Georgian Greens ქართული ბრენდია, რომელიც მომხმარებელს ქილაში დაფასოებულ, გამოსაყენებლად მომზადებულ მწვანილსა და სხვა ინგრედიენტებს სთავაზობს. კომპანიის მიზანია, ყოველდღიური კერძების მომზადება გაამარტივოს და მომხმარებელს დრო დაუზოგოს. როგორია ბრენდის პროდუქციის სპეციფიკა, რა განასხვავებს მას ბაზარზე არსებული შეთავაზებებისგან და რა გეგმები აქვს კომპანიას სამომავლოდ - ამ საკითხებზე Business Insider Georgia-ს Georgian Greens-ის დამფუძნებელი ეკა ვეფხვაძე ესაუბრა.

რას მოიცავს Georgian Greens-ის საქმიანობა, როდიდან ოპერირებთ ბაზარზე და რას სთავაზობთ მომხმარებელს?

Georgian Greens-ის იდეა ყოველდღიური სამზარეულოდან წამოვიდა,
როგორ გავამარტივოთ კერძების მომზადება და მომხმარებელს მისთვის საყვარელი გემოები მოსახერხებელი ფორმით შევთავაზოთ.

ჩვენ ვაწარმოებთ ქილაში დაფასოებულ, გამოსაყენებლად მომზადებულ ნიორს, ნივრისა და ჯინჯერის მიქსს, ქინძს, კამასა და პიტნას. ეს ის ინგრედიენტებია, რომლებსაც ხშირად ვიყენებთ, თუმცა მათი გარეცხვა, გასუფთავება და დაჭრა დროს მოითხოვს.

ჩვენ ამ საქმეს მომხმარებლისთვის წინასწარ ვაკეთებთ, მას მხოლოდ ქილის გახსნა და კერძისთვის სასურველი რაოდენობის დამატება სჭირდება.

როგორია პროდუქციის წარმოების პროცესი - ნედლეულის შერჩევიდან მომხმარებლამდე მიწოდებამდე და როგორ უზრუნველყოფთ პროდუქციის ხარისხის შენარჩუნებას?

ყველაფერი ხარისხიანი ნედლეულის შერჩევით იწყება. ყურადღებას ვაქცევთ მის სიჯანსაღეს, მდგომარეობასა და არომატს. შემდეგ ნედლეული გადის გადარჩევის, გასუფთავებისა და საფუძვლიანი რეცხვის ეტაპებს.

მწვანილის ფოთლებსა და ღეროებს შორის შესაძლოა დარჩეს მიწა, სხვა მინარევები და მიკროორგანიზმები, მათ შორის ნაწლავის ჩხირი და სალმონელა. ამიტომ მხოლოდ წყლის სწრაფი გადავლებით არ შემოვიფარგლებით , საფუძვლიანი გასუფთავება და ჰიგიენის დაცვა ჩვენი წარმოების მნიშვნელოვანი ნაწილია.

მომზადების პროცესში ვიყენებთ მარილსა და თერმულ დამუშავებასაც, რაც მიკრობიოლოგიური რისკების შემცირებასა და პროდუქტის შენახვის ვადის გახანგრძლივებას ემსახურება.

რა არის კომპანიის მთავარი კონკურენტული უპირატესობა და რამდენად მაღალია მოთხოვნა თქვენს პროდუქციაზე?

ჩვენი მთავარი უპირატესობა პროდუქტის განსხვავებული ფორმატია, რომელსაც, ჩვენი ინფორმაციით, ქართულ ბაზარზე პირდაპირი ანალოგი არ აქვს. ეს არც სოუსია და არც საწებელი, ეს არის კერძის მოსამზადებლად მზა ინგრედიენტი, რომელსაც მომხმარებელი საკუთარი გემოვნებით იყენებს.

Georgian Greens აერთიანებს ხელმისაწვდომ ფასს, ჯანსაღი კერძების მომზადებისთვის საჭირო ინგრედიენტებსა და მოხერხებულობას. მომხმარებელს ვუზოგავთ რეცხვის, გასუფთავებისა და დაჭრის დროს, ქილიდან იღებს საჭირო რაოდენობას და ამატებს კერძს. ამასთან, ნაკლები პროდუქტიც რჩება გამოუყენებელი.

მოთხოვნის შეფასებისას ჩვენთვის მნიშვნელოვანია მომხმარებლის უკუკავშირი: რომელ პროდუქტს ირჩევს, როგორ იყენებს და ბრუნდება თუ არა განმეორებითი შეძენისთვის. სწორედ ეს გვიჩვენებს, რამდენად პასუხობს ჩვენი შეთავაზება მის ყოველდღიურ საჭიროებებს.

რა გეგმები აქვს Georgian Greens-ს სამომავლოდ? განიხილავთ თუ არა ასორტიმენტის გაფართოებას, გაყიდვების ახალი არხების განვითარებას ან სხვა ბაზრებზე გასვლას?

გვინდა, Georgian Greens უფრო მეტი ადამიანისთვის იყოს ხელმისაწვდომი და ყოველდღიური სამზარეულოს ნაწილი გახდეს. ვგეგმავთ ასორტიმენტის განვითარებას მომხმარებლის სურვილებისა და საჭიროებების გათვალისწინებით - ახალი ინგრედიენტებისა და გემოების კომბინაციების დამატებას.

ასევე განვიხილავთ სავაჭრო ქსელებში წარმოდგენის გაფართოებას, ონლაინ შეკვეთების განვითარებასა და რესტორნებთან და კაფეებთან თანამშრომლობას.

სამომავლოდ გვაინტერესებს საექსპორტო ბაზრებიც. ჩვენი ამოცანაა, ზრდასთან ერთად შევინარჩუნოთ ის, რის გამოც მომხმარებელმა უნდა აგვირჩიოს - ხარისხი, ხელმისაწვდომი ფასი და გამოყენების სიმარტივე.

ინფორმაციისთვის, პროდუქციის შეძენა შესაძლებელია Wolt-ის საშუალებით ან კომპანიის კურიერის მეშვეობით.