„კდემა“ ქართული წარმოების აქსესუარების, ჩანთებისა და ტანსაცმლის ბრენდია, რომელიც 2022 წლიდან ოპერირებს ბაზარზე. შემოდგომის სეზონი კომპანიამ განახლებული კოლექციითა და გაფართოებული ასორტიმენტით დაიწყო. „კდემას“ საქმიანობის, საერთაშორისო მიმართულებისა და სამომავლო გეგმების შესახებ Business Insider Georgia-ს კომპანიის კრეატიული დირექტორი ანი ჯვარიძე ესაუბრა.

რა შეიცვალა კომპანიაში ბოლო პერიოდში და როგორ აფასებთ ამ ეტაპზე კომპანიის განვითარებას?

„კდემამ“ შემოდგომის სეზონი განახლებული კოლექციითა და გაფართოებული ასორტიმენტით დაიწყო. მიმდინარე სიახლეებს შორის განსაკუთრებით აღსანიშნავია სომხეთის ბაზარზე გასვლა, რაც ბრენდის საერთაშორისო განვითარების გზაზე კიდევ ერთი მნიშვნელოვანი ნაბიჯია.

სექტემბერში „კდემამ“ ერევანში პირველი კოლექცია გაგზავნა, რომელიც კონცეპტუალურ მულტიბრენდულ მაღაზია ser.evn-ში განთავსდა. მაღაზიაში სხვადასხვა ქვეყნის არაერთი ბრენდია წარმოდგენილი, რაც „კდემას“ შესაძლებლობას აძლევს, საკუთარი პროდუქცია საერთაშორისო ბრენდების გვერდით წარადგინოს და ახალ აუდიტორიას გააცნოს.

ჩვენთვის სომხეთის ბაზარზე გასვლა მხოლოდ გაყიდვების ახალი არხის დამატებას არ ნიშნავს. ეს არის შესაძლებლობა, ქართული წარმოების პროდუქცია კიდევ უფრო ფართო აუდიტორიას გავაცნოთ, გავზარდოთ ბრენდის ცნობადობა და გავაძლიეროთ ჩვენი პოზიციები საერთაშორისო ბაზარზე.

როგორია მოთხოვნა ამ ეტაპზე და რომელ პროდუქტებზეა ყველაზე მაღალი ინტერესი?

ბოლო პერიოდში განსაკუთრებით გაიზარდა მოთხოვნა „კდემას“ ფეხსაცმელებზე, რაც ჩვენთვის ამ მიმართულების განვითარების დამატებითი მოტივაცია გახდა.

საშემოდგომო კოლექციის ფარგლებში მომხმარებლებს სხვადასხვა დიზაინის ნატურალური ტყავის ლოფერებს ვთავაზობთ, რომლებიც აერთიანებს ბრენდისთვის დამახასიათებელ მინიმალისტურ ესთეტიკას, დახვეწილ დიზაინსა და პრაქტიკულობას.

როგორ ვითარდება ბრენდის საერთაშორისო მიმართულება და რა ეტაპზეა ესპანეთის ბაზარზე შესვლის პროცესი?

როგორც უკვე ცნობილია, „კდემა“ ესპანეთშიც, კერძოდ, ქალაქ ბილბაოშია წარმოდგენილი. ეს ბრენდის საერთაშორისო განვითარების გზაზე გადადგმული პირველი ნაბიჯი იყო.

ჩვენთვის განსაკუთრებით მნიშვნელოვანია, რომ საერთაშორისო ბაზარზე საქართველოში წარმოებული პროდუქცია წარმოვადგინოთ. გვჯერა, რომ ქართულ ბრენდებს აქვთ პოტენციალი, საკუთარი ადგილი დაიმკვიდრონ საერთაშორისო მოდის ინდუსტრიაში, და გვსურს, კდემაც ამ პროცესის ნაწილი იყოს.

საერთაშორისო მიმართულების გარდა, რა არის კომპანიის შემდეგი ნაბიჯები და რა გეგმები გაქვთ მომავალში?

უახლოეს მომავალში „კდემას“ განვითარების ერთ-ერთი მთავარი მიმართულება დამოუკიდებელი ექსკლუზიური ხაზის დამატება იქნება.

ახალი ხაზის ფარგლებში მომხმარებლებს კიდევ უფრო დახვეწილ პროდუქციას შევთავაზებთ, რომელიც ბრენდისთვის დამახასიათებელ ელეგანტურობასა და მინიმალიზმს შეინარჩუნებს, თუმცა განსხვავებული დიზაინითა და ესთეტიკური მიდგომით გამოირჩევა.

ჩვენი მთავარი პრიორიტეტი უცვლელია: შევქმნათ ხარისხიანი, გამორჩეული და მდგრადი პროდუქცია, რომელიც თანამედროვე ქალის ინდივიდუალურობასა და ცხოვრების სტილს გამოხატავს.

აღსანიშნავია, რომ „კდემა“ იყენებს ეკომეგობრულ მასალებს. პროდუქციის მიწოდება ხორციელდება როგორც საქართველოში, ასევე საერთაშორისო მასშტაბით. თბილისში შეკვეთები, როგორც წესი, მეორე დღესვე მიეწოდება მომხმარებელს, ხოლო რეგიონებში 3 სამუშაო დღის განმავლობაში.