„აღმაშენებელი“ ქართული თემატიკის ასაშენებელი და გასაფერადებელი კონსტრუქციების ბრენდია, რომლის მიზანიც მომხმარებლისთვის თამაშისა და შემოქმედებითი პროცესის მეშვეობით ქართული კულტურული მემკვიდრეობის გაცნობაა. ბრენდის კონცეფციის, განვითარების გზისა და სამომავლო გეგმების შესახებ Business Insider Georgia „აღმაშენებლის“ დამფუძნებელს თამარ ნაჭყებიას ესაუბრა.

როგორია კომპანიის საქმიანობის სპეციფიკა და როდიდან ოპერირებთ ბაზარზე?

„აღმაშენებლის" პროექტზე მუშაობა მე და ჩემმა ძმამ ერთად დავიწყეთ. იდეის ავტორი თავდაპირველად ოთო იყო, ხოლო მე შეიძლება ითქვას, რომ მის ჩანაფიქრს "ფრთები შევასხი" და იდეის რეალიზებაში აქტიურად ჩავერთე. ურთიერთმხარდაჭერითა და ერთობლივი შრომით პირველი პროდუქტი 2024 წელს შევქმენით და ბაზარზე გამოვიტანეთ.

ჩვენი საქმიანობა მოიცავს ქართული თემატიკის ასაშენებელი და გასაფერადებელი კონსტრუქციების შექმნას. ამ ეტაპზე მომხმარებლებს ვთავაზობთ ქართული კოშკების 5 განსხვავებულ მოდელს.

პროექტის მთავარი მიზანი მხოლოდ საქართველოს ისტორიული ძეგლებისა და არქიტექტურული მემკვიდრეობის პოპულარიზაცია არ არის. ჩვენთვის მნიშვნელოვანია, რომ ბავშვებსა და ახალგაზრდებში ადრეული ასაკიდანვე გავაღვივოთ ინტერესი საკუთარი ქვეყნის ისტორიის, კულტურისა და ტრადიციების მიმართ. „აღმაშენებელი" შემოქმედებითი პროცესის საშუალებით ხელს უწყობს პატრიოტული ღირებულებების ჩამოყალიბებას და ახალ თაობას სიმბოლურად ქვეყნის მომავალ აღმაშენებლებად ზრდის.

რა პროდუქტებს მოიცავს ამჟამად თქვენი ასორტიმენტი და როგორ ხედავთ მის განვითარებას/გაფართოებას?

ამჟამად, კომპანია აწარმოებს ქართული კოშკების 5 განსხვავებული მოდელს - ვაშლოვანი, სვანური, ერწო და ლებაისკარი. თითოეული მათგანი ხელნაკეთი ასაწყობი და გასაფერადებელი კონსტრუქციაა, რომელიც შემოქმედებითი პროცესის დასრულების შემდეგ დეკორატიულ სუვენირადაც შეიძლება გამოიყენებოდეს.

პარალელურად, აქტიურად ვმუშაობთ ახალი პროდუქტების შექმნაზე. უახლოეს მომავალში ვგეგმავთ ქართული სოფლის სახლების სერიის დამატებას, რაც მომხმარებლებს საქართველოს ტრადიციული არქიტექტურის კიდევ უფრო მრავალფეროვან ნიმუშებს გააცნობს. ჩვენი გრძელვადიანი მიზანია საქართველოს ყველა კუთხიდან მინიმუმ ერთი გამორჩეული ღირსშესანიშნაობის მოდელის შექმნა. გვინდა, მომხმარებლებს მივცეთ შესაძლებლობა, ეტაპობრივად შეაგროვონ ქვეყნის კულტურული და არქიტექტურული მემკვიდრეობის ამსახველი უნიკალური კოლექცია და ამავდროულად უკეთ გაეცნონ საქართველოს მრავალფეროვან ისტორიასა და ტრადიციებს.

რას მიიჩნევთ თქვენს მთავარ კონკურენტულ უპირატესობად ეკო-მეგობრული სათამაშოების ბაზარზე?

„აღმაშენებლის" მთავარი უპირატესობა მისი უნიკალური კონცეფციაა. ჩვენი პროდუქტი მხოლოდ ეკო მეგობრული სათამაშო არ არის - ის აერთიანებს შემოქმედებით, საგანმანათლებლო და კულტურულ ფუნქციებს.

კონსტრუქციის აწყობისა და გაფერადების პროცესი ხელს უწყობს ბავშვებში მოტორიკის, კონცენტრაციის, სივრცითი აზროვნებისა და შემოქმედებითი უნარების განვითარებას. ამავდროულად, როგორც ბავშვები, ისე უფროსები უფრო ახლოს ეცნობიან საქართველოს ისტორიულ არქიტექტურასა და კულტურულ მემკვიდრეობას.

ვფიქრობთ, „აღმაშენებლის" განსაკუთრებული ღირებულება სწორედ იმაში მდგომარეობს, რომ ის თამაშს, შემოქმედებით პროცესსა და ისტორიის გაცნობას ერთ პროდუქტში აერთიანებს. შედეგად, მომხმარებელი არა მხოლოდ სასიამოვნოდ ატარებს დროს, არამედ ცოდნასაც იღებს და ეცნობა საკუთარი ქვეყნის კულტურასა და ისტორიას.

⁠რას წარმოადგენს კომპანიის სამომავლო გეგმები - ახალი პროდუქტები, ბაზრის გაფართოება თუ სხვა მიმართულებები?

ჩვენი მთავარი მიზანია „აღმაშენებლის" ასორტიმენტის ეტაპობრივი გაფართოება და საქართველოს სხვადასხვა რეგიონის ისტორიული, კულტურული და არქიტექტურული ღირსშესანიშნაობების მოდელების შექმნა.

ასევე, ჩვენი მიზანია, პროექტი საინტერესო იყოს არა მხოლოდ ბავშვებისთვის, არამედ უფროსებისა და ტურისტებისთვისაც. სწორედ ამიტომ ვქმნით პროდუქტებს, რომლებიც ერთდროულად იქნება შემეცნებითი, შემოქმედებითი და დეკორატიული.

ჩვენი ხედვაა, „აღმაშენებელი" ჩამოყალიბდეს ქართულ კულტურულ მემკვიდრეობაზე დაფუძნებულ ბრენდად, რომელიც საქართველოს ისტორიას, არქიტექტურასა და ტრადიციებს თამაშისა და შემოქმედებითი გამოცდილების საშუალებით გააცნობს როგორც ადგილობრივ, ისე უცხოელ მომხმარებლებს.