საქართველოში ელექტროენერგიის მოხმარება მზარდია - მარიამ ჩახვაშვილი

ბიზნესი

წლის ბოლომდე ელექტროენერგიის მოხმარების კუთხით ზრდა 4-5%-ის ნიშნულზე შენარჩუნდება - მარიამ ჩახვაშვილი

29.06.2026.20:00

საქართველოში ელექტროენერგიის მოხმარება მზარდია, - ამის შესახებ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას Galt & Taggart-ის კვლევების დეპარტამენტის სექტორის უფროსმა, მარიამ ჩახვაშვილმა განაცხადა. მისი თქმით, მაისში ელექტროენერგიის მოხმარება წლიურად 3.6%-ით გაიზარდა, ხოლო ხუთი თვის საშუალო ზრდამ დაახლოებით 6% შეადგინა. მისივე თქმით, წლის ბოლომდე მოხმარების ზრდა სავარაუდოდ 4-5%-ის ფარგლებში შენარჩუნდება, რასაც როგორც ეკონომიკური აქტივობა, ისე სეზონური ფაქტორები განაპირობებს.

„საქართველოში ელექტროენერგიის მოხმარება მზარდია. მაისში 3.6-პროცენტიანი ზრდა დაფიქსირდა, ხოლო პირველი 5 თვის საშუალო მაჩვენებელმა, თუ სწორად მახსოვს, 6% შეადგინა. ეს მაღალი მაჩვენებელი მეტწილად იანვარსა და თებერვალში დაფიქსირებულმა მკვეთრმა მატებამ განაპირობა, რადგან წელს საკმაოდ ცივი ზამთარი დაემთხვა.

ზოგადად, ჩვენი გრძელვადიანი პროგნოზით, წლის განმავლობაში მოხმარების ზრდა, როგორც წესი, 3.5%-ის ფარგლებშია ხოლმე, თუმცა წელს, მთლიანობაში თუ შევაფასებთ, ეს მაჩვენებელი ცოტა უფრო მაღალია. ბევრწილად იმაზეც იქნება დამოკიდებული, თუ როგორი და რამდენად ცხელი ზაფხული გვექნება და როგორ გაიზრდება კონდიცირებისთვის საჭირო ელექტროენერგიის მოხმარება, თუმცა წლის ბოლომდე მატება, სავარაუდოდ, მაინც 4-5 პროცენტის ნიშნულზე შენარჩუნდება“, - აღნიშნა მარიამ ჩახვაშვილმა.