საქართველოს ეროვნულმა ბანკმა დაადასტურა სს „ლოტუს იმპექტ ფაინენსისა“ და მასთან ერთობლივად მოქმედი აქციონერების შესაფერისობა, რომელიც მიკრობანკი „კრისტალის” მნიშვნელოვანი წილის შეძენას უკავშირდება.

„კრისტალის” დამფუძნებელი აქციონერების ინტერესების გაერთიანებითა და ახალი, თანამოაზრე ინვესტორების მხარდაჭერით, „ლოტუსი” ყალიბდება საინვესტიციო, კორპორაციული მართვისა და ტექნოლოგიურ პლატფორმად, რომლის მიზანია კრისტალის დამოუკიდებელი განვითარება და მისი გრძელვადიანი წარმატება.

„კრისტალის ისტორია ქუთაისში დაიწყო, როდესაც აფხაზეთიდან დევნილმა ახალგაზრდებმა მცირე მეწარმეებისა და ოჯახებისთვის ახალი შესაძლებლობების შექმნა გადავწყვიტეთ. ამ ინიციატივიდან ჩამოყალიბდა ფინანსური ინსტიტუტი, რომელიც დღეს ათიათასობით მომხმარებელს ემსახურება.

დღეს ჩვენ ვაერთიანებთ გამოცდილებას, კაპიტალსა და ახალ შესაძლებლობებს, რათა კრისტალმა შეინარჩუნოს თავისი უნიკალური მისია და განვითარების ახალ ეტაპზე გადავიდეს.

გვჯერა, რომ საქართველოს სჭირდება ძლიერი, დამოუკიდებელი ფინანსური ინსტიტუტები და ჯანსაღი კონკურენცია, რაც მომხმარებლებისთვის მეტ არჩევანსა და უკეთეს მომსახურებას უზრუნველყოფს“, — აცხადებს „ლოტუსის” დირექტორი არჩილ ბაკურაძე.

„ლოტუსის” სტრატეგიული პრიორიტეტებია საქართველოს რეგიონებში მეწარმეობის მხარდაჭერა, სოფლის მეურნეობის განვითარება, ტექნოლოგიური ინოვაციები და გრძელვადიან პერსპექტივაში რეგიონულ ბაზრებზე გაფართოება.

„ლოტუსი” განსაკუთრებულ მნიშვნელობას ანიჭებს „კრისტალის” თანამშრომლების პროფესიონალიზმს, მომხმარებელთა ნდობასა და საერთაშორისო ინსტიტუციური ინვესტორებისა და კრედიტორების მნიშვნელოვან წვლილს კრისტალის განვითარებაში. პლატფორმა პარტნიორული ურთიერთობების გაგრძელებასა და გაღრმავებას საკუთარი გრძელვადიანი ხედვის მნიშვნელოვან ნაწილად მიიჩნევს.