5-7 თებერვალს Château Mukhrani • შატო მუხრანი მონაწილეობას მიიღებს ინდოეთის ერთ-ერთ წამყვან ტურისტულ გამოფენაში - OTM Tourism Fair 2026, რომელიც მუმბაიში გაიმართება. Business Insider Georgia-სთან საუბარში „შატო მუხრანის“ ტურიზმის დეპარტამენტის ხელმძღვანელი თამარ ბუაძე აცხადებს, რომ გამოფენაში მონაწილეობა ობიექტისადმი ინტერესს კიდევ უფრო გაზრდის. 

„ბოლო წლებში ინდოეთიდან საქართველოში ვიზიტორთა რაოდენობა გაზრდილია. მუმბაიში დაგეგმილ გამოფენაზე მივდივართ ჩვენი სრული შეთავაზებებით, რაც მოიცავს როგორც ღვინის ტურიზმის მიმართულებას, სხვადასხვა ტურისტულ პაკეტებს აღნიშნულ ლოკაციაზე, ასევე ღონისძიებების მასპინძლობის სერვისებს. აღნიშნულ გამოფენაში მონაწილეობით მოლოდინი გვაქვს, რომ ინტერესი კიდევ უფრო გაიზრდება როგორც ღონისძიებების, ისე ზოგადად ტურიზმის მიმართულებით. შესაბამისად, ყველაფერს გავაკეთებთ იმისათვის, რომ ინდოელი პოტენციური მომხმარებლებისთვის „შატო მუხრანის“ სერვისები უკეთ წარმოვაჩინოთ“, - აცხადებს თამარ ბუაძე.

მისივე განმარტებით, „შატო მუხრანის“ მაგალითზე ინდოეთიდან ჩამოსული ვიზიტორების სტატისტიკა მზარდ ტენდენციას აჩვენებს, რაც სხვადასხვა მარკეტინგულმა კამპანიებმა და ინდოეთსა და საქართველოს შორის პირდაპირი ფრენების დანიშვნამ განაპირობა.

„ინდოეთიდან ვიზიტორთა რაოდენობა წლიდან წლამდე იზრდება, რაც სხვადასხვა მარკეტინგული აქტივობებით არის განპირობებული. რა თქმა უნდა, პირდაპირი ფრენებიც ამ პროცესს ხელს უწყობს — როდესაც არსებობს პირდაპირი რეისი, რომელიც დაახლოებით ექვს საათს გრძელდება, საქართველოში მოგზაურობა მარტივდება და ტურისტებისთვის მეტად მიმზიდველი ხდება. ზოგადად, ინდოელი ტურისტების ინტერესი მზარდია“, - აცხადებს თამარ ბუაძე.

გარდა კულტურული ტურიზმისა, ინდოეთიდან იზრდება იმ ვიზიტორთა რაოდენობაც, რომლებიც საქართველოში ქორწილებისა და სხვადასხვა ღონისძიებების აღსანიშნავად ჩამოდიან.

„ინდოელები საკმაოდ ცნობილნი არიან მასშტაბური ღონისძიებების ორგანიზებით. ქორწილებზე მოწვეული სტუმრების რაოდენობა, როგორც წესი, მრავალრიცხოვანია. ამ მიმართულებით „შატო მუხრანში“ უკვე ვამუშავებთ რამდენიმე მოთხოვნას და ვფიქრობთ, რომ აღნიშნულ გამოფენაში მონაწილეობით კიდევ უფრო გავზრდით ინტერესს როგორც ჩვენი ქვეყნის, ისე „შატო მუხრანის“ მიმართ“, - აცხადებს თამარ ბუაძე.

„შატო მუხრანი“ XIX საუკუნის მეორე ნახევარში ბაგრატიონთა დინასტიის წარმომადგენელმა, ივანე მუხრანბატონმა დააარსა და დღემდე ინარჩუნებს შატოს კლასიკურ კონცეფციას, რომელიც ოთხ ძირითად ფასეულობას ეფუძნება: საკუთარ ვენახებს, მეღვინეობას, ისტორიულ სასახლესა და კულტურულ მემკვიდრეობას.

შატო მდებარეობს ქართლში, სოფელ მუხრანში და წარმოადგენს პირველ ქართულ შატოს, რომელიც ევროპული შატოების მოდელზეა აგებული.

„შატო მუხრანის“ ყოველდღიური შეთავაზებები მოიცავს ისტორიულ ტურებს, ღვინის დეგუსტაციებს, დეგუსტაციის მასტერკლასებსა და კულინარიულ აქტივობებს, რომელთაც დიდწილად უცხოელი სტუმრები ირჩევენ. სხვადასხვა კლინარიული მასტერკლასები და აქტივობები ლოკაციაზე ხორციელდება „შატო მუხრანის“ მზარეულებთან ერთად.

შატოს ტერიტორიაზე განთავსებულია რესტორანი „ორანჟერია“ - ულამაზესი სივრცე, რომელიც მრავალფეროვან ღონისძიებებს მასპინძლობს.
ღონისძიებები „შატო მუხრანის“ ერთ-ერთი მთავარი მიმართულებაა - კერძო, კორპორატიული, ბიზნეს და MICE ტურიზმის ღონისძიებები აქ რეგულარულად იმართება.

„შატო მუხრანის“ ტურისტული სერვისები თანაბრად პოპულარულია როგორც ადგილობრივ, ისე უცხოელ სტუმრებს შორის.

ამ ეტაპზე „შატო მუხრანში“ 23 სახეობის პროდუქციას, როგორც ღვინოს, ასევე ჭაჭას.