„ქართული კალათა“ 2015 წელს დაარსდა და ქართულ, ტრადიციულ და ინოვაციურ პროდუქციაზეა ფოკუსირებული. არსებულ სიახლეებსა და სამომავლო გეგმებზე Business Insider Georgia კომპანიის თანადამფუძნებელს, ვაკო ელისაბედაშვილი ესაუბრა.

„როგორც მოგეხსენებათ, პირველი მაღაზია გვქონდა ლესელიძის ქუჩაზე, სადაც ძირითადი აქცენტი არტიზანულ ყველზე იყო გაკეთებული - პროდუქტზე, რომელსაც საქართველოში რამდენიმე მწარმოებელი აწარმოებს.

ამ დრომდე ეს მიმართულება მცირე მასშტაბით გვქონდა შენარჩუნებული, თუმცა მარტიდან გავაფართოვეთ - „ბაზარი ორბელიანზე“ უფრო დიდი სივრცე ავიღეთ და ღია ტიპის მაღაზია გავხსენით. ასევე, ბამბის რიგში არსებული მცირე მაღაზია გადავაკეთეთ იმავე კონცეფციით - ძირითადად ყველის მიმართულებით, თუმცა სხვა პროდუქციაც შევინარჩუნეთ.

ამ ცვლილებებმა დაახლოებით 30%-იანი ზრდა მოგვცა. აღნიშნულ პერიოდს დაემთხვა ახლო აღმოსავლეთში მიმდინარე ომი, რამაც ტურისტულ ნაკადებზე იმოქმედა. ჩვენთვის მნიშვნელოვანი სეგმენტი სწორედ აღმოსავლეთის ბაზარია, განსაკუთრებით ტკბილეულის მიმართულებით, თუმცა მიუხედავად ამისა, მაღაზიებში მაინც პოზიტიური დინამიკა შენარჩუნდა და კლების ნაცვლად ზრდა დაფიქსირდა.

გარდა ამისა, ვხსნით საწარმოს და უახლოეს პერიოდში, სავარაუდოდ, ივნისის შუა რიცხვებში, სატესტო რეჟიმში დავიწყებთ გარკვეული პროდუქციის წარმოებას“, - აცხადებს ვაკო ელისაბედაშვილი.

სამომავლოდ კომპანია ექსპორტის მიმართულებით გაფართოებას გეგმავს.

„ასორტიმენტის მიმართულებით მუდმივად ვცდილობთ განვითარებას და, ჩვენი კონცეფციიდან გამომდინარე, მომავალში ვხედავთ ექსპორტის გაფართოების შესაძლებლობასაც. ჩვენ ვაწარმოებთ განსხვავებულ პროდუქტებს და ჩვენი მიზანია, უცხოეთში არსებული ქართული მაღაზიები თუ რესტორნები ერთ მწარმოებელთან თანამშრომლობდნენ და მცირე რაოდენობით, მაგრამ ფართო არჩევანით შეეძლოთ სხვადასხვა პროდუქტის შეძენა.

ამჟამად, მსგავსი მოთხოვნა გვაქვს კვიპროსიდანაც და ამ მიმართულებით აქტიურად ვმუშაობთ. პარტნიორებს სჭირდებათ მცირე პარტიებით სხვადასხვა პროდუქცია - მათ შორის ტკბილეული, სანელებლები და საწებლები. იდეა ის არის, რომ ერთი პალეტით, ერთ რესტორანს შეეძლოს სხვადასხვა პროდუქტის შეკვეთა კონკრეტული ქალაქიდან და ჩვენ სწორედ ამ მოდელზე ვმუშაობთ.

მსგავსი გამოცდილება უკვე გვქონდა ლიტვასთანაც, სადაც რამდენჯერმე განვახორციელეთ მცირე რაოდენობებით, მაგრამ მრავალფეროვანი პროდუქციის ექსპორტი “, - ამბობს კომპანიის თანადამფუძნებელი.

ინფორმაციისთვის, პროდუქციის შეძენა როგორც ფიზიკურ მაღაზიებში, ასევე ონლაინ მაღაზიაშიცაა შესაძლებელი. მომხმარებლები, პროდუქტებს ხშირად ყიდულობენ საჩუქრად - მეგობრებისთვის, ბიზნესპარტნიორებისთვის და თანამშრომლებისთვის, უცხოეთიდან ჩამოსული სტუმრებისთვის და უცხოეთში დამხვედრი მასპინძლებისთვის ან უბრალოდ საკუთარი თავისთვის.