„ლინეიტი“ არის ამერიკაში დაფუძნებული საერთაშორისო პროგრამული უზრუნველყოფის განვითარების კომპანია, რომელსაც 20 წლიანი გამოცდილება აქვს. კომპანიის ბიზნეს განვითარების ხელმძღვანელი, თორნიკე სულაბერიძე, Business Insider Georgia-სთან მიმდინარე სიახლეებსა და სამომავლო გეგმებზე საუბრობს.

„ამ ეტაპზე კომპანიაში მიმდინარეობს შიდა გადაწყობა ხელოვნური ინტელექტის მიმართულებით და პროცესების ოპტიმიზაცია. ჩვენ გვჯერა, რომ ხელოვნური ინტელექტი საშუალებას მოგვცემს შევამციროთ ადამიანური რესურსების დროითი დატვირთვა და თანამშრომლების დრო უფრო ეფექტურად გადავანაწილოთ.

ეს ნიშნავს, რომ მათი დროის რესურსი უკეთ იქნება ორგანიზებული, ათვისებული და გამოყენებული, რაც საბოლოოდ აისახება იმაზე, რომ თუ ადრე ერთი ადამიანი ერთ პროექტზე მუშაობდა, დღეს შესაძლებელი იქნება ერთდროულად რამდენიმე პროექტში იყოს ჩართული და მაინც შეინარჩუნოს იგივე ხარისხი როგორც პროდუქტის, ისე სერვისის მიწოდების კუთხით.

გარდა ამისა, ვმუშაობთ რამდენიმე მიმართულებით ვმუშაობთ. 2026 წელს გავაქტიურდით როგორც ამერიკის, ისე ევროპის ბაზარზე პარტნიორული მიმართულებით (partnerships). ამ ეტაპზე რამდენიმე დიდ კომპანიასთან დავამყარეთ პარტნიორობა, მათ შორის არის ClickHouse. ამ თანამშრომლობის ფარგლებში ვცდილობთ მათი კლიენტებისთვის ერთობლივად დავნერგოთ ხელოვნური ინტელექტის გადაწყვეტილებები - ის ტექნოლოგიები, რომლებიც ჩვენ უკვე წარმატებით დავნერგეთ ამერიკულ ბრენდებსა და პროექტებში. ახლა მიზნად გვაქვს მსგავსი პროექტების განხორციელება ევროპის ბაზარზეც და ამ გამოცდილების იქ გადატანა.

ასევე, ჩვენი მთავარი ამოცანა შეიცვალა პოზიციონირების კუთხითაც: თუ აქამდე ვმუშაობდით როგორც საერთაშორისო მასშტაბის პროგრამული უზრუნველყოფის კომპანია, დღეს ვპოზიციონირებთ როგორც ხელოვნური ინტელექტის დანერგვისა და განხორციელების საკონსულტაციო კომპანია. ჩვენი მიზანია ბიზნესებს შევთავაზოთ სრულფასოვანი გადაწყვეტილებები, პროცესებში ხელოვნური ინტელექტის ინტეგრაცია, ავტომატიზაცია და ოპტიმიზაცია, რაც მნიშვნელოვნად გააუმჯობესებს მათ ოპერაციულ ეფექტიანობას.

როგორც მოგეხსენებათ, ჩვენი კომპანია ოფისებს ფლობს, როგორც საქართველოში, ასევე რეგიონში. შესაბამისად, აქტიურად ვრჩებით ერთ-ერთ მსხვილ დამსაქმებლად და ვცდილობთ მოვიზიდოთ ახალი ტალანტები, განსაკუთრებით Data engineering-ისა და ხელოვნური ინტელექტის მიმართულებით.

იმის გათვალისწინებით, რომ ჩვენი საქმიანობა სრულად ერგება კლიენტების მოთხოვნებს AI-ის მიმართულებით, ჩვენ ვაძლევთ თანამშრომლებს შესაძლებლობას, საქართველოდან, სომხეთიდან ან სხვა რეგიონული ოფისებიდან იმუშაონ საინტერესო და თანამედროვე პროექტებზე, რომლებზეც წვდომა აქვთ წამყვან ამერიკულ და ევროპულ კომპანიებთან.
სამომავლოდ, მასშტაბურ გაფართოებას არ ვგეგმავთ. ჩვენი მთავარი ფოკუსი შიდა პროცესების ოპტიმიზაციის სრულად დასრულებაა “, - აცხადებს თორნიკე სულაბერიძე.

ინფორმაციისთვის, კომპანია საქართველოში დაახლოებით 150 ადამიანს ასაქმებს, ხოლო საერთაშორისო მასშტაბით „ლინეიტის“ გუნდი 300-მდე წევრს აერთიანებს. კომპანიის სათაო ოფისი ნიუ-იორკში მდებარეობს. გარდა ამისა, „ლინეიტს“ ოფისები აქვს თბილისში, ერევანში და სერბეთში.