ამჟამად Robo Coder-ისთვის განსაკუთრებით მნიშვნელოვანი პერიოდია - სასწავლო წელი დასასრულს უახლოვდება და აქტიურად ვემზადებით მოსწავლეების საბოლოო პროექტებისთვის “, - ამის შესახებ Business Insider Georgia-ს საგანმანათლებლო სივრცე Robo Coder-ის დამფუძნებელმა ნინო ბექაურმა განუცხადა.

რა მიმდინარე სიახლეებია Robo Coder-ში და რა ახალ შესაძლებლობებს სთავაზობთ მომხმარებლებს?

ამჟამად Robo Coder-ისთვის განსაკუთრებით მნიშვნელოვანი პერიოდია - სასწავლო წელი დასასრულს უახლოვდება და აქტიურად ვემზადებით მოსწავლეების საბოლოო პროექტებისთვის, შემაჯამებელი პრეზენტაციებისთვის, ასევე ბავშვებისთვის სერტიფიკატებისა და დიპლომების გადასაცემად. ჩვენთვის ეს მხოლოდ სეზონის დასრულება არ არის - ეს არის შესაძლებლობა, ვაჩვენოთ როგორც მშობლებს, ისე თავად ბავშვებს, რამდენად დიდი პროგრესი განიცადეს წლის განმავლობაში.

პარალელურად ვამზადებთ საზაფხულო პროგრამებსა და Robo Coder-ის ტრადიციულ STEM-ბანაკს, რომელიც ივნისში დაიწყება. ყოველწლიურად ვცდილობთ, ბანაკი იყოს არა მხოლოდ საგანმანათლებლო, არამედ თემატური და ბავშვებისთვის მაქსიმალურად საინტერესო და ინტერაქტიული. ამ სეზონზეც ვამზადებთ ახალ პროექტულ მიმართულებებს, სადაც გაერთიანდება რობოტოტექნიკა, ინჟინერია, პროგრამირება, ხელოვნება და გუნდური მუშაობა.

თქვენი დაკვირვებით, რა ფაქტორებმა განაპირობა Robo Coder-ის ზრდა და განვითარება?

Robo Coder-ის განვითარების ერთ-ერთი მთავარი ფაქტორი თავიდანვე იყო ის, რომ პროექტი შევქმენით როგორც გრძელვადიანი საგანმანათლებლო სივრცე 3-დან 15 წლამდე ასაკის ბავშვებისთვის. ამის წყალობით ბევრი მოსწავლე ჩვენთან რამდენიმე წლის განმავლობაში სწავლობს და ეტაპობრივად გადადის კონსტრუირების საწყისი უნარებიდან უფრო რთულ საინჟინრო და პროგრამულ პროექტებზე.

ძალიან მნიშვნელოვანი როლი აქვს პედაგოგების გუნდსაც. ბევრი მასწავლებელი ჩვენთან უკვე წლებია მუშაობს, კარგად იცნობს ბავშვებს და ახერხებს კომფორტული და მოტივაციის მომცემი გარემოს შექმნას.

მშობლები განსაკუთრებით აფასებენ ინდივიდუალურ მიდგომასა და მცირე ჯგუფებს, სადაც თითოეულ ბავშვს საკმარისი ყურადღება ექცევა. ჩვენთვის მნიშვნელოვანია არა მხოლოდ ტექნოლოგიების სწავლება, არამედ ისეთი უნარების განვითარებაც, რომლებიც ბავშვებს მომავალში აუცილებლად დასჭირდებათ - ლოგიკური აზროვნება, კრეატიულობა, კომუნიკაცია, დამოუკიდებლობა და გუნდური მუშაობა.

დღეს რა არის ის მთავარი ფაქტორები, რაც განსაზღვრავს Robo Coder-ის სტრატეგიას და როგორ პასუხობთ ბაზარზე გაზრდილ მოთხოვნას STEM განათლებაზე?

დღეს STEM-განათლება განსაკუთრებით სწრაფად ვითარდება, რადგან მშობლები სულ უფრო მეტად აცნობიერებენ მომავლის უნარების მნიშვნელობას. თანამედროვე ბავშვებისთვის მხოლოდ თეორიული ცოდნა აღარ არის საკმარისი - მნიშვნელოვანია ლოგიკური აზროვნება, ანალიზის უნარი, პროექტების შექმნა და ტექნოლოგიებთან ადრეული ასაკიდან მუშაობა.

სწორედ ამიტომ Robo Coder-ის სტრატეგია ეფუძნება პრაქტიკულ სწავლებას, ბავშვების ჩართულობასა და პროგრამების სხვადასხვა ასაკობრივ ჯგუფებზე მორგებას. ჩვენ ვცდილობთ, სწავლა იყოს ერთდროულად სასარგებლო და საინტერესო, რათა ბავშვებმა ტექნოლოგიები აღიქვან არა როგორც რთული თეორია, არამედ როგორც შემოქმედებისა და საკუთარი იდეების რეალიზების შესაძლებლობა.

ასევე ვხედავთ დიდ მოთხოვნას ხარისხიან საგანმანათლებლო გარემოზე, სადაც ბავშვი ემოციურადაც კომფორტულად გრძნობს თავს. ამიტომ ჩვენთვის მნიშვნელოვანია თანამედროვე ტექნოლოგიებს, ინდივიდუალურ მიდგომასა და მეგობრულ გარემოს შორის ბალანსის შენარჩუნება.

რა არის Robo Coder-ის შემდეგი ნაბიჯები და როგორ ხედავთ მის განვითარებას უახლოეს პერიოდში?

უახლოეს პერიოდში Robo Coder რამდენიმე მიმართულებით აქტიურ განვითარებას გეგმავს. ერთ-ერთი უახლოვესი პროექტია საზაფხულო STEM-პროგრამები და ბანაკი, რომლებიც ბავშვებს აძლევს შესაძლებლობას ინტენსიურ და შემოქმედებით ფორმატში მიიღონ ახალი ცოდნა.

ასევე განვიხილავთ ახალი ფილიალების გახსნას სხვა ქალაქებსა და რაიონებში, რათა თანამედროვე STEM-პროგრამები უფრო მეტი ოჯახისთვის გახდეს ხელმისაწვდომი.

კიდევ ერთი მნიშვნელოვანი მიმართულებაა ონლაინ-კურსების შექმნა პროგრამირებისა და რობოტოტექნიკის მიმართულებით. ეს მოგვცემს შესაძლებლობას, სასწავლო პროცესში ჩავრთოთ რეგიონებში მცხოვრები ბავშვებიც და კიდევ უფრო გავაფართოოთ პროექტის საგანმანათლებლო შესაძლებლობები.

სამომავლოდ ასევე დაინტერესებულები ვართ სკოლებთან თანამშრომლობითა და პარტნიორული საგანმანათლებლო პროგრამების განვითარებით, რაც თანამედროვე ტექნოლოგიური მიმართულებების დამატებით განათლებაში ინტეგრაციას შეუწყობს ხელს.