საქართველოში სადაზღვევო ბროკერთა ასოციაცია - GIBA დაფუძნდა, რომლის ერთ-ერთი წევრი Magnus-ია, - ამის შესახებ, Business Insider Georgia-ს კომპანიის აღმასრულებელმა დირექტორმა მაია კახიანმა განუცხადა.

„საქართველოში სადაზღვევო ბროკერების პროფესიული გაერთიანება - GIBA (Georgian Insurance Brokers’ Association) დაფუძნდა. ახალი ასოციაცია აერთიანებს ლიცენზირებულ სადაზღვევო ბროკერებს და მისი მიზანია სექტორის განვითარება, პროფესიული სტანდარტების გაძლიერება და სადაზღვევო ბაზარზე ბროკერების როლის კიდევ უფრო გამოკვეთა.

GIBA სადაზღვევო ბროკერებისთვის ერთიანი პროფესიული პლატფორმა იქნება. ასოციაცია წევრი კომპანიების საერთო ინტერესების წარმომადგენლობასა და მათ შორის თანამშრომლობის გაძლიერებას გეგმავს. ორგანიზაცია ასევე იმუშავებს სახელმწიფო უწყებებთან, მარეგულირებელ ორგანოებთან, სადაზღვევო კომპანიებთან და სხვა დაინტერესებულ მხარეებთან თანამშრომლობის მიმართულებით.

ასოციაციის ერთ-ერთი მთავარი მიმართულება პროფესიული ეთიკისა და საქმიანობის მაღალი სტანდარტების განვითარება იქნება. GIBA ხელს შეუწყობს წევრი ბროკერების პროფესიულ განვითარებას, კვალიფიკაციის ამაღლებას და გამოცდილების გაზიარებას.

ასოციაციის საქმიანობა ეფუძნება გამჭვირვალობის, კეთილსინდისიერებისა და კლიენტის ინტერესების პრიორიტეტულობის პრინციპებს. GIBA-ში გაწევრიანება შეუძლია ნებისმიერ ლიცენზირებულ სადაზღვევო ბროკერს, რომელიც აღნიშნულ პროფესიულ პრინციპებს იზიარებს.

ახალი გაერთიანების ერთ-ერთი მნიშვნელოვანი ამოცანა სადაზღვევო ბროკერების სექტორში საერთო პროფესიული პოზიციების ჩამოყალიბება და მათი კოორდინირებული წარმომადგენლობა იქნება. ამასთან, ასოციაცია გეგმავს ბროკერებს შორის თანამშრომლობის გაძლიერებას და მათი გამოცდილებისა და პროფესიული ხედვების უფრო აქტიურად წარმოჩენას სადაზღვევო ბაზრის განვითარების პროცესში.

GIBA-ის გამგეობის თავმჯდომარეა გიორგი კანკია — სადაზღვევო საბროკერო კომპანია აქტონის დამფუძნებელი და დირექტორი.

ასოციაციის გამგეობის წევრები არიან:

• ლევან ჯიშკარიანი - დაზღვევისა და გადაზღვევის ბროკერი გრეკო ჯორჯია
• ია მესხი - რეზოლუშნ ინშუარანს ბროუქერს საქართველო
• ქეთევან ფავლენიშვილი - სადაზღვევო ბროკერი ჯი.ეს
• მაია კახიანი - მაგნუსი სადაზღვევო ბროკერი
• თეა ახალაძე - სადაზღვევო ბროკერი ვი ინშუარ
• ვახტანგ ჯავახაძე - სადაზღვევო საბროკერო კომპანია კალმა
• თამარ ცქიტიშვილი - სადაზღვევო ბროკერი ბროკერს ჰაბი
• ცირა ჯიქია - სადაზღვევო ბროკერი ვოლო

GIBA-ის დაფუძნებით საქართველოში სადაზღვევო ბროკერებისთვის ერთიანი პროფესიული პლატფორმა შეიქმნა, რომელიც სექტორის საერთო ინტერესების წარმომადგენლობას, პროფესიული სტანდარტების განვითარებას და ბროკერების როლის გაძლიერებას შეუწყობს ხელს“, - აცხადებს მაია კახიანი.