ხევსურეთში მდებარე საოჯახო სასტუმრო Guest House Ardoti ოპერირებას ანახლებს, - ამის შესახებ Business Insider Georgia-ს სასტუმროს დამფუძნებელმა, ლევან არდოტელმა, განუცხადა.

„განვაახლეთ ოპერირება, დავამატეთ საცხენოსნო ტურები და შევიძინეთ რამდენიმე ცხენი. ამ ეტაპზე ოთახების რაოდენობა არ გაზრდილა, თუმცა ეზოში ინფრასტრუქტურული ცვლილებები განვახორციელეთ - მოვაწყვეთ მცირე ტერასა. სამომავლოდ ვგეგმავთ დამატებითი საძინებლის აშენებას. ამჟამად, 30 ადამიანის განთავსების შესაძლებლობა გვაქვს, ხოლო ახალი ოთახების დამატების შემდეგ 34 სტუმრის განთავსებას შევძლებთ“,- აცხადებს ლევან არდოტელი.

სასტუმროში ჯავშნების მხრივ ვითარება სტაბილურია.

„ჯავშნების კუთხით ვითარება სტაბილურია. კარგ სეზონს ველოდებით, დადებითი მოლოდინები გვაქვს.

ჩვენთვის ერთ-ერთი გამოწვევა ადგილობრივი მუშახელის დეფიციტია. ახალგაზრდების ნაკლებობის გამო სამუშაოებს თავად ვასრულებთ, ხოლო შიდა პროცესებში რამდენიმე დაქირავებული თანამშრომელი გვეხმარება.

საცხენოსნო ტურების მიმართულებას წელს დავაკვირდებით და თუ შედეგი დადებითი იქნება, მომავალ წელს უკვე დამატებითი თანამშრომლის ჩართვასაც განვიხილავთ.

გარდა ტურისტული მიმართულებისა, აქტიურად ვაგრძელებთ სოფლის მეურნეობის განვითარებასაც - მივდევთ მესაქონლეობას, მოგვყავს ბოსტნეული და წელს მცირე სათბურის მოწყობასაც ვგეგმავთ. ამასთან, აქტიურად ვუვლით ფუტკრის 15 ოჯახს“,- აღნიშნავს სასტუმროს დამფუძნებელი.

ინფორმაციისთვის, სასტუმრო პირიქითა ხევსურეთში, სოფელ არდოტში, შატილიდან 20 კილომეტრში მდებარეობს და 2019 წლიდან ფუნქციონირებს.