Schuchmann Wines-მა ბაზარზე ახალი ღვინო - რისლინგი 2024 გამოიტანა. როგორც Business Insider Georgia-სთან Schuchmann Group-ის გენერალურმა დირექტორმა, ნუცა აბრამიშვილმა განაცხადა, ღვინო დამზადებულია სოფელ კისისხევში მოწეული გერმანული რისლინგის ჯიშის ყურძნისაგან. ნუცა აბრამიშვილის თქმით, პროექტმა გაამართლა და პოპულარული გერმანული ჯიშის ყურძნისთვის კახეთის კლიმატური პირობები საუკეთესო აღმოჩნდა.

„კომპანია Schuchmann Wines-მა მიმდინარე პერიოდში ბაზარზე ახალი ღვინო გამოიტანა. ეს არის ჩვენთვის ექსპერიმენტული ღვინის ჯიში - საუბარი მაქვს გერმანულ ყურძნის ჯიშზე რისლინგი, რომელიც მოვიყვანეთ ქინძმარაულის მიკროზონაში და ევროპული ტექნოლოგიით შევქმენით გერმანული ტრადიციის ღვინო - თეთრი, მშრალი რისლინგი, რომელიც საკმაოდ კარგი გამოვიდა, ძალიან საინტერესო ჯიშური არომატებით. ეს ყურძენი მოდის გერმანიის ძალიან განსხვავებულ კლიმატურ ტერიტორიაზე, უფრო ამაღლებულ ვენახებში და მიუხედავად ამისა, ჩვენთან, კახეთში, ძალიან კარგი მოსავალი მივიღეთ. შესაბამისად, გამოვიტანეთ ბაზარზე ახალი ღვინო - რისლინგი. ეს ჩვენთვის არის საიმიჯო მიმართულება და განკუთვნილია მხოლოდ ადგილობრივი ბაზრისთვის. ჩვენ, როგორც გერმანული ფესვების კომპანიამ, მიზანშეწონილად ჩავთვალეთ, რომ ჩვენს პორტფელში რაიმე გვქონოდა გერმანული წარმომავლობის,“ - აცხადებს ნუცა აბრამიშვილი.

ღვინო რისლინგი გათვლილია საშუალო სეგმენტზე - საკმაოდ საინტერესო, არომატული, საზაფხულო ღვინოა, რომელიც შესანიშნავად ერგება ქართულ კერძებს, მსუბუქ სალათებსა და ხილს.

Schuchmann Group-ის გენერალური დირექტორის თქმით, რისლინგის შეძენა ამ დროისთვის შესაძლებელია Schuchmann Wines Chateau, Villas & SPA-ში და ასევე Schuchmann-ის საფირმო მაღაზიაში, რომელიც მდებარეობს კისისხებში, Schuchmann Wines Chateau-ში. ხოლო სექტემბრიდან ახალი ღვინო უკვე სხვადასხვა ქსელებს შეეთავაზებათ.