Nutera საქმიანობის დაწყებიდან დღემდე ეტაპობრივად აფართოებს როგორც პროდუქციის ასორტიმენტს, ისე გაყიდვების არხებს. კომპანია თანამშრომლობს რამდენიმე ქსელურ მაღაზიასთან, ზრდის საწარმოო შესაძლებლობებს და მომხმარებლებს ახალ პროდუქტებს სთავაზობს.

რა ეტაპზეა Nutera-ს განვითარება, როგორ გაიზარდა პროდუქციის ხელმისაწვდომობა, რა სიახლეები დაემატა ასორტიმენტს და რა გეგმები აქვს კომპანიას - ამ საკითხებზე Business Insider Georgia-სთან კომპანიის თანადამფუძნებელმა თამაზ გიუნაშვილმა ისაუბრა.

საქმიანობის დაწყებიდან დღემდე როგორ აფასებთ კომპანიის განვითარების დინამიკას და რა არის ამ ეტაპზე ბრენდის მთავარი მიღწევები?

კომპანია საქმიანობის დაწყებიდან დღემდე ეტაპობრივად და სტაბილურად ვითარდება, რაც, პირველ რიგში, პროდუქციის ასორტიმენტის გაფართოებასა და მომხმარებელთა რაოდენობის ზრდაში აისაეხება. განვითარების მნიშვნელოვან ეტაპს წარმოადგენს თანამშრომლობის დაწყება როგორც საბითუმო, ისე ქსელურ მაღაზიებთან, რამაც ჩვენი პროდუქციის ხელმისაწვდომობა და ბაზარზე პოზიციონირება მნიშვნელოვნად გააძლიერა.

ასევე, მოზიდული ფინანსური რესურსების შედეგად საწარმოს დაემატა ახალი ტექნიკა და აღჭურვილობა, რაც ზრდის წარმოების წარმადობას, ამარტივებს სამუშაო პროცესებსა და ხელს უწყობს მათი უფრო ავტომატიზებული და ეფექტიანი მართვის დანერგვას.

დღეს ჩვენი მთავარი მიღწევაა ის, რომ კომპანია მუდმივად აფართოებს შესაძლებლობებს, ზრდის წარმოების მასშტაბებსა და ეტაპობრივად იმკვიდრებს უფრო მყარ პოზიციას ბაზარზე.

წინა ინტერვიუში ასორტიმენტის გაფართოებაზე საუბრობდით - რა სიახლეები დაემატა ამ მიმართულებით და კიდევ რა ახალი პროდუქტების დამატებას გეგმავთ?

ჩვენი ასორტიმენტი ეტაპობრივად ფართოვდება მომხმარებელთა მოთხოვნებისა და ბაზრის ინტერესების შესაბამისად. ბოლო პერიოდში პროდუქტების ხაზს შეემატა არაქისის კარაქის ახალი ნაირსახეობა - ხრაშუნა (Crunchy) არაქისის კარაქი. კლასიკური არაქისის კარაქისგან განსხვავებით, მას აქვს შედარებით მყარი კონსისტენცია და ძირითადი მასა წარმოდგენილია კლასიკური არაქისის კარაქით, რომელშიც დამატებულია მცირე ზომის არაქისის გრანულები, რაც პროდუქტს განსხვავებულ ტექსტურასა და გემოს სძენს.

ასევე, ჩვენი ერთგული მომხმარებლის ინტერესებისა და მოთხოვნების გათვალისწინებით, მალე ასორტიმენტის ახალი პროდუქტის ხაზით გავამდიდრებთ. მისი დეტალები და განსაკუთრებული მახასიათებლები ამ ეტაპზე საიდუმლოდ დარჩება, რადგან გვინდა, ეს სიახლე ჩვენი მომხმარებლისთვის სასიამოვნო სიურპრიზად დავტოვოთ.

გვჯერა, რომ ახალი ხაზი მომხმარებელთა განსაკუთრებულ ინტრესს დაიმსახურებს და ჩვენი ასორტიმენტის ერთ-ერთ გამორჩეულ და მოთხოვნად მიმართულებად იქცევა.

როგორ განვითარდა Nutera-ს გაყიდვების არხები საქმიანობის დაწყებიდან დღემდე და რამდენად გაიზარდა პროდუქციის ხელმისაწვდომობა მომხმარებლებისთვის?

ჩვენი ბოლო ინტერვიუდან დღემდე „ნუთერას“ პროდუქციის ხელმისაწვდომობა მომხმარებლებისთვის მნიშვნელოვნად გაიზარდა. ამ ეტაპზე უკვე ვთანამშრომლობთ რამდენიმე ქსელურ მაღაზიასთან, მათ შორის „ზღაპართან“, „ნატურალთან“, „სუზალასთან“და „პონტო მარტისთან“, რაც საშუალებას გვაძლევს, ჩვენი პროდუქცია უფრო ფართო მომხმარებელთა წრეს მივაწოდოთ.

ამასთან, აქტიურად ვაგრძელებთ გაყიდვების არხების გაფართოებას და ამჟამად მოლაპარაკებები მიმდინარეობს სხვა ქსელურ მაღაზიებთანაც. შესაბამისად, სამომავლოდ ჩვენი პროდუქცია კიდევ უფრო მეტი მომხმარებლისთვის გახდება ხელმისაწვდომი, რაც „ნუთერას“ განვითარებისთვის წინ გადადგმული კიდევ ერთი ნაბიჯია.

რა არის კომპანიის სამომავლო გეგმები? იგეგმება თუ არა ახალი გაყიდვების არხების, თანამშრომლობების ან ბაზრების მიმართულებით გაფართოება?

კომპანიის ერთ-ერთი მთავარი სამომავლო მიზანი წარმოების შესაძლებლობების კიდევ უფრო გაზრდაა, რათა ბაზარზე არსებული მოთხოვნა სრულად დავაკმაყოფილოთ. ამ მიმართულებით უკვე ვზრდით დღიურ წარმადობას და ვაგრძელებთ საწარმოო პროცესების გაუმჯობესებას.

უახლოეს მომავალში მომხმარებლებს სრულიად ახალ პროდუქტების ხაზსაც შევთავაზებთ, რაც ჩვენი ასორტიმენტის კიდევ უფრო მრავალფეროვნებას შეუწყობს ხელს. პარალელურად, აქტიურად ვმუშაობთ გაყიდვების არხების გაფართოებაზე და ვგეგმავთ, რომ „ნუთერას“ პროდუქცია კიდევ უფრო მეტ მაღაზიათა ქსელში გახდეს ხელმისაწვდომი.

ჩვენი მიზანია, ეტაპობრივად გავზარდოთ როგორც წარმოების მასშტაბი, ისე ბრენდის ცნობადობა და მომხმარებელთა ხელმისაწვდომობა ჩვენს პროდუქტებზე.