზაინი , - ამის შესახებ, Business Insider Georgia-ს კომპანია Borani River Tour - ის ერთ-ერთმა დამფუძნებელმა კონსტანტინე ქიტიაშვილმა განუცხადა.

„ჩვენი მთავარი სიახლე ის არის, რომ ბორანი განვაახლეთ - შევცვალეთ დიზაინი, გარკვეული დეტალებიც გადავაკეთეთ და სივრცე უფრო კომფორტული გავხადეთ. გარდა ამისა, ცვლილებები შევიტანეთ მენიუში: მოთხოვნა ქართულ სამზარეულოზე იყო და შესაბამისად, გავზარდეთ ქართული კერძების რაოდენობა “, - აცხადებს კონსტანტინე ქიტიაშვილი.

ჯავშნების კუთხით ზრდის ტენდენცია ამ ეტაპზე არ შეინიშნება, თუმცა მოლოდინი პოზიტიურია.

„საერთაშორისო კონფლიქტმა გავლენა იქონია როგორც ტურიზმზე, ისე ჩვენს სფეროზე. ამ ეტაპზე ტურისტების ზრდა არ შეინიშნება - სამწუხაროდ, ბევრი ჯავშანი გაუქმდა. აპრილი-მაისის პერიოდში კლებაც გვაქვს, თუმცა ვნახოთ, რა იქნება ზაფხულის სეზონზე.

ვცდილობთ აქტიურად ვიმუშაოთ. ინფორმაცია, რაც ამ ეტაპზე გვაქვს, პოზიტიურია - ზაფხულის ჯავშნები სასტუმროებში მზარდია. მოგეხსენებათ, ტურიზმის სექტორში ყველა ერთმანეთთან პირდაპირ კავშირში ვართ: შესაბამისად, თუ სასტუმროების ჯავშნები იზრდება, სხვა ტიპის მომსახურებებზეც მოთხოვნა მატულობს “, - ამბობს კომპანიის დამფუძნებელი.

Borani River Tour აქტიურად გეგმავს გაფართოებას და სხვადასხვა მცურავი საშუალებების დამატებას.

„სამომავლოდ ვგეგმავთ მცურავი საშუალებების დამატებასა და განახლებას, თანამედროვე ტიპის ნავების შემოყვანას და მომხმარებლისთვის უფრო კომფორტული სერვისის შეთავაზებას “, - აღნიშნავს კონსტანტინე ქიტიაშვილი.